Сөүл – Улаанбаатар чиглэлийн нислэгийн тариф буурах боломжтой

Шударга өрсөлдөөн, хэрэглэгчийн төлөө газарт иргэд, хэрэглэгчдээс “тусгай үүргийн нислэгийн тийзний тариф үнэтэй байна” гэх гомдлын дагуу “МИАТ” ТӨХК-иас гүйцэтгэж буй тусгай үүргийн нислэгүүдийн чиглэл тус бүрийн үнэ тарифыг хянан шалгаж дууслаа. Улсын онцгой комиссын шийдвэрийн дагуу “МИАТ” ТӨХК 2020 оны 3 дугаар сараас 9 дүгээр сарын хооронд нийт 11 чиглэлд 58 удаагийн тусгай нислэг үйлдсэн бөгөөд гадаад улсаас Монгол улс руу 17445 зорчигчийг тээвэрлэсэн байна. Уг тусгай үүргийн нислэгийг гүйцэтгэхдээ байнгын  нислэг үйлддэг чиглэлүүд нь өмнөх батлагдсан тарифыг мөрдөж байгаа бол шинэ чиглэлүүдэд нислэгийн зардлаас хамааруулан шинэ тариф тогтоосон байна.

Тусгай үүргийн шинэ чиглэлийн нислэг нь зөвхөн нэг талдаа зорчигч тээвэрлэх, нисэх буудлын газрын үйл ажиллагааны зардал, нислэгийн зөвшөөрөл авах, шатахууны зардлууд нь  жирийн үеэс үнэтэй байгаа тул тийзний үнэ өндөр дүнтэй гарсан байна. Тиймээс шууд зардлыг багасгахаас илүү шууд бус зардлыг хэмнэх боломжтой гэж үзжээ.

 Жишээ нь УБ-СӨҮЛ-УБ чиглэлийн хувьд шууд бус зардалд туссан зар сурталчилгааны зардал, ном, гарын авлага, бизнес лоунжын өртөг гэх мэт бусад зардлууд нь нислэгийн тарифын 17 хувийг эзэлж байна. Иймд дээрх шууд бус зардлыг бууруулснаар “Ковид-19” халдвар тархалтын үед эхний ээлжинд “МИАТ” ТӨХК-иас УБ-СӨҮЛ-УБ чиглэлийн тусгай үүргийн нислэгийн тийзний үнийг 300000 орчим төгрөгөөр бууруулах боломжтой гэж үзжээ.