УОК-ын өргөтгөсөн хуралд Ерөнхий сайд У.Хүрэлсүх оролцож чиглэл өглөө. Тэрбээр,
1. Коронавирус халдварт цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах хуулийг иргэд олон нийтэд сурталчилж, хэрэгжилтийг нь сайтар хангаж ажиллах зайлшгүй шаардлагатай байна.
2. Коронавирус халдварыг оношлох, эмчлэх, илрүүлэх чиглэлээр эрүүл мэндийн чадавхийг сайжруулах, бэлтгэл, бэлэн байдлыг сайжруулахад онцгойлон анхаарч ажиллахыг сануулж байна. Бид хэр сайн бэлтгэлтэй байна аюулыг төдий чинээ холдуулж чадна гэдгийг хүн бүр дотроо сайн бодох хэрэгтэй байна. Эрсдэлтэй нөхцөлд ажиллаж байгаа эмч, ажиллагсдын эрүүл мэндийг хамгаалах, дархлааг дэмжих арга хэмжээ авах нь чухал. Өвчтөнтэй 21 хоног хамт тусгаарлагдаад ажиллаж байгаа. Тиймээс энэ хүмүүсийн ар гэрийнхэнд мөнгөн урамшуулал олгох чиглэлээр асуудлыг судалж боловсруулж Засгийн газарт танилцуулахыг УОК-т үүрэг болгож байна.
3. Улс, нийслэл аймгийн түвшинд коронавирус халдвар тархах эрсдлийн үнэлгээг тогтмол үе шаттай хийж, нөхцөл байдалд нийцүүлж хэрэгжилтийг тогтоож ажиллах. Бидэнд 8 удаагийн үнэлгээгээр өндөр эрсдэлтэй гэж гарсныг анхаарах хэрэгтэй. Тиймээс аймаг, нийслэл, сумдын УОК-ын гишүүдэд үүрэг болгож байна.
4. Халдварын эрсдэлт нөхцөл байдал үүссэн тохиолдолд иргэн, аж ахуй нэгж байгууллагуудын бэлэн байдлыг хангах, шаардлагатай нөөцийг бүрдүүлэх, бүх түвшинд дайчилгаа зохион байгуулах бэлтгэл сайтар хангасан байх ёстой.
5. УИХ-ын 2020 оны ээлжит сонгууль зохион байгуулах үйл ажиллагаанд халдвараас урьдчилан сэргийлэх талаар тодорхой заавар зөвлөмж гаргаж, СЕХ-нд хүргүүлж хамтран ажиллах.
5. Цар тахлаас урьдчилан сэргийлэх, эрүүл ахуйн ухамсар соёлыг дээшлүүлэхэд чиглэсэн ажлуудыг зохион байгуулах. Иргэд цаг агаар дулаарч байгаа учраас маск зүүхийг тээршааж байж магадгүй. Ингэж болохгүй. Ард иргэддээ ухамсарлуулан ойлгуулах ажлыг хоблогдох байгууллагууд хийх ёстой.
6. Хэвлэл мэдээллийн байгуулагууд баталгаат эх сурвалжаас мэдээлэл авч түгээхийг анхааруулж байна. Үүнд хэвлэлийнхэн анхаараарай. Энэ бол улс үндэстний аюулгүй байдалтай холбоотой асуудал.
7. Үүрэг гүйцэтгэж байгаа нийт төрийн албан хаагчид болон тэдний гэр бүлийг урамшуулах ажлыг анхааралдаа авахыг дахин хэлье.
-ТОО ХЯЗГААРГҮЙ, ЭМХ ЗАМБАРААГҮЙ БАЙДЛААР ГАДААДААС ИРГЭДЭЭ АВЧ ИРВЭЛ МОНГОЛ УЛС АЮУЛД ӨРТӨНӨ-
Засгийн газар гадаад улсаас иргэдээ татан авах ажлаа үргэлжлүүлнэ. Энэ үед хүний нутагт байгаа иргэдийн нөхцөл байдал хүнд байгааг бид ойлгож байгаа. Гэхдээ дотоод нөөц боломждоо нийцүүлнэ. 10 мянган хүнийг нэг дор татаад авч чадахгүй. Боломжийнхоо хэрээр иргэдээ авчирч байгаа. Улс үндэстнийхээ аюулгүй байдлыг харгалзан үзнэ. Тийм учраас тодорхой дэг журмынхаа дагуу аюулгүй байдлаа нэн сайн хангаж, үе шаттайгаар иргэдээ татан авна. Тусгаарлах байрны багтаамж, мэргэжлийн ажилтнууд, нисэх онгоцны хүрэлцээг харгалзан үзнэ.
Хил нээхгүй. Хэзээ нээхийг би бас хэлж мэдэхгүй байна. Байдал тайван болсон тэр цагт нээнэ. Коронавирусийг эдгээх увидастай эм тариа гарах үе манай улсын өндөржүүлсэн бэлэн байдал үгүй болно. Тиймээс нөхцөл байдалд дасан зохицож, ажил төрлөө эмхэлж, ард иргэдийнхээ амь насыг авран хамгаалах ажлыг зохион байгуулах ёстой.
УОК, Засгийн газраас иргэддээ худлаа мэдээлэл өгөхгүй. Бид бүх нөөц боломжоо дайчлан ажиллаж байгаа. УОК, Засгийн газрын гаргасан шийдвэр бүх хүнд таалагдах албагүй. Гаргасан шийдвэрийг ягштал биелүүлэх ёстой" гэв.
102 сэтгэгдэлСэтгэгдэл бичих