Д.Нямхүү: 249 хүний сорьцоос коронавирусийн халдвар нэмж илрээгүй

ЭМЯ-наас өдөр бүрийн 11:00 цагийн ээлжит мэдээллээ хүргэлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  17 сая 111 мянган  хүн өвчилж, 671 мянган хүн нас баржээ. 10 сая гаруй хүн эдгэрcэн байна.  Сүүлийн 24 цагийн дотор дэлхий дахинд 253  мянган хүн шинээр коронавирусийн халдвар авч,  5000 гаруй хүн нас барсан байна.

Өчигдрийн ДЭМБ-ын хурлын үеэр ДЭМЫ-ын ерөнхий захирал хэлэхдээ ковид-19 халдвараар хүмүүс өвчилж эсвэл вакцин хийлгэж, сөргийн дархлаа тогтоно гэж үзэхэд одоогоор эрт байна. Иймээс бид коронавирустэй хэрхэн тэмцэхийг сурч, өөрийгөө болон бусдыг урьдчилан сэргийлж, өндөр эрсдэлтэй хүмүүсээ хамгаалах арга барилд суралцах шаардлага тулграрч байна. Иймд өдөр тутмын амьдралдаа хийж чадах хамгийн энгийн алхмуудыг дадал болгохыг хүсчээ. Ялангуяа залуучууд энэ арга хэмжээг сайн сахих хэрэгтэй гэжээ. Учир нь дэлхийн бусад улсуудад залуучуудын өвчлөл нэмэгдсээр байна.

Манай орны хувьд  ажиглалтад шинээр 283 хүн орж, 139 хүн гарч, гэрийн тусгаарлалтад шилжсэн. Одоогоор 2594 хүн ажиглалтад байна. Үүргийн онгоцоор ирсэн 64 хүн Цэргийн төв эмнэлэгт хэвтэн эмчлүүлж байна. Үүнээс 2 хүний биеийн байдал хүндэвтэр, эрчимт эмчилгээний тасагт байна.

24 цагийн хугацаанд 119 дугаарт 176 дуудлага ирж, шуурхай аппт гадаадын Солонгос,ОХУ, Япон, Чех, Швед зэрэг 10 улсаас манай иргэд холбогдож, зөвлөгөө авсан" хэмээлээ.

ХӨСҮТ-ийн захирал Д.Нямхүү "2020 оны долдугаар сарын 30-ны өдөр ХӨСҮТ-ийн вирус судлалын хоёр, Дархан-Уул аймгийн салбар, ЗӨСҮТ-ийн лабораторид нийтдээ 249 хүний сорьцоос шинжилгээ авахад бүгдийнх нь сорьцод коронавирус илрээгүй. Бусад шинжилгээнд хамрагдсан хүмүүсийг дэлгэрэнгүй танилцуулъя.

-2020 оны долдугаар сарын 29-нд Сөүл-Улаанбаатар чиглэлийн онгоцоор ирсэн 164 хүний шинжилгээ

-Ажиглах байранд тусгаарлагдсан 41 хүний давтан шинжилгээ,

-Цэргийн төв эмнэлэгт тусгаарлагдсан 8 хүний шинжилгээ, 

-Алтанбулагийн боомтоор орж ирсэн ачаа тээврийн 32 жолоочийн шинжилгээ,

-Идэвхтэй тандалтын 2 хүний шинжилгээ,

-Сэлэнгэ аймагт тусгаарлагдсан 2 хүний давтан шинжилгээнээс коронавирус илрээгүй байна.

Монголд батлагдсан тохиолдол 291, эдгэрсэн хүн 225, одоо 66 хүн эмчлүүлж байна. Эдгээр хүмүүсийн биеийн байдлыг үнэлбэл 62 хүн хөнгөн, 3 хүн хүндэвтэр, нэг хүн хүнд байна. Ажиглалт, тандалт үргэлжилж байна. Халдвар хаммгааллын дэглэмээ сайн мөрдөхийг хүсье.