Хөдөлмөр, нийгмийн хамгааллын яамнаас Туркийн Хамтын ажиллагааны зохицуулах агентлаг/ТИКА/-тай хамтран “Ковид-19 цар тахлаас урьдчилан сэргийлэх, Хөдөлмөрийн аюулгүй байдал, эрүүл ахуй”-н сургалтыг 2020 оны наймдугаар сарын 31-нээс есдүгээр сарын 4-ний өдрийг хүртэл зохион байгуулж байна.
Энэхүү сургалтаар Турк улс Ковид-19 цар тахлын үед бизнес эрхлэгч, аж ахуйн нэгж байгууллагуудыг ажлын байраа хадгалж, үйл ажиллагаа хэвийн үргэлжлүүлэх өөрийн арга барил, туршлагыг хуваалцаж байна. Энэ нь Монгол Улсын Засгийн газрын 2020-2024 оны үйл ажиллагааны хөтөлбөрт тусгагдсан Ковид-19 цар тахлаас үүдэлтэй нийгэм, эдийн засгийн хүндрэлийг даван туулах бодлогын зорилттой уялдаж байгаа юм. Сургалтад оролцогчид Ковид-19 цар тахлаас урьдчилан сэргийлэх хүрээнд ажлын байранд зайлшгүй авч хэрэгжүүлэх ерөнхий болон үйлдвэрлэл, үйлчилгээний салбарын онцлогтой уялдсан арга хэмжээ, түүнийг хянах талаар Турк Улсын сайн туршлага, боловсруулсан арга аргачлалаас суралцана.
Тухайлбал, барилга, уул уурхай, эрчим хүч, хүнс, газар тариалан, шатахуун, хийн түлш, хөдөө аж ахуй, зочид буудал, тээвэр, нийтийн хоол, үсчин, гоо сайхан зэрэг үйлдвэрлэл, үйлчилгээний салбар тус бүрийн ажлын байрны онцлогтой уялдан коронавирусийн дэгдэлтээс хэрхэн хамгаалах талаар мэдлэг, мэдээлэл олж авах юм. Сургалтад Хөдөлмөр, нийгмийн хамгааллын яам, Мэргэжлийн хяналтын ерөнхий газрын хөдөлмөрийн болон хөдөлмөрийн эрүүл ахуйн байцаагчид, Хөдөлмөрийн аюулгүй байдал, эрүүл мэндийн төвийн мэргэжилтнүүд болон үйлдвэрлэл, үйлчилгээний салбар бүрээр аж ахуйн нэгж байгууллагын хөдөлмөрийн аюулгүй байдал, эрүүл ахуйн асуудал хариуцсан ажилтан, багш нарын төлөөлөл оролцож байна.
- Ковид-19-ийн хүрээнд ажлын байранд авах ерөнхий арга хэмжээ
- Шатахуун, хийн түлшний станцууд дахь ажлын байрыг коронавирусийн дэгдэлтээс хамгаалах
- Банкны салбар дахь ажлын байрыг коронавирусийн дэгдэлтээс хамгаалах
- Дуулдлагын төвүүд дэх ажлын байрыг коронавирусийн дэгдэлтээс хамгаалах
- Амны хөндийн болон шүдний эрүүл мэндийн төвүүд дэх ажлын байрыг коронавирусийн дэгдэлтээс хамгаалах
- Хог хаягдлыг цуглуулах бэлтгэх үйлчилгээ явуулдаг ажлын байрыг коронавирусийн дэгдэлтээс хамгаалах
- Гар аргаар тээвэрлэх зөөх ажил явагддаг ажлын байрыг коронавирусийн дэгдэлтээс хамгаалах
- Хамгаалалт, аюулгүй байдлын ажилтнуудыг коронавирусийн дэгдэлтээс хамгаалах
Сургалт өнөөдөр мөн үргэлжилнэ.
Сэтгэгдэл бичих