Сингапур карантин

     Улаанбаатараас хөөрсөн МИАТ-ын агаарын хөлөг Токиод газардахад манай онгоцны үйлчилгээний багийнхан бүгдээрээ масктай, нүдний шилтэй, тэгээд гадуураа бүтэн биеийн хамгаалалтын цагаан хувцас баг өмссөн нь сонин содон харагдав. Сансрын нисгэгчид ч юм шиг, аль эсвэл өвчний голомтоос ирж байгаа ч юм уу гэмээр. Гэтэл Монгол Улс маань дотооддоо ковид алдаагүй цөөн орны нэг байдаг. Тиймээс давхар хамгаалах нарийн ухаан байхыг үгүйсгэхгүй.

Биднийг угтсан Наритагийн онгоцны буудлынхан ердийн хувцастай, масктай, эсвэл шүлс үсрэхээс хамгаалсан шилэн хамгаалалт зүүсэн байв.

Цаашаа Сингапурт очоод карантинд байсан хүний хувьд ажигласнаа сийрүүлье. Авах гээхийн ухаанаар хандана биз. Сингапурын онгоцны буудал нээлттэй, агаарын тээвэр хэвийн нислэг үйлдэж байгаа боловч коранавирусын дэгдэлтээс ингэж хамгаалж байна. Сингапур руу иргэд, байнгын оршин суугчид нь чөлөөтэй нэвтрэх боловч ирээд гэртээ 14 хоног тусгаарлагдана. Бусад хүмүүс урьдчилсан зөвшөөрлөөр зорчих бөгөөд бэлтгэсэн тусгаарлах байранд \4-5 одтой зочид буудалд\ 14 хоног тусгаарлагдана. Энэ тухай товч өгүүлье.

• Зорчигчид хил нэвтрэхээс өмнө Гаалийн мэдүүлэг гэдэг шиг он-лайнаар Эрүүл мэндийн деклараци бөглөх хуультай болж. Түүнд хувийн мэдээллээс гадна, ирэхээсээ 6 хоногийн  дотор Өмнөд Америк, Африкт зорчсон эсэх, сүүлийн 14 хоногт өөр ямар улсаар явсан, мөн биед халуун, ханиад, нус гоожих, хоолой хөндүүрлэх, үнэр мэдрэхгүй, амьсгал давчдах шинжтэй эсэх, ковидоор өвдсөн хүнтэй сүүлийн 14 хоногт контактад орсон эсэх, сүүлийн 14 хоногт эмнэлэгт очсон эсэх,  ямар нэгэн өөр эрүүл мэндийн хүндрэлтэй эсэх, сүүлийн 7 хоногт Чонгчинг, Гуандунг, Жиангсү, Шанхай, Тянжин болон Жежианг-аас өөр газарт зорчсон эсэх зэргийг асуух бөгөөд худал хэлбэл Халдварт өвчний тухай хуульд заасны дагуу зөрчлийн шинж байдлаас хамаарч 10-20 мянга хүртэл сингапур доллараар торгох буюу 12 хүртэл сараар хорих шийтгэлтэй болохыг сануулна.
• Ирсэн хүн бүр заавал орон нутгийн гар утастай байх ёстой. Ямар чухал хэрэгтэйг хожуу мэдэв.
• Тусгаарлагдах байрны төлбөр дээр нэг удаагийн ковидын шинжилгээний үнэ 200 сингапур доллар нэмж шилжүүлнэ. /Америк доллараар бол 145 орчим/
• Онгоцны буудал руу орох зам дээр зорчигчдын халууныг зайнаас хэмжиж, ердийн журмаар оруулна.
• Онгоцны буудалд хил нэвтрэх баримт бичгээс гадна дээр дурдсан Эрүүл мэндийн деклараци бөглөсөн эсэхийг чанд шалгахаас гадна зургаа авхуулна. Энгэрт чинь таних өнгийн цаас нааж, дотогш оруулна.
• Зорчигчид ачаа тээшээ аваад нутгийн хүмүүс нэг хаалгаар гарах ба энгэр дээрээ таних тэмдэг наалгасан зорчигчдыг тусад нь коридорт 1-2 метрийн зайтай суудал бүхий талбайд цуглуулна.  Нэг онгоцоор ирсэн хүмүүс цугламагц автобусанд мөн зайтай зассан суудалд суулгаж хөдөлнө.
• Тусгаарлах байр буюу зочид буудалд ирээд цуварч автобуснаас гарах бөгөөд онгоцоор ирсэн чемодан, ачааны бариулыг ариутгаж харагдана. Ариутгаж байгаа хүмүүс ердийн хувцастай бөгөөд харин масктай, маскны гадна талд шүлс үсрэхээс сэргийлсэн тунгалаг халхавч давхар зүүсэн байв.  Биднийг буудал руу ороход мөн л зайнаас халуун хэмжиж оруулав
• Бид 2 метрийн зайтай цуварч явсаар 2 давхарт гарахад мөн л хоорондоо 1-2 метр зайтай сандал суудал зассан байв. Нэг нэгээр дуудаж бүртгэн, тусгаарлах байранд ямар хоол \цагаан хоол, сахаргүй хоол, халал гэх мэт\ идэж байх захиалга авч, тусгаарлах байрны дэг журам танилцуулж, хүн бүрт халууны шил өгнө. Утсан дээр Тусгаарлах байр \Homer\ гэсэн апликейшн суулгуулав.
• За ингээд өрөөндөө 14 хоног түгжигдэнэ. Өдөрт халуунаа 3 удаа хэмжиж, суулгасан апликейшн рүү явуулна. Ингэхдээ тухай бүр өөрийнхөө зургийг сельфидэж явуулахаас гадна нус, цэр, хоолойн өвчний шинж тэмдэг байгаа эсэх асуултад 3 удаа хариулна. Халуунаа хэмжихээ мартчихвал утсан дээр чинь суулгасан апликейшн сануулга өгнө. Цагтаа мэдээлэл өгөхгүй, аль эсвэл худал мэдүүлбэл ямар хариуцлага хүлээлгэхийг давхар сануулна.
• Хоол. Захиалсан хоол, цагаан хэрэглэлийг үүдний гадна тавцан ширээн дээр гялгар сав, уутанд хийгээд тавина. Хонх дарж дохио өгчхөөд яваад өгнө.
• Хоолны бохир, хэрэглэсэн алчуур зэргээ өдөрт нэг удаа үдийн хоолны дараа гаргаад үүдэнд тавьчихна. Цаанаас ирээд аваад явна.
• 9 хоносны дараа Ковид-19-ийн шинжилгээ авав. Хариу нь мессэжээр ирнэ.
• Өдөр бүр гаднаас болон зочид буудлаас утас руу чинь залгаж, биеийн халуун хэд байгааг асууна. Ингэхдээ тэр хүн өөрөө мөн эсэхийг давхар лавлана. Жишээ нь, таны паспортын дугаар, төрсөн өдөр юу билээ гэх мэтээр лавлана.
• Зочид буудлын өрөөний түлхүүр нэг удаагийнх. Өрөөнөөс гарсан л бол дахиж хаалга онгойхгүй. Ковидын шинжилгээг өөр давхарт авахдаа хэн шинжлүүлж байгааг бас л янз бүрийн асуултаар давхар лавлах бөгөөд өрөөний шинэ түлхүүр өгнө.
• Ковидын шинжилгээ сөрөг гарахаар утсаар баяр хүргэх бөгөөд буудлаас хэзээ, хэдэн цагт гарахыг хэлнэ. Тусгаарлагдсан хүмүүсийг цувуулж гаргана.
• Зочид буудалд меню харж тусгай хоол захиалж болно. Цэвэрлэгээнд хувцас хунараа өгч болно. Мэдээж нэмэлт төлбөртэй.
• Тусгаарлах байранд эхний үед нэг удаагийн халбага, сэрээ өгч байснаа буудлын нэр лого-той саванд хийсэн халбага, сэрээ, савх, хутганы багц өгөв. Гарахдаа авч явж болно гэв. Манайхан ч гэсэн гадуур хоол унд идэх хувийн хэрэгсэлтэй явдаг болчихвол зөв юм шиг санагдав. Манай өвөг дээдэс өөрийн аяга, хутга, савхтай явдаг байсны нэг учир нь өвчин тахлаас сэргийлэх байсан биз ээ.
• Биднийг Шангрила зочид буудалд тусгаарласан бөгөөд ердийн тарифын тал үнэ авсан байна лээ. Энэ буудал нэг жигүүрээ тусгаарлагдах хүмүүст зориулж, тусгай хаалгаар оруулсан бөгөөд гарахад ердийн журмаар нийтийн хаалгаар гаргав. Нөгөө жигүүр нь нийтэд хэвийн үйлчилж байлаа.
• Тусгаарлагдсан буудлаас гараад гудамжинд нэг сайхан цээж дүүрэн амьсгална даа гэж бодож байтал үгүй аж. Хэдийгээр зуны өдөр, нэмэх 30 хэм халуун байгаа ч  бүх хүн маск зүүнэ. Хуультай, зөрчвөл шийтгэлтэй.

Гадна амьдрал

• Ямар ч байгууллага руу орох, дотор нь ороод үйлчлүүлэх цех, тасаг болгонд Гар утсаараа Орох \Check-In\ гэсэн бичиг бүхий QR код уншуулж заавал бүртгүүлнэ. Дараа нь зайнаас  биеийн халуунаа хэмжүүлэх ба хэвийн бол дотогш орно. Цаг алдах, бөөгнөрөх шалтаг шалтгаан алга. Дэлгүүр, буудал зэрэг олон хөлийн газарт бүртгүүлэх код уншуулах цаас бүхий самбар дараалуулаад хэд хэдийг тавьсан байх тул цаг алдах зүйл үгүй.
• Тухайн байгууллагаас гарахдаа Гарах гэсэн код уншуулах аж. Харин энэ шаардлагыг албадсан, хянасан хүн үл харагдана. Тийм болохоор тэр болгон хүмүүс сахидаггүй мэт санагдав. Хаана орсныг нь мэдэх илүү практик ач холбогдолтой болов уу. Орсон юм чинь гарах нь тодорхой.
• Энд маск зүүгээгүй хүн ганц ч харагдсангүй.

Зай барих

• Энэ улс чанга хөл хориогоо 7 сард цуцалж, бизнесийн үйл ажиллагаа, амьдрал хэвийн горимд шилжжээ. Гэхдээ хүн бүр маск зүүх, бүртгүүлэх гэх мэт дээр дурдсан шаардлагаас гадна зай барих \social distance\ дэг журам мөрдөх болжээ. Сандал, суудлыг зайтай тавих, гар барихгүй байх, касс, лифт зэрэг газар хүмүүсийн гар хүрэх газарт Ариутгагч шингэн тавьсан байх аж.
• Хүмүүс биеэрээ аль болох контактанд орохгүйг хичээх болсон нь ажиглагдана. Гар барих, тэврэлдэх, үнсэлцэх явдал лав гудамжнаас арилжээ.

Хамтдаа мөшгөх

• Хэрэв та хүсвэл гар утсан дээрээ Хамт мөшгөе \TraceTogether\ гэдэг апликейшн суулгаж болно. Тэгвэл танд ковидоор өвдсөн хүн ойртвол танд дохио өгнө гэнэ. Бодоход, ковидоор өвдсөн хүмүүс утсан дээрээ нэг апликейшинтэй явах шаардлага, хуультай бололтой. Бодууштай, авууштай.

Сингапурын туршлагыг дэлгэрүүлэхэд манайхан апликейшний программыг дор нь бичих байх. Харин хүн бүр ухаалаг утасгүйн бэрхшээл гарна. Гэхдээ  шийдэж болох л асуудал. Тахалаас сэргийлэх шалгарсан арга бол мэдээж карантин. Монголчууд бид бусдыг сармагчин шиг дуурайх албагүй ч гэлээ ухаалаг карантин тогтоогоод ард иргэд нь ч дэг журмаа сахиад ажил төрлөө хэвийн явуулбал дэлхийд нүүрлэсэн ковидын аюулаас сэргийлж,  хохирол багатай давж чадах биш үү.