Барилга, хот байгуулалтын сайд Б.Мөнхбаатар Ховд аймагт ажилласан байна.
Тэрбээр тус аймагт баригдаж буй “Ховд үйлдвэрлэл технологийн парк”-ын дэргэдэх цэвэрлэх байгууламжийн барилга, угсралтын ажилтай танилцав.
Энд нийтдээ 100 га талбайг хамарсан малын гаралтай түүхий эд боловсруулах үйлдвэрлэлийн цогцолбор баригдах бөгөөд цэвэрлэх байгууламжаа эхэлж барьж байгаа аж. “Цогцолбор бүрэн ашиглалтад орох үед арьс шир, хаягдал яс, ноос, ноолуур угаах, самнах, өлөн гэдэс боловсруулах, адууны дэл, сүүл боловсруулах үйлдвэрүүд баригдана.
Түүнчлэн цогцолборыг дагасан оёдол, гутал, сүлжмэл, саван, сав баглаа боодлын зэрэг арав орчим жижиг, дунд үйлдвэр ажиллана гэж тооцож байгаа” хэмээн аймгийн Засаг дарга Б.Дүгэржав хэллээ.
Малын гаралтай түүхий эд боловсруулах үйлдвэрийн хувьд байгаль орчинд хор хөнөөл учруулахгүй байх, химийн хорт бодисыг хоргүйжүүлэх нь нэн чухал учраас хоногт 1500 шоометр бохир ус цэвэрлэх хүчин чадалтай цэвэрлэх байгууламжаа юуны түрүүнд барьж байгаа аж.
Хэдийгээр орчин үеийн, шинэ техник, технологи ашиглах гэж байгаа ч үйлдвэрийн бохир гэдэг бол онцгой хариуцлага шаарддаг ажил. Тиймээс манай яам энэ байгууламжийн угсралт, технологид мэргэжлийн хяналт тавьж, тусалж дэмжиж ажиллах болно гэж Барилга, хот байгуулалтын сайд Б.Мөнхбаатар хэллээ.
Энэ үеэр Б.Мөнхбаатар сайд Ховд аймгийн Газрын харилцаа, Барилга, хот байгуулалтын газрын дарга Э.Дөлбадрал болон бусад алба хаагчидтай уулзаж салбарын хууль тогтоомж түүний хэрэгжилт цаашид Монгол улсын засгийн газраас баримталж буй бодлого шийдвэрийн талаар чиг үүрэг өглөө.
Сэтгэгдэл бичих