Д.Нямхүү: Афганистанаас ирсэн 18 албан хаагчаас коронавирусийн халдвар илэрлээ

ЭМЯ-наас өдөр бүрийн 11:00 цагийн ээлжит мэдээллээ хүргэлээ.Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  12 сая 432 мянган  хүн өвчилж, 580 мянган хүн нас баржээ. 7.8 сая хүн эдгэрч, эмнэлгээс гарч, 5.2 сая хүн эмчлүүлж байна.  Сүүлийн 24 цагийн дотор дэлхий дахинд 202 мянган хүн шинээр коронавирусийн халдвар авч, 5000 гаруй хүн нас барсан байна. Өвчлөл өмнөх өдрийнхөөс 21 мянгаар нэмэгдэж, нас баралт 1500 тохиолдлоор нэмэгдсэн  байна.

24 цагийн дотор  АНУ-д 58 мянга, Бразил улсад 41, Энэтхэгт 29 мянган хүн коронавирусийн халдвар авсан нь өвчлөл хамгийн өндөр байгаа  эхний гурван улс болсон байна. АНУ-ын харшил халдварт өвчин судлалын Үндэсний хүрээлэнгийн захирал “АНУ-ын муж улсуудад коронавирусийн шинэ тохиолдол өдрөөс өдөрт нэмэгдэж байгаад залуучууд ихээхэн нөлөөлж байна. Учир нь залуучууд амны хаалтыг зүүхгүйгээр олон нийтийн газруудаар их явж байгаа нь бусдад халдварыг тараах үндэслэл болж байна. Залуучуудын хувьд коронавирус шинж тэмдэггүй илэрч байгаа учраас эрсдэлт бүлгийн хүмүүст өвчнийг тарааж, хүндрүүлэх нөхцөлийг бүрдүүлж байна” хэмээн анхаарууллаа. 

  ОХУ-д 24 цагийн дотор  6268  хүн шинээр коронавирусийн халдвар авч, 175  хүн нас баржээ. Манай олон аймагтай хил залгадаг Буриад, Тува, Читид 45-46 хүн халдвар авсан байна. Өвчлөл буурах хандлага ажиглагдаж байна. Манай орны хувьд  ажиглалтад шинээр  56 хүн орж, 75 хүн гарч, гэрийн тусгаарлалтад шилжсэн. Одоогоор 2791 хүн ажиглалтад байгаа.  Үүнд 1-5 насны 156 хүүхэд, 104 жирэмсэн эмэгтэй, 202 архаг хууч өвчтэй хүн байгаа. Үүргийн онгоцоор ирсэн 45 хүн Цэргийн төв эмнэлэгт хэвтэн эмчлүүлж байна. Үүнээс 5 хүний биеийн байдал хүндэвтэр, эрчимт эмчилгээний тасагт байна" хэмээлээ.

ХӨСҮТ-ийн захирал Д.Нямхүү "2020 оны долдугаар сарын 15-ний өдөр ХӨСҮТ-ийн вирус судлалын хоёр, Дархан-Уул аймгийн салбар лаборатори, ЗӨСҮТ-ын явуулын хоёр лабораторид  нийтдээ 408 хүний сорьцоос шинжилгээ авахад, 390 хүнээс коронавирус илрээгүй.  Харин 18 хүний шинжилгээнээс  коронавирус илэрлээ. Энэ нь Афганистанаас ирсэн зэвсэгт хүчний дайчдаас илэрсэн. Долдугаар сарын 2-нд Сөүл хотоос ирсэн 262, ажиглах байранд тусгаарлагдсан 42 хүнээс  давтан шинжилгээнээс коронавирус илрээгүй. Мөн Алтанбулагийн боомтоор орж ирсэн  ачаа тээврийн 46 жолоочоос  коронавирус илрээгүй байна.

Өнөөдөр ХӨСҮТ-өөс гурван хүн эдгэрч, дараагийн шатны сувилал руу шилжсэн.  Монголд батлагдсан тохиолдол 261, эдгэрсэн хүн 207, одоо 54 хүн эмчлүүлж байна. Эмчилгээнд байгаа хүмүүсийн биеийн байдал тогтвортой байна. ” хэмээлээ.