ХӨСҮТ: Гурван хүнээс коронавирусийн халдвар илэрч, хоёр хүн эдгэрлээ

ЭМЯ-наас өдөр бүрийн 11:00 цагт өгдөг ээлжит мэдээллээ хийлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  12.8 сая хүн өвчилж, 567 мянган хүн нас баржээ. 7.4 сая хүн эдгэрч, эмнэлгээс гарч, 4.7 сая хүн эмчлүүлж байна.  Сүүлийн 24 цагийн дотор дэлхий дахинд 214 мянган хүн шинээр коронавирусийн халдвар авлаа.

АНУ-д 66 мянган хүн шинээр халдвар авсан нь хамгийн олон хүн халдварт өртсөн тохиолдол болж байна.  АНУ-ын 33 мужид коронавирусийн өвчлөлийн тоо өссөн байна. Бразилд 39 мянга, Энэтхэгт 27 мянга, Өмнөд Африкт 13 мянган хүн шинээр халдвар авчээ.  

ОХУ-д сүүлийн 24 цагт 6611 хүн шинээр коронавирусийн халдвар авч, 188 хүн нас баржээ. Манай олон аймагтай хил залгадаг Буриад, Тува, Читид 39-45 хүн халдвар авсан байна. Тувад өвчлөл 40 хүнээр нэмэгдсэн. Читид шинээр 32 тохиолдол бүртгэгдэж нийт өвчлөлийн тоо 3594 болжээ.

Ажиглалтад шинээр  103 хүн орж, 269 хүн гарч, гэрийн тусгаарлалтад шилжсэн. Одоогоор 2988 хүн ажиглалтад байгаа.  Үүнд 1-5 насны 198 хүүхэд, 108 жирэмсэн эмэгтэй, 346 архаг хууч өвчтэй хүн байгаа. Цэргийн төв эмнэлэгт одоогоор 48 хүн хэвтэн эмчлүүлж байна. Эдгээрээс 6 хүний биеийн байдал хүндэвтэр байна" хэмээлээ.

ХӨСҮТ-ийн захирал Д.Нямхүү "2020 оны долдугаар сарын 11-ний өдөр ХӨСҮТ-ийн вирус судлалын хоёр, Дархан-Уул аймгийн салбар лабораторид нийтдээ 377 хүний сорьцоос шинжилгээ авахад, 374 хүнээс  коронавирус илрээгүй.  Харин долдугаар сарын 6-нд Алтанбулагийн боомтоор орж ирж гурван хүнээс халдвар илэрлээ. Энэ нь 7 хоногийн дараа буюу давтан шинжилгээгээр илэрч байгаа юм. Дархан-уул аймгаас ХӨСҮТ-д авчирч тусгаарлан, эмчилнэ.

Өнөөдөр сайн мэдээтэй. Хоёр хүн эдгэрч ХӨСҮТ-ээс дараагийн шатны сувилал руу шилжиж байна. Эдгээр нь ОХУ-аас ирсэн оюутнууд юм. Монголд батлагдсан тохиолдол 230, эдгэрсэн хүн 202, одоо 28 хүн эмчлүүлж байна" хэмээлээ.