Т.Доржханд: Таван чиглэлийн шинэчлэлийн хүрээнд хуулийн төслүүд өргөн барина

"Зөв хүн электорат" эвслийн удирдлагууд болон тус эвслээс УИХ-д сонгогдсон Т.Доржханд гишүүн цаг үеийн асуудлаар мэдээлэл хийлээ. 

Т.Доржханд гишүүн хэлэхдээ "Аравдугаар сард намрын чуулган эхлэхээр чухал хуулийн төслүүдийг боловсруулж хэлэлцүүлнэ гэсэн төлөвлөгөөтэй ажиллаж байна. Хэдийгээр нэг суудалтай байгаа ч гэсэн бидний ард маш олон мэргэжлийн эдийн засагчид, хуульчид, инженер, багш, эмч гээд салбар бүрийн мэргэжилтнүүд ажиллаж байгаа гэдгийг онцлон тэмдэглэж байна. Бид нийлээд реформуудыг манлайлж ажиллана. Таван чиглэлийн шинэлчлэлийн асуудлыг намрын чуулганаар хэллэцүүлэх хүсэлтээ өгсөн. 

Нэгдүгээрт тэтгэврийн шинэчлэлийг яаралтай эхлүүлэх шаардлагатай. Үүний хүрээнд Төрөөс тэтгэврийн шинэчлэлийн талаар баримтлах бодлого батлах тухай УИХ-ын тогтоолын төсөл өргөн барина. 

Хоёрдугаарт санхүүгийн зах зээлийн шинэчлэлийг хүрээнд Санхүүгийн салбарыг эрчимжүүлэх тухай УИХ-ын тогтоолын төсөл,  Үнэт цаасны зах зээлд нэмэлт өөрчлөлт оруулах тухай хуулийн төсөл, Даатгалын тухай хуульд нэмэлт өөрчлөлт оруулах тухай хуулийн төсөл, Даатгалын мэргэжилтэн, оролцогчдын тухай хуульд нэмэл өөрчлөлт оруулах тухай хуулийн төсөл, Жолоочийн даатгалын тухай хуульд нэмэлт өөрчлөлт оруулах тухай хуулийн төслүүдийг тус тус өргөн барьж хэлэлцүүлэх болно.

Гуравдугаарт боловсролын шинэчлэлийг эхлүүлэх ажлын хүрээнд бид Багшийн тухай хуулийн төслийг УИХ-д өргөн мэдүүлнэ. 

Дөрөвдүгээрт улс төрийн тогтолцооны шинэчлэлийг эхлүүлэх ажлын хүрээнд Монгол Улсын Их хурлын Сонгуулийн тухай хуульд нэмэлт өөрчлөлт оруулах тухай хуулийн төсөл, Улс төрийн намын тухай хуулийн төслийг мөн бид боловсруулан чуулганаар хэлэлцүүлэх болно. 

Тавдугаарт хот байгуулалтын шинэчлэлийг эхлүүлэх ажлын хүрээнд Хот байгуулалтын тухай хуульд нэмэлт өөрчлөлт оруулах тухай хуулийн төслийг өргөн барих болно. 

Эдгээр бол намрын чуулганаар оруулах хуулийн төслүүд. Маш олон салбарт шинэлчлэл хийгдэх шаардлагатай байгаа. Энэ чиглэлээр манай мэргэжилтнүүд өнөөдрөөс эхлээд ажилдаа ороод багаараа хуулийн төслүүдийн судалгаан дээр сууж ажиллах болно" гэв. 

"Зөв хүн электорат" эвслийн гишүүн, судлаач Б.Мөнхсоёл хэлэхдээ "Нэгэнт Засгийн газар маш яаралтай батлагдсан. Тиймээс одоо яаралтай авах арга хэмжээнүүд байна гэж үзэж байна. 

Гадаадад гацсан Монголчуудын асуудал байна. Өнөөдрийг хүртэл ирж чадахгүй байгаа 10 мянгаад иргэн байсныг сүүлийн сард эрчимтэй татаж байна. Гэсэн хэдий боловч гадаадад гацсан хүмүүст санхүү, эрүүл мэнд, сэтгэл санааны хүндрэлүүд учирч, хүний эрх зөрчигдөж байгаа талаар мэдээлсээр байна. Коронавирустай холбоотойгоор тэмцэх, урьдчилан сэргийлэх, нийгэм, эдийн засгийн сөрөг нөлөөллийг бууруулахтай холбоотой хууль баталсан. Гэвч хэрэгжилт нь ямар байгааг хэлэхэд хүнд байна. Иргэдээ мэдээллээр даруй хангаж байгаач гэдэг шаардлагыг хүргэж байна. Мөн улсын төсвөөс гадаадад гацсан иргэддээ татаас олгох асуудлыг шийдмээр байна. 

Сүүлийн саруудад орон байргүй, нийтийн газруудаар хоноглож байгаа оюутан залуус, иргэдэд санхүүгийн боломж байхгүй болсон. Тиймээс иргэдэ ялгаварлан гадуурхахгүй, асуудалд орсон байгаад нь тусалж дэмжих нь монгол төрийн үндсэн үүрэг." гэлээ.