М.Батмөнх: Танихгүй хүмүүсээс ирэх урмын үгс бүхэл өдрийг аз жаргалтай болгодог

      Ихэнх эцэг эхчүүд сошиал медиа өсвөр насны хүүхдүүдэд буруу үлгэр дуурайлал үзүүлж хүүхдийн хүмүүжил төлөвшилд муугаар нөлөөлдөг хэмээн шүүмжилдэг. Сошиал орчин буюу фэйсбүүкт өсвөр насны хүүхдэд хэрэгтэй мэдээлэл огтхон ч байхгүй хэмээн хүүхдүүдээ зэмлэх нь олонтой.  Энэ үг худал биш ч гэсэн өөрсдийгөө “Z” үе гэж нэрлэх дуртай 20 насыг  хол давсан залуучуудын хажуугаар жинхэнэ “Z” үеийн төлөөллүүд хүч түрэн бидний хандлага, өдөр тутмын амьдралын хэв маягт нөлөөлөхүйц, хэрсүү ухаалаг үйлдлүүдийг хийж байна. “Z” үеийнхний төлөөлөл гэдэг нэрний цаана этгээд сонин хувцас, стиллээр гангарсан, өндөр цагаан, туранхай, өрөөнөөсөө гарах дургүй, компьютерийн хэт өндөр мэдлэгтэй өсвөр насныхан санаанд тань бууж байгаа болов уу.

Тэгвэл дэлхийн өнцөг булан бүрт сэтгэхүйн харилцан адилгүй түвшин, бие бялдар, харилцааны өндөр соёлоор хоорондоо ялгарах “Z” үеийнхэн өсөн, торниж байна. Магадгүй тэд үе хоорондын ялгаа “Х,Ү,Z” гэдгийн утгыг үл ойшоон өөрсдийн зам мөрөөр амьдарч байгаа. Зарим эрдэмтэд “Z” үеийнхэн л дэлхийг өөрчилнө хэмээн хэлсэн байдаг. Нэгэнт үүнийг эсэргүүцэхэд бэрх болжээ. 

М.Батмөнх хүүд ярилцах санал тавихад "Та түр хүлээгээрэй би хамтрагчтайгаа хамтдаа таны асуултанд хариулна" хэмээхэн хэрсүүхэн хариулж байлаа.

-“Өглөөний гайхамшиг” группийн хамгийн тууштай, идэвхтэй гишүүд өөрсдийгөө танилцуулаач?

- Биднийг М.Батмөнх,  Б.Батбилэг гэдэг.  Бид Дорноговь аймгийн Айраг суманд амьдардаг. Одоо есдүгээр ангид орно.

-Хэзээнээс эхэлж өглөө гүйх болов. Энэ санааг хэн гаргасан бэ?

-"Өглөөний гайхамшиг групп"-д ууланд  алхалт хийдэг нэг залуу байсан. Б.Батбилэг хамгийн анх тэр хүнээс санаа авч хэдэн хоног ганцаараа гүйсэн юм билээ. Найз маань энэ тухайгаа надад хэлсэн. Тэгээд л бид хоёр нэгдэж гүйдэг болсон. Хамтдаа гүйж эхлээд гурав дахь өдрөөс нь “Өглөөний гайхамшиг” группд пост оруулж эхэлсэн.  Хамгийн анхны  постыг зургадугаар сарын 26 нд оруулж байсан.

-Фэйсбүүкт өөрсдийн зурагтай постыг оруулах нь ямар ач тустай гэж бодсон бэ?

-Тийм гэж үү. Яагаад?

-Бид хоёрыг дэмждэг хүмүүсийн итгэлийг алдахыг хүсээгүй. Биднийг дэмжиж урмын үгээр тэтгэдэг маш олон хүн байдаг. Мөн биднээс үлгэр дуурайлал авдаг хүмүүс ч цөөнгүй байдаг байх.

-Хүмүүс та хоёрыг хэрхэн дэмждэг вэ. Бусдад ямар үлгэр дуурайлал өгч байна гэж боддог вэ?

-Биднийг урмын үгээр дэмжиж чатаар үргэлж сайн сайхан үгийг илгээдэг. Тэдгээр үгс нь бүхэл өдрийг аз жаргалтай, эрч хүчээр дүүрэн өнгөрөөхөд тусалдаг. Зарим хүмүүс үлгэр дуурайлал авч байгаагаа хүртэл хэлж, биднийг магтдаг. Бусдад  эрт босохын ач тус,  эх дэлхийгээ хайрлах, хогоо ил задгай хаяхгүй байх эрт босохдоо гадаад хэлийг мэдлэгээ дээшлүүлэх, ном уншихыг хүмүүст уриалдаг.

-Та хоёр заримдаа өөр хүүхдүүдтэй хамт гүйсэн харагддаг. Танай найзууд уу?

-Тиймээ. Тэд өөрсдөө бидэнд санал тавьдаг. Бид ч мөн хүүхдүүдийг хамт гүйхийг уриалдаг. Тэд бүгд манай сумын хүүхдүүд байрны хүүхдүүд бас манай ангийнхан манай найзын дүү нар заримдаа хамт гүйдэг.

-Өглөө хэдэн цагт босож байна?

- Өглөө 05:30 минутад босдог. Тэгээд 06:00 гэхэд гэрийнхээ ойролцоох овоо руу гүйдэг.

-Гэрээс чинь овоо хүртэл хэр хол вэ. Хэдэн минут гүйх үү?

-Манайхаас овоо хүртэл  500метрийн зайтай. З0 минут л гүйгээд очдог. Гэртээ буцаж ирээд ээж, аавынхаа ажилд тусалдаг.

-Өглөө эрт босох хэвшлийг дадал болгож, дасгал хөдөлгөөн хийснээр та хоёрт ямар өөрчлөлт үүд гарч байна?

-Бие бялдрын хувьд хөгжсөн. Бас цаг баримтлах болон эртэч болсон. Ярих чадвар, нийгмийн оролцоо нэмэгдэж өөртөө итгэлтэй болсон. Нээлттэйгээр хэн нэгнээс ичилгүй өөрийн зурагтай постыг оруулж, өөрсдийгөө чөлөөтэй илэрхийлж чаддаг болцгоосон. Аливаа зүйлийг өмнөхөөсөө сайн бас муу талаас нь өөрөөр харж,  ухаардаг болсон.

-Анх гүйж эхлэхэд шантрах үе байсан уу?

-Байнга "Өглөөний гайхамшиг" группт пост оруулах ёстой байсан  учраас шантрах үе байгаагүй. Хүмүүсийн итгэлийг алдахгүй байхыг маш их хичээсэн.

-Удахгүй хичээлийн шинэ жил онцгой нөхцөл байдалтай эхлэх гэж байна. Гүйлтээ цааш нь үргэлжлүүлэх үү?

-Цаг агаарын нөхцөл байдал,  өөрсдийн цаг заваас шалтгаална. Энэ хичээлийн жилд дунд ангиа төгсөх учраас шалгалт ихтэй байх болов уу. Тиймээс цаг зав хэр гарахаас шалтгаална.

-Та хоёрын ойрын зорилго, хүсэл мөрөөдөл юу вэ?

-Маш олон хүнийг нэгтгэж,  хамтдаа хөгжихийг эрмэлзэж байна. Цаашдаа жил бүрийн зун  хамтдаа гүйцгээнэ гэж бодож байгаа.