Иргэд: Коронавирусийн эсрэг бүх нийтийн анхаарал суларсан байна

Коронавирусийн эсрэг хөл хориог цуцлаагүй байгаа энэ өдрүүдэд Нийслэлчүүдийн анхаарал, сэрэмж суларсан нь харагдах болсон. Иргэд гудамжаар явахдаа маск зүүж, үйлчилгээний газраар үйлчлүүлэхдээ гараа ариутгах, хүн хоорондын зай барих зэргийг мөрдөхөө болиод удаж байна. Зөвхөн иргэдээс гадна үйлчилгээний байгууллагууд хүртэл иргэдэд эрүүл ахуйн шаардлага хүргүүлэхээ больсон. Энэ талаар иргэд ямар байр суурьтай байгааг хүргэж байна.

        Э.Даваасүрэн: Хүмүүс маск зүүхээ больсон байна

Баянзүрх дүүргийн иргэн

Гудамжаар явж байгаа хүмүүсийн ихэнх нь маскаа зүүхээ больсон байна лээ. Хүмүүс Үндэсний баяр наадмаа өргөн дэлгэр тэмдэглэчихсэн учраас одоо өвчин тархахгүй байх гэсэн бодолтой байгаа байх. Мөн дотооддоо өвчин дэгдээгүй учраас санаа зовохгүй байх шиг санагддаг.

Ж.Байгальмаа: Хүн бүр өвчин тусахгүйн тулд маскаа зүүх хэрэгтэй

Сонгинохайрхан дүүргийн иргэн

Хүмүүс маскаа маш муу зүүж байна. Тэр тусмаа зуны халуун өдрүүдэд  зүүхэд хүндрэлтэй байгаа байх. Өвчин тусахгүйн тулд маскыг хүн бүр маш сайн зүүх хэрэгтэй. Сүүлийн үед зах, хүнсний дэлгүүрүүдээр иргэдийг маск зүүхийг шаардаж, гарыг нь заавал ариутгаж, халууныг нь үзэж байж дотогш оруулахаа больсон байна лээ. Хэдхэн сарын өмнө бүх л газар ариутгал, халдваргүйжүүлэлтийг маш сайн хийдэг байсан. Сая л гэхэд би шүдний эмнэлэгт орж шүдээ янзлуулахад тэнд миний халууныг үзэж, гарыг ариутгах хүн байгаагүй. Эмнэлэг хүртэл иймэрхүү хандлагатай байхад бусад газрууд хяналтаа сулруулсанд гайхах асуудал алга. Удахгүй сэрүүний улирал эхлэхэд иргэд маскаа дахин сайн зүүдэг болно гэж найдаж байна.

Н.Болормаа: Хоолны газар, хүнсний дэлгүүрүүдэд маск зүүсэн хүн алга

Чингэлтэй дүүргийн иргэн

Ихэнх хүмүүс гадуур маскгүй явж байна. Дотооддоо коронавирус халдаагүй учраас санаа зовохгүй байгаа байх. Мөн гадаа маш халуун байгаа учрас өндөр настан, хүүхдүүдэд байнга маск зүүх хэцүү байгаа болов уу.  Гэвч халуун, хүйтний алинд ч маскаа зүүх ёстой. Хоолны газар хүнсний дэлгүүрт ч маск зүүсэн хүн алга. Шаардлага  тавих нь ч  багассан харагдсан. 

Б.Номин: Хэсэг бүлэг хүмүүс л маск хэрэглэхгүй байгаа байх

Сүхбаатар дүүргийн иргэн

Бүх хүн маскаа зүүхгүй байгаа гэвэл өрөөсгөл байх. Хэсэг бүлэг хүмүүс л зүүхгүй байгаа. Ер нь зуны халуунд маск зүүх хэцүү юм билээ. Би заримдаа маскаа зүүхгүй байгаа. Үзвэр үйлчилгээ болон олон нийт цугласан газруудаар маскгүй явсан ч “Маскаа зүү” гэж хэлэхгүй байна лээ.

Баянгол дүүргийн иргэн : Коронавирусийн эсрэг бүх хүний анхаарал суларсан байна

Дэлхий нийтээрээ байдал хүнд нөхцөлтэй байхад иргэд маск зүүж, өөрийгөө болон бусдыг хамгаалахгүй байгаа нь маш буруу. Нийтээрээ анхаарлаа сулруулж болохгүй шүү дээ. Нийт Үндэстэнд аюул үүсгэхийг хэн ч үгүйсгэхгүй. Монголчууд их тайвширсан байна. Тэгээд л маск зүүж, бээлий ч өмсөхгүй байгаа байх. Үйлчилгээний газар, иргэд бүгд л анхаарлаа сулруулж болохгүй шүү дээ.

Г.Пүрэв-Очир: Хэн нэгэн таныг заавал маскаа зүү гэж шаардах албагүй

Сонгинохайрхан дүүргийн иргэн

Маскаа зүүхгүй байх нь маш эрсдэлтэй. Коронавирусийн халдвар Монгол улс дотор илрээгүй байгаа ч гэсэн маскаа маш сайн зүүх хэрэгтэй гэж бодож байна. Иргэдийн анхаарал маш их багассан байна. Би хаана ч явсан эрсдэлийг тооцоолон маскаа маш сайн зүүж, гараа тогтмол ариутгаж байгаа. Бусад хүмүүс ч мөн эрүүл мэндийнхээ төлөө хариуцлагатай байх хэрэгтэй. Гадуур маск зүүхийг сануулж байгаа хүн нэг ч алга. Иргэд өөрсдийнхөө төлөө үүргээ ухамсарлахгүй байхад заавал бусад хүн шаардлага тавих албагүй. Бусдаар албадан шаардуулахгүйгээр өөрсдөө сэргийлэх хэрэгтэй.