УБЕГ: Хан-Уул дүүрэгт хууль зөрчсөн шилжилт хийгдээгүй

Хан-Уул дүүрэгт байрлах баригдаж дуусаагүй барилгад 500 гаруй иргэнийг шилжүүлсэн тухай гомдлыг ХУД-ийн АН-ынхан УБЕГ-т гомдол гаргасан. Уг асуудлаар УБЕГ-аас мэдээлэл өгөв. 

УБЕГ-ын Иргэний улсын бүртгэлийн газрын дарга Т.Нармандах  “УИХ-ын 2020 оны нэгдүгээр сарын 30-ны өдрийн чуулганы нэгдсэн хуралдаанаар аймаг, нийслэл, сум, дүүргийн иргэдийн Төлөөлөгчдийн хурлын сонгуулийн тухай хуулийг хэлэлцэн баталж, энэ оны хоёрдугаар сарын 14-ний өдрөөс эхлэн дагаж мөрдөж байгаа. Уг хуульд сонгогч шилжих тухай зохицуулалт байхгүй. Улсын хэмжээнд 2020 оны зургадугаар сарын 25-ны өдрөөс наймдугаар сарын 15-ны өдрийн хугацаанд нийт 47369 шилжилт хөдөлгөөний бүртгэл хөтлөгдсөнөөс аймагт 16559, нийслэлд 30810 шилжилт хөдөлгөөний бүртгэл хийгдсэн байна.

Тус байгууллагаас улсын бүртгэлийн үнэн зөв байдлыг хангах, түүнийг хянах үйл ажиллагааг тухай бүр хийж, улсын бүртгэлийн мэдээллийн санд тусгаж, шилжилт хөдөлгөөний бүртгэлд бүртгүүлсэн нотлох баримтыг цахимжуулж ажилладаг.

Хан-Уул дүүргийн хувьд дээрх хугацаанд бүртгэгдсэн шилжилт хөдөлгөөний бүртгэлийг шалгахад улсын бүртгэлийн эх нотлох баримт бичиг нь зөрчилгүй, бүрэн холбогдох хуулийн заалтыг зөрчсөн гэх үндэслэл байхгүй байна.

Түүнчлэн 2020 оны аравдугаар сарын 12-ны өдрийн байдлаар Хан-Уул дүүргийн 21 дүгээр хороонд байрлах 1051 байранд 37, 1052 байранд 10, 1054 байранд 5, 1055 байранд 1, 1057 байранд 1 нийтдээ 54 сонгуулийн насны иргэн шилжин ирсэн байна. Харин 1058 дугаар байранд шилжиж ирсэн оршин суугчдын тухай мэдээлэл байхгүй байна” хэмээлээ.