Боловсролын террористууд

Олон хүний амь аварч, алтан гартай эмч хэмээн олондоо хүндлэгддэг манай нэгэн нэртэй эмч хэрхэн эмч болсон тухайгаа дурсан ярьсан байдаг. “Уг нь би эмч биш багш болъё гэж бодож байсан ч нэгэн өдөр ээж минь “Чи багш болсноос эмч болсон нь дээргүй юу, эмч хүн алдаа эндэгдэл гаргалаа гэхэд нэг хүний аминд хүрнэ. Харин чи муу багш болбол нэг хэсэг хүнийг насаар нь хохирооно, аль нь илүү хохиролтой болохыг бодоод үзээрэй” гэж хатуухан хэлсэн. Ээжийн маань хэлсэн энэ үг хэдэн өдөр толгойд бодогдоод эмч мэргэжлийг сонгосон. Гэхдээ би хүний аминд хүрч магадгүй гэж болгоомжилсондоо бус олон хүний хувь заяа, мэдлэг боловсролоор тоглох нь алсдаа илүү хор хөнөөлтэй юм байна гэж бодоод багш мэргэжлээс татгалзсан” хэмээн ярьсан байдаг. Үнэхээр тэрхүү эмчийн хэлснээр, урьд хамгийн сайн сурлагатай, толгойтой, сэтгэлтэй, зүтгэлтэй, ёс зүйтэй хүн багш мэргэжлийг сонгож, хамгийн сайн шавь нарыг бэлддэг байлаа. Харин өнөө цагт багш нар гэдэг боловсролын салбарын террористууд болсныг ганцхан жишээгээр өгүүлье.

Дүрслэх урлагийн академийн багш, зураач Б.Нямхүү хэд хоногийн өмнө БШУЯ-ны үүдэнд шударга ёсыг шаардаж, уриа лозунг барьж, эсэргүүцлээ илэрхийлэв. Зураач мэргэжилтэй учир цаасан дээр хэдэн үг бичих шиг амархан ажил байхгүй. Харамсалтай нь хэлхэж бичсэн хэдэн үг нь академийн багш бичсэн гэхэд хүн уншихад ичмээр алдаа мадаг ихтэй байв. Бусдаас ёс зүй нэхэж байгаа атлаа өөрөө наад захын мэдлэг, боловсролын ёс зүйгүй болох нь бичсэн уриа, хэлсэн үгнээс нь тодорхой харагдана. Хүн өөрт байхгүй юмаа бусдаас нэхдэг гэдэг нь аргагүй үнэн бололтой. Монгол хэлнээ хөрвүүлэхэд “Академи” гэдэг маань “Эрдмийн хүрээлэн” хэмээн орчуулагддаг нэрийг нь уншихад сүрдмээр эрдмийн өргөөний багш хүн зөв бичих дүрэм ч мэддэггүй, зөрүү буруу яриад явах нь дэндүү шившигтэй. Үлгэрт гардаг шиг “Нүүрээ хаагаад нуумаар, нүдээ ухаад авмаар” байсныг харсан, үзсэн хүн бүхэн халаглан хэлж байх юм. Яруу тунгалаг монгол хэл ядмагхан мэдлэгтэй багшийн гарт хойдохоо уншуулахаа дөхөв, хөөрхий.

Бага ангийн хүүхэд хүртэл алдааг нь засаад шоолж инээмээр баахан цаас барьж зогсч байгаагаа эхнэрийнхээ ажилладаг МҮОНРТ-ийн “ММ” агентлагийн мэдээллийн хөтөлбөрөөр орон даяар цацаж, бусдыг гутаан доромжилж буй багш Б.Нямхүүд ёс зүйн тухай ойлголт байтугай хүн чанарын хэлтэрхий ч алга. Эгшиг, үсгийн зөв бичих дүрмээ мэддэггүй муу багш шигээ эхнэрээ хувийнхаа зорилгодоо ашигладаг өөдгүй эр гэдгээ энэ увайгүй үйлдлээрээ баталж орхилоо. Үнэндээ тэрээр ёс зүйгүй хүн гэдгийг ч Дүрслэх урлагийн академийн оюутнууд нь баталдаг. 2017 онд Б.Нямхүү багш сургууль дээрээ архидан согтуурч, оюутнууддаа удаа дараа агсам тавьжээ. Улмаар монгол зургийн оюутан охин М-ийг хэрцгийгээр зодсон байдаг. Тэрээр охины толгой, нүүр рүү уран зургийн том төмөр шугамаар балбаж, машиныхаа түлхүүрийг биед нь зоон танхайрсан байна. Удаа дараагийн балмад авираас нь айсан охин сургуульдаа явахаас татгалзсанаар ар гэрийнхэн нь сургуулийн удирдлагад өргөдөл гаргаж, багшаас чөлөөлөхийг хүссэнээр түүний бузар хэрэг илчлэгдэж байжээ. Хохирогч М охины эцэг нь Б.Нямхүүтэй ДУДС-д хамт сурч байсан нэгэн ангийн оюутнууд аж. Алгын чинээ охиноо ангийнхаа хүүхдэд итгэж шавь оруулсан ч араатнаас дор авирласанд айх гайхах зэрэгцэж, арга буюу өргөдөл өгсөн байна. Багш хүний ёс зүйд үл нийцэх балмад үйлдэл гаргасан Б.Нямхүү амин хайртай охиныг нь зодсондоо ангийнхаа хүүхдээс уучлал гуйх нь бүү хэл танил нөхдөөрөө яриулж, өргөдлийг нь татуулж байсан ёс суртахуунгүй этгээд. Асуудал өндөр авч, БШУЯ-ны сонорт хүрэхэд тэрээр тус яаманд ажилладаг хадам эгч Т.Амаржаргалынхаа нэр нөлөөгөөр ажилдаа үлдэж байсан түүхтэй. Угтаа Эрүүгийн хуулиар шийтгэл хүлээх ёстой хүн эхнэрийнхээ эгчийн хаялгаар ямар ч ял зэм хүртээгүй юм. Ийм ёс зүйгүй хүмүүс боловсролын салбарыг эзэгнэнхэн байх цагт хэндээ итгэж хүүхдүүдээ боловсролтой болгоно хэмээн хөтөлж аваачиж өгөх юм бэ?

Зурах авъяас мэдрэмжээсээ илүү заах арга зүй өндөртэй, зөв ёс суртахуунтай хүнийг академийн багш болгодог аттестачлалыг явуулдаг болох нь жинхэнэ багш нарыг ялгах жишиг үзэгдэл болно. Академийн багш нь аль ч улсын хэлээр эрдэмтэдтэй хэлэлцэж чаддаг, мэдлэг боловсролоороо Монголдоо төдийгүй дэлхийд хүлээн зөвшөөрөгдсөн мэргэд байдаг. Таван үгээ зөв бичиж чадахгүй тараа таниулсан Б.Нямхүү мэтийн нөхдийг тэр тусмаа боловсролын салбараас шигших хэрэгтэй. Боловсролын салбарт танил талаараа шигдсэн багш хэмээх алдар нь ахадсан боловсролын “террорист”-уудаас болж энэхүү салбар эрэмдэг хүн шиг болж буйд хаа хаанаа анхаарах цаг болжээ. Сэхээний орон дээр байгаа боловсролын салбараа аврахгүй бол сэлүүргүй завь шиг Б.Нямхүү мэтийн согтуу толгойтнууд самарч дуусах нь байна шүү!!!

Түмэн.мн