Өнгөрсөн долоо хоногт улстөрийн хувьд чухал үйл явдал болж өрнөлөө. Тодруулбал, Аймаг, нийслэл, сум, дүүргийн сонгууль болж, МАН үнэмлэхүй ялалт байгуулсан юм. Ингээд өнгөрсөн долоо хоногт болж өрнөсөн үйл явдлыг тоймлон хүргэж байна. 

МАН 8 дүүрэг, 13 аймагт, АН нэг дүүрэг 8 аймагт ялалт байгууллаа

Аймаг, сумын ИТХ-ын сонгуулиар өмнө нь АН хэзээ ч ялж байгаагүй аймгууд "цэнхэртэж", сонгуулийн үр дүн сонирхолтой өрнөлөө.  МАН-ын хувьд 13 аймагт ялалт байгууллаа. Харин АН 8 аймагт ялж байна. Тодруулбал, Архангай, Булган, Говь-Алтай, Дундговь, Өмнөговь, Сүхбаатар, Увс, Хөвсгөл аймагт Ардчилсан нам ялалт байгуулав. 

МАН-ын хувьд үлдсэн 13 аймагт яллаа. Гэхдээ үнэмлэхүй буюу дангаар засаглах хэмжээнд  Тодруулбал, Баян-Өлгий, Говьсүмбэр, Дорнод, Дорноговь, Өвөрхангай, Хэнтий, Дархан-Уул, Төв зэрэг аймгуудад ялалт байгууллаа. Зарим аймгуудад хамтарч засаглахаас өөр аргагүй байна.  Мөн орон нутгийн сонгуульд 16 бие даагч ялалт байгуулсан нь сонирхол татахаар үзүүлэлт байв.  Түүнээс гадна, МАХН орон нутагт 3, ШИНЭН 2 суудал авлаа.  

Харин нийслэлийн 9 дүүргийн 291 мандатын МАН 21, АН 75, ХҮН 10, МАХН 1, МНН 1, бие даагч хоёр хүн сонгогдлоо. 8 дүүрэгт МАН ялалт байгуулсан бол АН зөвхөн Сүхбаатар дүүрэгт яллаа.  

"Эрдэнэс Монгол"-ын захирлаар Д.Хаянхярвааг томиллоо

Мөн өнгөрсөн долоо хоногийн онцлох нэгэн томилгоо бол “Эрдэнэс Монгол” компанийн Төлөөлөн удирдах зөвлөлийн хурлын шийдвэрээр тус компанийн захирлаар ажиллаж байсан П.Ганхүүг чөлөөлж, түүний оронд Д.Хаянхярвааг томилсон үйл явдал байв. 

Д.Хаянхярваа нь МАН-ын бүлгийн дарга, УИХ-ын гишүүн, Сангийн сайдаар ажиллаж байсан билээ. 

Монгол Улсыг "Саарал жагсаалт"-аас гаргах саналыг 100 хувь дэмжив

Монгол Улсыг "Саарал жагсаалт"-аас гаргах эсэхийг шийдвэрлэх ФАТФ-ын Олон Улсын хамтын ажиллагааны Хяналтын бүлгийн хурал 2020.10.13-нд онлайнаар зохион байгуулагдсан. Сангийн сайд Ч.Хүрэлбаатарын мэдээлснээр, тус хурал дээр Монгол Улсад ирж ажилласан үнэлгээний багийн гишүүд тайлангаа танилцуулсан байна. Улмаар Монгол Улсыг “Саарал жагсаалт"-аас гаргах санал асуухад онлайн хуралд оролцож буй 100 гаруй орны төлөөлөгчдөөс нэг нь ч эсэргүүцэлгүй бүгд дэмжжээ.

Харин Монгол Улсыг "Саарал жагсаалт"-аас гаргах энэхүү шийдвэрийг аравдугаар сарын 21-нээс 23-нд болох ФАТФ-ын нэгдсэн хуралдаанаар баталгаажуулах юм.

ТЕГ-ын дарга асан Б.Хурц, Улсын Ерөнхий прокурорын орлогч асан Г.Эрдэнэбат нарын шүүх хурал хойшлов

Төр нийгмийн зүтгэлтэн, Дэд бүтцийн сайдаар ажиллаж байсан С.Зоригийн амийг бүрэлгэсэн хэрэгт ял шийтгүүлсэн Б.Содномдаржаа, Т.Чимгээ болон хохирогчийн эхнэр Б.Булган нарыг эрүүдэн шүүж, хүчээр хэрэг хүлээлгэсэн, Гүйцэтгэх ажлын тухай хууль зөрчсөн хэрэгт холбогдсон ТЕГ-ын дарга асан, хошууч генерал Б.Хурц, Улсын Ерөнхий прокурорын орлогчоор ажиллаж байсан Г.Эрдэнэбат нарын хүмүүст холбогдох давж заалдах шатны шүүх хурал энэ долоо хоногт болох байсан ч хойшилсон. Тодруулбал, өмгөөлөгч нь шүүх хурал давхацсан шалтгаанаар ийн хойшлуулжээ. 

Тэдэнд холбогдох хэргийн шүүх хурал өнгөрсөн долдугаар сард Төв аймаг дахь сум дундын Эрүүгийн хэргийн анхан шатны шүүхэд таван өдрийн турш үргэлжилж шийдвэрээ гаргасан. 

Тодруулбал,  Б.Хурц, Г.Эрдэнэбат, С.Баяр, Ж.Мөнхгал нарт гурав, Ү.Отгонбаяр, О.Бямбажав нарт хоёр, Э.Өлзийбаярт нэг жил хорих оноож, нээлттэй хорих ангид эдлүүлэхээр шийдвэрлээд гэм буруутайд тооцогдсон уг долоон хүний таслан сэргийлэх арга хэмжээг өөрчлөн цагдан хорьсон. Харин О.Бархасбадь, С.Эрдэнэбат нарыг шүүх хурлын танхимаас сулласан юм. 

Ш.Батхүү, Г.Алтан нарын есөн өдөр шүүсэн ч дуусаагүй, ирэх долоо хоногт үргэлжилнэ

 "Жаст"-ын Ш.Батхүү, "Алтжин" группын захирал Г.Алтан нарт холбогдох шүүх хурал энэ долоо хоногийн турш шүүв. Улмаар өнгөрсөн баасан гаригт 17.30 цагт завсарлаж, ирэх долоо хоногийн даваа гаригт дахин үргэлжлэхээр болжээ.

АТГ-аас "Жаст"-ын Ш.Батхүүг "Эрдэнэт" үйлдвэрийн 51 хувийг барьцаанд тавьж, гаднын "Стандарт" банкнаас их хэмжээний зээл авсан хэрэгт буруутгасан. Түүнтэй хамт "Алтжин" группын Ерөнхий захирал Г.Алтан, түүний хүү Э.Сүрэн нарыг нотлох баримтыг хуурамчаар үйлдсэн гэх үндэслэлээр яллагдагчаар татсан байдаг юм. 

Тодруулбал, тэднийг хуурамч бичиг баримт, тамга тэмдэг, хэвлэмэл маягт ашиглан гаднын "Стандарт" банкнаас 109 сая ам.долларын зээл авч, бусдад онц их хэмжээний хохирол учруулсан хэрэгт буруутган шүүж байгаа билээ. 

Оргодлын эрэн сурвалжилж байна

Энэ сарын 15-ны өдөр Өвөрхангай аймаг дахь ШШГЕГ-ын харьяа цагдан хорих 423-р ангид ял эдэлж байсан 33 настай этгээд зам засварын ажил хийж байхдаа оргон зугтаажээ. 

Тухайн хоригдол нь Эрүүгийн хуулийн тусгай ангийн 17.1.2, 17.1.3, 17.1.4 буюу хулгайн хэргээр ял эдэлж байсан бөгөөд 6.8 жилийн хорих ял сонсч, ихэнх хугацаагаа эдлээд байжээ. 

Уг хоригдлыг эрэн сурвалжилж байна.