2022 оны 1-р сарын 13
16 цаг 43 минут

Д.Уранчимэг: Дүрслэх урлагийн академиа хөл дээр нь босгох мөрөөдлөө биелүүлсэндээ баяртай байгаа

Дүрслэх урлагийн академи дээд сургуулийн захирлын үүрэг гүйцэтгэгч, Европын Урлагийн сургуулиудын холбооны Удирдах зөвлөлийн гишүүн, доктор, профессор Д.Уранчимэгтэй ярилцлаа.

-Урлагийн салбар маань өөрөө гэгээн, нандин. Гэвч та бид хоёр өнөөдөр арай хүндхэн сэдвээр ярилцах гэж байна. Таныг захирлын суудлаасаа огцрохыг шаардаж, багш нарын төлөөлөл БШУЯ-ны үүдэнд жагслаа. Үнэхээр ингэж яамны үүдэнд жагсталаа асуудал хурцадсан юм уу?

-Би энэ сургуулийн захирлаар 2013 оноос СУИС-ийн Дүрслэх, дизайн урлагийн сургууль байх үеэс нь ажиллаж эхэлсэн. Ингээд 2020 оны 12 дугаар сараас сургууль маань СУИС-аас тусгаарлаад, Дүрслэх урлагийн академи болж, захирлын үүрэг гүйцэтгэгчээр томилогдсон. Энэ сургууль маань төрийн өмчит сургууль. Төрийн өмчийн сургууль учир төлбөрийг өндөр тавьдаггүй. Өнөөдөр манай сургуульд 430 оюутан суралцаж байгаа. Оюутнуудын төлбөр дээр голлон үйл ажиллагаагаа явуулдаг, мэргэжлийн урлагийн боловсрол олгодог ийм л сургууль. Бусад сургуулиудтай харьцуулахад оюутан цөөтэй, ийм л цомхон. Гэтэл сургуулийг маань авахаар зохион байгуулалттай хэсэг бүлэг нөхөд л энэ бүхнийг зохион байгуулж байна гэж хардаж байна. Манай сургууль оюутнууддаа боловсрол олгодог болохоос бус хэн нэгний ашиг олох хэрэгсэл болох учиргүй. Тийм учраас би сургуулиа бизнестэй хутгахыг хүсэхгүй байна. Уулзъя гэхээр эдгээр багш нар маань ирдэггүй, гэсэн атлаа бичиг бариад гүйгээд байдаг. Үнэхээр би энэ сургуулийг хүлээж аваад нураачихсан бол ажлаа өгөхөд татгалзах зүйл алга. Ямар үндэслэлээр огцруулах гэж байгаа юм гэхээр тэдэнд тодорхой хэлэх юм байдаггүй. Гэсэн атлаа л Уранчимэгийг огцруулъя гээд яваад байдаг. Өнөөдөр манай сургуулийн урдаа барьдаг хэдэн багш нар маань бүгд гадаадад мэргэжил мэдлэгээ дээшлүүлээд явж байна. Ингээд үлдсэн хэдэн багш нар маань өөрсдийгөө хөгжүүлэхийн оронд цүнх барьдаг хэдэн хүний гар хөл болоод явж байгаа нь харамсалтай байна. Түүний оронд номоо бичээд, докторын ажлаа хийгээд, уран бүтээлээ туурвиад явбал хэн хэнд нь хэрэгтэй байна.

-Таныг энэ сургуулийг удирдсанаас хойш өнгө төрх нь илт өөрчлөгдсөн гэж уран бүтээлчид ярьдаг юм билээ, би хүртэл сая орж ирэхдээ хөгжлийн бэрхшээлтэй иргэдийн шат яг л ийм стандарттай байх ёстой юм байна гэж үүдний шатыг харж байлаа?

-Захирлын албан тушаалыг авснаас хойш сургуулиа шинэчилье, өөрчилье гэж их зүтгэсэн. Өмнө нь дөрвөн жил нэг багшийн удирдлага дор, зөвхөн тэр багшийн үгийг сонсоод төгсдөг байсан бол шинэ хөтөлбөрөөр нэгдүгээр курсдээ дүрслэх урлагийн үндсэн суурь болох уран зураг, зураасан зураг, уран баримал, дизайн гээд үндсэн сэдвүүдээ үзээд хоёрдугаар курсдээ мөн олон багшаас номын дуу сонсоод, 3-4 дүгээр курсдээ дипломоо бичдэг ийм хэлбэр рүү шилжүүлсэн. Энэ шилжилт маань тийм амар байгаагүй. Ер нь их сургууль гэдэг утгаараа багш нар нь докторын зэрэгтэй байх ёстой. Гэтэл манай сургуульд докторын зэрэгтэй хүн ховор. Гадаад хэлээр илтгэлээ тавьдаг, эрдэм шинжилгээний хуралд оролцдог, эрдмийн зэрэг цолтой багш нартай байх шаардлагатай. Харин манай багш нарын хувьд учир дутагдалтай байсан учраас багш нараа гадаадад мэргэжил дээшлүүлэх хэрэгтэй юм байна гэж хамгийн түрүүнд шийдээд ажил хэрэг болгож эхэлсэн. XX зууны урлагийн боловсрол багш төвтэй байсан бол XXI зууны урлагийн боловсрол оюутан төвтэй, тэр хэрээр багшид тавих шаардлага өндөр болсон. Өнөөдөр манай сургуульд элсч орж ирж байгаа хүүхдүүд англи хэлтэй байдаг учир багш нартайгаа нэг агаараар харилцаж чадахгүй болж байна. Хэлээ ашиглаад гадаадын сайтууд дээрээс мэдээлэл уншиж байна, сэтгэлгээ нь задгай байна. Нэг үгээр багшаасаа илүү мэдлэг мэдээлэлтэй болчихож байгаа юм. Гэтэл багш нар маань гадаад хэл байхгүй, нэмж суралцахгүй болохоор оюутнууддаа гологдоод ирэхээр шавьгүй болж ирж байна. Ингээд багш нараа чанаржуулахын тулд гадаад, дотоодын олон сургалтуудад хамруулж эхэлсэн. Дортмундын их сургуультай фото урлагийн чиглэлээр, Австрийн Венийн их сургуультай сэргээн засварлах хөтөлбөрөөр, Оросын академитай урлаг судлалын чиглэлээр хамтын хөтөлбөртэй. Одоо араас нь мөн уран зураг, уран баримлын хамтын хөтөлбөртэй болохоор хүсэлтээ хүргүүлсэн байгаа. Мөн багш нараа Австри, Герман, Америк, Япон, БНСУ, Сингапур, Хятад руу урт, богино хугацааны сургалтанд хамрууллаа. Ингэснээр Монголын дүрслэх урлагийг олон улсын түвшинд хүндэлж, улмаар уран бүтээлчид, оюутнууд маань дэлхийд гарах боломж нээгдэж байна. Бид нарын 2013, 2014 онд хийсэн шинэчлэл хөтөлбөрийн үр дүн маань одоо эхнээсээ гарч байна. Монголын дүрслэх урлагийн боловсролын салбарт гадаадын тэтгэлэг хөтөлбөрт ингэж өргөнөөр хамруулж байсан түүх байхгүй. БНХАУ руу докторын сургалтад 3, ХБНГУ- 1, Унгарт-2, Солонгост-2, Америкт-1 багшаа явуулсан, эхнээсээ төгсөж ирж байна. Дүрслэх урлагийн салбар маань залуу эрдэмтэн багш нараар шинэчлэгдэж байгаад баяртай байдаг. Бид дотоодод төгссөн боловсон хүчнээрээ явахаар өнөөдөр дэлхийд гологдож байна. Гадаадын багш нар ирээд “Танай багш нар англиар ярьж чадахгүй байна, ур чадвар муу байна” гэж голдог. Ийм үг сонсоход надад хэцүү байсан. Иймд миний зүгээс багш нараа дэлхийн хэмжээнд хүргэх гэж нар, оюутнуудаа гадаадын хөтөлбөр сургалтуудад хамруулсан.

-Та ингэж сургуулийнхаа, дүрслэх урлагийн салбарын төлөө чармайлт гаргаад байдаг. Гэтэл яагаад багш нар чинь таныг огцрохыг шаардах болов оо?

- Би багш нартаа докторын судалгаагаа хий, докторын зэргээ хамгаалаач ээ гэж шаардлага тавьдаг. 2020 онд оюутнуудаас авсан сэтгэл ханамжийн судалгаагаар 68 хувь нь багшийгаа голсон байдаг. Учир шалтгаан нь одооны хүүхдүүдийн мэдлэг, хүсэл багш нарын өгч байгаа мэдлэгээс илүү давсан байна. Гэтэл багш нар уламжлалт аргаараа хичээлээ заасан болоод явдаг. Харин энэ байдал нь багш нараасаа залхах, багш нараа голох асуудал гарсан. Өнгөрсөн хоёр жилийн хугацаанд цар тахлаас болж хичээлүүд цахимаар ороход эцэг эхчүүдээс хүртэл гомдол ирсэн. Багш нар нь хичээлээ заахгүй байна, цагтаа орж ирэхгүй байна, хичээлээ орохгүй байна, гэсэн атлаа багш нар цалингаа аваад яваад байсан. Энэ асуудалтай тэмцсэн. Зарим нь ойлгосон ч өөрийгөө хөгжүүлэхгүй байна. Ингээд өөрсдөө буруугаа эрэх байтал бусдаас эрж, эцэс сүүлдээ удирдлагаа буруутгаж байна.

-Таныг диплом худалддаг гэж буруутгасан байсан, оюутнуудын бүтээлийг худалдах боломж байдаг юм уу?

-Манай дүрслэх урлагийн оюутнууд дипломоо уран бүтээлээрээ хамгаалдаг. Намайг захирлын ажлыг хүлээж авахад өмнөх захирлаас ирсэн нэг ч диплом хүлээж аваагүй. Манай сургууль 2014, 2018, 2021 оны “Диплом худалдах, зарах журам”-ыг баталж гаргасан. Энэ журмын дагуу Захиргааны зөвлөл хуралдаж, шийдвэрээ гаргадаг. Манай сургууль СУИС-ийн харьяанд байсан учир зарим диплом тэндээ үлдсэн. Бослого гаргаад байгаа багш нар маань намайг өнгөрсөн жил АТГ-т хүртэл шалгуулсан. АТГ-аас манай сургууль дээр ирж шалгаад, 382 дипломын ажил байгааг тоолж шалгаад явсан. Холбоо харилцаатай байгууллагадаа бэлэглэх, гадаадын хамтын ажиллагаатай сургуульдаа бэлэглэх, сургуулийн орчныг тохижуулах гэх мэтэд зарим зургаа өгдөг. Гэхдээ энэ бүхнийг Захиргааны зөвлөлийн хурлаар шийдвэрлэж, протокол үйлддэг. Тэгэхээр энэ асуудлыг би ганцаараа шийдэх асуудал огт байхгүй, тэр ч байтугай худалдах ямар ч боломжгүй.

-Эсэргүүцлийн жагсаал хийсэн нэг хүн маань эрэн сурвалжлагдаж байсан гэсэн мэдээлэл байна, энэ хэр үнэний ортой вэ?

-Манай сургуульд Дотоод хяналт шинжилгээ, чанарын баталгаажуулалт хариуцсан мэргэжилтнээр 2021 оны 10 дугаар сарын 18-ны өдрөөс Э.Нинжин нь туршилтын 3 сарын хугацаагаар томилогдон ажилласан. Э.Нинжин нь 2021 оны 11 дүгээр сарын 17-ны өдөр “Норпей Арт галлерей”-д уран зургийн үзэсгэлэн худалдаа гаргах маркетингийн ажлыг хариуцан гүйцэтгэсэн. Тус ажлын хүрээнд сургуулийн урлангаас нийт 76 ширхэг уран зургийг авч яван, Уран зургийн үзэсгэлэн гаргасан. Үзэсгэлэн буух үед бүтээлүүд зарагдаагүй байсан. Зарагдаагүй бүтээлүүдээ тоо ёсоор нь авч ирж сургуулийн няравт тушаах хэрэгтэй гэж үүрэг даалгавар өгсөн. Гэтэл 25 ширхэг уран зургийг буцаан өгөөгүй, зөвшөөрөлгүйгээр авсан бөгөөд энэ талаар бид тооллого шалгалт явуулсны үндсэн дээр олж илрүүлсэн болно. Э.Нинжинд энэ талаар өөрт нь хэлэхэд маргааш өдрөөс нь ажилдаа ирээгүй бөгөөд сургуулийн зүгээс уран бүтээлүүдээ алдсанд гомдолтой байгаа учир Э.Нинжинг Сүхбаатар дүүргийн Цагдаагийн 2 дугаар хэлтэст гомдол гаргасан. Уг гомдлын дагуу өнөөдрийг хүртэл эрэн сурвалжлагдаж байсан хүн эсэргүүцлийн жагсаал зохион байгуулж яваа нь ямар нэгэн зохион байгуулалттай хэрэг гэж хардахад хүргэж байна.

Гэтэл энэ хүн маань залилангийн хэргээр эрэн сурвалжлагдаж байсан этгээд болохыг сургууль дээр цагдаа нар ирж, баривчлахад л бид мэдсэн. Одоо манай сургуульд огт хамааралгүй болсон хүн атлаа өнөөдөр манай сургуулийг төлөөлж, жагсаал зохион байгуулж, хамт олныг хагаралдуулж явааг хараад маш их гайхаж, бас харамсч байна.

-Та тэдний шаардсанаар ажлаа өгөх үү?

-Албан тушаал мөнхийнх биш ээ. Авч байсан шигээ нэг л өдөр өгөх болно.

Гэвч би энэ сургуулиа босгоно гэж зүтгэж, өдөр шөнөгүй нойр хоолгүй зүтгэж ажилласан. Дүрслэх урлагийн салбарын ийм олон докторууд нэгэн зэрэг гадаадад сурч байгаагүй, хэзээ ч ийм дүрслэх урлагийн салбар ийм олон гадаадын хөтөлбөрүүдтэй хамтын ажиллагаатай байгаагүй, гадны төсөл хөтөлбөрт уран бүтээлчид, зураачид маань хэзээ ч ингэж олноороо хамрагдаж байгаагүй юм билээ. Тэгэхээр би энэ их оюуны хөрөнгө оруулалтыг хийж чадсандаа өөрөөрөө бахархаж байна. Мөн энэ сургуулийг эрүүл орчинтой болгох хөрс суурийг нь тавьсандаа баяртай байна. Надад хулгай хийж, худал ярьж, бусдын юмыг өөрийнх мэтээр болгох хүмүүжил, боловсрол байхгүй. Урлаг судлаач хүнийхээ хувьд Монголын урлагийг хөгжүүлэх юмсан, дэлхийн хэмжээнд суурийг нь тавиад, холбоод өгөх юмсан гэсэн итгэл үнэмшил байдаг. Нүүдэлчдийн сэтгэлгээ, урлагийн философи гэдэг дэлхийд гайхагдаж байна. Нүүдэлчдийн сэтгэлгээ задгай сэтгэдэг бол барууных хайрцаглагдсан байдаг. Монголчууд юмыг давж сэтгэж чаддаг. Иймд Монголын урлагийг эрдэм шинжилгээний эргэлтэд оруулах, монгол зураг, монгол сийлбэр, монгол керамикаа патентжуулж авах нь маш чухал. Урлаг судлаачийнхаа хувьд би энэ бүхнийг маш өөдрөгөөр хардаг. Монголын Дүрслэх урлагийн түүх ялангуяа монголын эзэнт гүрний түүхийг бид хойч үедээ өвлүүлэн үлдээх ёстой. Тиймээс бид Хятад, Перс, Төвд, Санскрит, Англи, Франц болон бусад гадаад хэлтэй судлаач багш нар их шаардлагатай. Энэ утгаараа дэлхийн маш олон орны багш эрдэмтэн судлаачидтай хамтран төсөл хөтөлбөр дээр ажиллах шаардлагатай байна.

-Дүрслэх урлагийн академийн ойрын хийх ажлын төлөвлөгөөнөөсөө сонирхуулна уу?

-Дүрслэх урлагийн академиас 2022 ондоо БШУЯ, ШУТ-ийн сангийн дэмжлэгтэйгээр Репины Академийн дэг сургууль Монголын Дүрслэх урлагт төслийг хэрэгжүүлэн эрдэм шинжилгээний хурал болон үзэсгэлэн зохион байгуулах, ном товхимол бичих гэх мэт олон ажлыг хэрэгжүүлж байна. ОХУ-ын 265 жилийн түүхтэй И.Е.Репины Академийг 1952 оноос өдийг хүртэл 70 гаруй монгол хүн төгссөн бөгөөд тэднээс олонхи нь манай академид үеийн үед багшилж, одоо ч мөн энэ сонгодог академик дэг сургуулийг монголынхоо хөрсөн дээр буулган олон шавь нар бэлтгэж гаргаж байгаа билээ. Жишээ нь, манай багш нараас уран барималч, доктор С.Бадрал нь 100 гаруй дээд боловсролтой мэргэжилтэн уран бүтээлч төгсгөсөн байна, уран зураач, урлаг судлаач, доктор Эрдэнэцог 200 орчим дээд боловсролтой мэргэжилтэн төгсгөсөн байгаа зэрэг нь монголын дүрслэх урлагийн боловсролд оруулж байгаа том хувь нэмэр юм. XXI зуунд мэдээж академик боловсрол хувьсан өөрчлөгдөж буй. Жишээ нь ХБНГУ-ын Берлин хотод Европын дүрслэх урлагийн 9 академи нэгдэн зайн сургалтыг илүү чухалчлан хөгжүүлж байна. Орос болон Хятадын академиуд заах арга зүйн хувьд илүү уламжлалт академик дэг сургалтыг хөгжүүлж байхад Америк болон Англи, Нидерландын урлагийн академиуд илүү их дизайн, инноваци, маркетинг тал дээр түлхүү ажиллаж байна. Бид 2022 оны 04 сард Олон улсын эрдэм шинжилгээний хурал хийж, дээрх орны дүрслэх урлагийн академиудаас эрдэмтдийг урьж XXI зууны академик боловсрол цаашдын чиг хандлагыг ярилцах гэж байна. 2022 оныг бид хөтөлбөрийн шинэчлэлийн жил гэж зарласан бөгөөд энэ ажил дээрээ бид багш нартайгаа хамтран ажиллаж, өөрийн онцлогт нийцсэн академик хөтөлбөрийг гарган хэрэгжүүлэх болно. 2021 онд Польшийн уран зургийн академи болон Бельгийн академитай хамтран ажиллахаар тус тус гэрээ зурсан ба энэ жилдээ багш оюутан солилцоо хөтөлбөрийг хэрэгжүүлэх гэж байна. Мөн хамтарсан уран бүтээлийн үзэсгэлэнгүүд зохион байгуулах юм.

БШУ-ны сайд Л.Энх-Амгалан их дээд сургуулиудын хөтөлбөрүүдийг чанаржуулах, түүнчлэн багш нарын сургалт, арга зүйг сайжруулах тал дээр илүү түлхүү ажиллаж байгаа нь бидний зорилго, бодлоготой дүйцэж байгаа юм. Засгийн газрын “Алсын хараа-2050” урт хугацааны хөгжлийн бодлогыг дэмжиж уялдаа холбоотой ажиллахаар мастер болон стратеги төлөвлөгөөндөө тусгасан болно. Төр засаг биднийг дэмжин Дүрслэх урлагийн академи болгож өгснийг цаашдын хөгжлийн том алхам гэж харж байна. Мөн бидний ойрын зорилт бол XXI зууны урлагийн боловсролын хөтөлбөрийн дагуу жинхэнэ бүтээлч, соён гэгээрүүлэгч уран бүтээлч мэргэжилтэн бэлтгэхэд зориулагдсан, дүрслэх урлагийн мэргэжилтнүүд бидний онцлогт тохирсон урлангийн байр, дотуур байр, боловсролын кампус бүхий сургуулийн байртай болох бөгөөд энэ нь гадаад дотоодын хамтын төсөл хөтөлбөрүүдийг хэрэгжүүлж, олон улсын хамтын ажиллагаагаа өргөжүүлэх боломжийг олгох юм.

Т.Баярмаа

4
АНХААРУУЛГА: Уншигчдын бичсэн сэтгэгдэлд zaluu.com хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан бөгөөд мөн IP хаяг ил гарсан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

4 сэтгэгдэлСэтгэгдэл бичих

202.9.46.147зочин   • 1 сарын 14. 19 цаг 14 минут

Сонинтогос та 2 багш оюутны бүтээлийг зарж баяжсан юм биш үү

192.82.66.173Зочин   • 1 сарын 14. 9 цаг 15 минут

munch mulguu hyyhen bna shyy.

66.181.182.243Зочин   • 1 сарын 14. 7 цаг 59 минут

Багш нарын зургуудыг зарсан юм биш биз. Цаана чинь зураг цуглуулдаг нэг хүзүүгүй луйварчин байгаа шүү. Түүнд л битгий өгсөн гэж хэлээрэй. Тэгвэл багш нар чинь тэмцэх нь зөв.

192.145.127.164Зочин   • 1 сарын 14. 17 цаг 37 минут

Манай хүзүү элбэгтэй ах хойно цэргийн тмс төгсөөд ирэхдээ гадаад дотоодын олон зураач нарын зургуудын котейнэр цуглуулгатай ирсэн. Галерейгээс бол аваагүй

Шинэ мэдээ

Мэдээллийн сайтуудын дунд “News-15” спортын наадам зохион байгуулна9 цаг 49 минутын өмнөЭэлжит бус чуулган маргааш хуралдаж, тэтгэвэр нэмнэ9 цаг 51 минутын өмнөГарын урыг гайхуулам "Хос уянга"1 сар 27. 13:55Цаглашгүй их өв "Цаасан хайчилбар"1 сар 27. 13:39Ж.Гантулга: Дэлгэцийн донтолттой хүүхдийн тархинд хар тамхи хэрэглэсэн үед илэрдэг эмгэг үүсдэг1 сар 27. 13:30Хятадын уламжлалт соёл "Шинийн бэлтгэл"1 сар 27. 13:21Чөлөөт цаг бол хөгжих боломж1 сар 27. 13:20Сангийн сайд асан Ч.Хүрэлбаатарын “ургийн мод“1 сар 27. 12:45Б.Мөнхбат "Монголросцветмет"-ыг самарсаар байна1 сар 27. 12:30Мексикийн хар тамхины наймаа, авлигын асуудлыг сурвалжилсан хоёр сэтгүүлчийг долоо хоногийн дотор хөнөөсөн байна1 сар 27. 12:16Лифтний хонгилд унасан хүү эмнэлэгт очоод амьсгал хураажээ1 сар 27. 11:09ЭМЯ: 2273 тохиолдол бүртгэгдэж, хоёр хүн энджээ1 сар 27. 11:06Коби Брайнт болон түүний охин Жианна нарын дурсгалыг хүндэтгэн тэдний осолдсон газар тэдний хөшөө байрлуулжээ1 сар 27. 11:06Д.Амарбаясгалан: Ёс зүй, хариуцлага алдсан Ё.Отгонбаярыг үүрэгт ажлаас нь чөлөөлсөн1 сар 27. 11:03Лифтэнд хүүхэд эндсэн байр ЭКО КОНСТРАКШНЫХ байжээ1 сар 27. 10:59АТГ: Эрүүгийн хоёр хэргийн 15 объектод нэгжлэг хийлээ1 сар 27. 10:58Ковид19-ийн вакцин тойрсон асуултуудад ТЭД ЮУ ГЭЖ ХАРИУЛАВ1 сар 27. 10:56ДЭМБ-аас КОВИД-19-ийн эсрэг 2 шинэ эмийг зөвлөж байна1 сар 27. 10:55СЭРЭМЖЛҮҮЛЭГ: Өнөөдөр баруун аймгуудын нутгаар цас орж, явган шуурна1 сар 27. 10:5366,934 хүний нэг удаагийн хэрэглээний мансууруулах бодисыг хураан авчээ1 сар 27. 9:53Ерөнхийлөгч тэтгэвэр, тэтгэмж нэмэх чиглэлийг ЗГ-т өглөө1 сар 26. 16:30УИХ-ын гишүүн Г.Амартүвшин: Хөгжлийн банканд 6 сар ажиллахдаа зээл олгох шийдвэр гаргаж байгаагүй1 сар 26. 16:25АТГ: Ж.Пунцагт эрүүгийн хэрэг үүсгэн, яллагдагчаар татан шалгаж байгаа1 сар 26. 15:30Замын-Үүд боомтоор тээвэрлэлт эхэлснээс хойш 816 чингэлгээр 13496 тн ачаа татаж аваад байна1 сар 26. 15:22“Оюу толгой” ХХК-тай “Цахилгаан эрчим хүчээр хангах гэрээ”-нд гарын үсэг зурна1 сар 26. 15:21“Халдварын давлагаа үүсвэл цэцэрлэг, сургуулийн үйл ажиллагаа хойшлох эрсдэл байна“1 сар 26. 15:17Л.Энх-Амгалан: МСҮТ, их, дээд сургуулиуд II сарын 7-ноос цахимаар хичээллэнэ1 сар 26. 15:15“3-5 настнуудыг II сарын 14-нөөс цэцэрлэгт үргэлжлүүлэн хамруулна“1 сар 26. 15:13“Хилийн боомтоор нэвтрүүлж буй чингэлгийн тоог нэмэгдүүлэхээр Хятадын талтай яриа хэлэлцээ хийж байна“1 сар 26. 15:11Х.Нямбаатар: ТББ нэрээр ашгийн төлөө хуулийн этгээдүүд үйл ажиллагаа явуулж байна1 сар 26. 13:05
© 2008 - 2022 он. Зохиогчийн эрх хуулиар хамгаалагдсан.