ЖИНХЭНЭ ЖДҮ: Эсгий бүтээгдэхүүний үйлдвэр байгуулж, үндэсний үйлдвэрлэлийг хөгжүүлнэ

ЖДҮ-ийн хөгжил ямар байхаас шалтгаалж ажлын байр нэмэгдэж, эдийн засаг өснө. Жинхэнэ ЖДҮ яагаад чухал вэ. Өөрөөр хэлбэл ЖДҮ өнөөдөр ямар байдалтай байна вэ.  Жинхэнэ ЖДҮ-чид бизнесийн хөрөнгөө яаж "босгодог" вэ гэж үү.

Тиймээ тэдний 50 гаруй хувь нь өөрийн хөрөнгөөр ҮЙЛДВЭРЛЭЛЭЭ эхлүүлдэг. Өнөөх алдартай ЖДҮХС-гаас гарах зээлээр ердөө 1 хувь ажил амьдралынхаа гарааг эхлүүлж байна. Товчоор хэлбэл, ЖИНХЭНЭ ЖДҮ-чдэд ТУСЛАМЖ хэрэгтэй байна. Төрийн тусламж нь очих ёстой хүмүүсээсээ тойрдог энэ цаг үед хийж бүтээхээр зорьж буй иргэдээ бид л дор бүрнээ дэмжих цаг ирээд байна. Ингэж байж л тэд "хөл" дээрээ босч, эдийн засаг сайжирч, ажлын байр бий болно. ЖИНХЭНЭ ЖДҮ-чид тэрбумаар нь зээл хүсдэггүй гэдгийг та мэдэх үү. Тэд тав хүртэлх жилийн хугацаатай, 5-50 сая төгрөгийн санхүүжилт л хүсдэг юм. 

Тиймээс үндэсний тэргүүлэгч Zaluu.com сайтын зүгээс ЖДҮ эрхлэгчдээ дэмжих зорилгоор "ЖИНХЭНЭ ЖДҮ"  гэх булангаараа дамжуулж томоос нь жижиг хүртэлх бүхий л ЖДҮ эрхлэгчдийнхээ хийж бүтээж буй сонин хачинг уншигч та бүхэндээ хүргэхийг зорьж байна. Мөн оролцохыг хүссэн бүх ЖИНХЭНЭ ЖДҮ-чиддээ манай сайт нээлттэй гэдгийг онцолж байна. Бидэнтэй холбоо барихыг хүсвэл 99104292 болон манай сайтын фэйж хуудас, мэйл хаягуудаар дамжуулан холбогдоно уу.

--------------------------------------------------------------------------------------------------------------------

Энэ удаад бид эсгийгээр загварлаг гутал үйлдвэрлэн, өөрийн гэсэн Монгол брендийг бий болгосон Т.Рэнцэнханд гэх бүсгүйг онцолж байна.   

-Сайн байна уу. Манай уншигчдад өөрийгөө танилцуулахгүй юу?

-Zaluu.com сайтын уншигчдадаа өдрийн мэнд хүргэе. Намайг Т.Рэнцэнханд гэдэг. МУИС-ийн олон улсын харилцааны анги төгссөн. Сургуулиа төгсөөд ажлынхаа гарааг агаарын тээврийн Корейн эйр болон МИАТ компанид онгоцны үйлчлэгчээр ажиллаж эхлүүлсэн. Зургаан жилийн турш ажилласан. Гэхдээ онгоцны үйлчлэгчийн ажил өглөө, орой, шөнө гээд хуваарийн дагуу нислэгтэй учир өөрийнхөө сонирхлыг хөгжүүлэх боломж төдийлөн байгаагүйгээс ажлаасаа гарах шийдвэр гаргасан. Ажлаасаа гараад сонирхлынхоо дагуу Европ, Монгол төрөл бүрийн хувцсыг оёж эхэлсэн олон ч захиалагчидтай болсон. Харин энэ жилээс эрүүл мэндэд ээлтэй бүтээгдэхүүнээр гутал, хувцас хийх хүсэл төрж, одоогоос таван сарын өмнө "Дэгжин Гоо" брендийг үүсгэн байгуулж, үйл ажиллагаагаа эхлүүлсэн. Өнөөдрийг хүртэл чамлахааргүй амжилттай ажиллаж байна.

-Зөвхөн эсгийгээр үйлдвэрлэдэг гэхэд хүүхдийн, том хүний гээд нилээн олон загвар байх шиг байна?

-Миний хувьд гуталнуудынхаа өнгө загварт маш их ач холбогдол өгдөг.  Өнөөдрийн байдлаар хүүхдийн болон том хүний 28 загвар, 10-аад өнгөний сонголттой гуталнуудыг үйлдвэрлэж зах зээлд нийлүүлээд байна. Үнийн хувьд 40-120.0 төгрөгөөр зун, хавар намрын түрийтэй загваруудаа худалдаалж байгаа

-Өөрийн гэсэн үйлдвэртэй гэж сонссон. "Дэгжин гоо" бренд өнөөдрийн байдлаар нийт хичнээн хүнийг ажлын байраар ханган ажиллаж байна вэ?

-Манай үйлдвэрт 20 хүн ажилладаг. Хэдийгээр байгуулагдаад 5-хан сар болж байгаач манай бүтээгдэхүүнийг авах хүмүүсийн тоо өдрөөс өдөрт нэмэгдэж байна. Монголдоо төдийгүй АНУ, Австрали, Орос, Европын орнуудаас захиалга хийн авч хэрэглэгчид сэтгэл өндөр сэтгэгдлээ илэрхийлж байгаа нь бидэнд маш их ажиллах урам зориг зорилгыг өгдөг. Цаашдаа урлан байгуулж, илүү олон хүнийг ажлын байраар ханган ажиллах зорилт тавин ажиллаж байна. 

-Цаашдын зорилго тань юу вэ?

-Өөрийн хүсэл мөрөөдөл болсон эсгий бүтээгдэхүүний үйлдвэрийг байгуулж эх орондоо үндэсний үйлдвэрлэл хөгжүүлэхэд хувь нэмрээ оруулан мөн дэлхийн олон оронд Монголынхоо нэрийг гаргасан нэрийн дэлгүүрээ нээнэ гэж боддог.

-Нэг гутал хийхэд хэчнээн хугацаа зарцуулдаг вэ?

-Нэг хүний бүтээмжээр бол 6-8 цаг болно.

-Түүхий эд ээ хаанаас авдаг вэ?

-Ноосоо авдаг хоёр хүн бий. Тэр хоёроосоо ээлжлээд авдаг. Хонины ноос өөрөө их гоё гоё өнгөтэй байдаг. Цагаан, саарал, бор гээд өөр өөр өнгөтэй. Өнгийг нь өөрчлөхдөө зориулалтын эсгийний будгаар лабораторид будуулдаг.

-Дэгжин гоо брендийн гутлыг аль улиралд өмсвөл илүү тохиромжтой вэ. Зуны загвар ихтэй юм байна. Зун эсгий хэт халуудахгүй юм?

-Аль ч улиралд өмсөж болдгоороо бусад гутлаас онцлогтой. Учир нь эсгий бүтээгдэхүүнийг амьсгалдаг бүтээгдэхүүн гэж ярьдаг. Тэр ч утгаараа өвөл, зун халуун, хүйтэн орчинд температураа барьж байдаг. Өвөл дааруулахгүй, зун халууцуулахгүй. 

-Залуу насандаа зориг гаргаж өөрийн гэсэн брендийг үүсгэн байгуулаад, амжилттай ажиллаж яваа хүний хувьд бусад залуустаа хандаж зөвлөгөө өгөхгүй юу. Яг өөртэй чинь адилхан өөрийн гэсэн бизнестэй болох хүсэлтэй ч зориглож чаддаггүй залуус олон байгаа байх?

-Залуустаа хандаж хэлэхэд үргэлж шинэ зүйлд суралцаж, суралцсан зүйлээ нийгэмд бахархалтайгаар хэвшүүлээрэй мөн хэн нэгэн чамайг дорд үзэж, хэн ч биш санагдуулах тийм боломж хэзээ ч бүү гаргаарай. Бурхан хийж бүтээж байгаа хүнийг үргэлж дэмжиж шагнадаг юм шүү гэж хэлмээр байна.

 -Хонины ноосыг өөрсдөө боловсруулаад бүтээгдэхүүн болгож гаргана гэдэг маш их шат дамжлагатай. Ер нь их хөдөлмөр, тэсвэр тэвчээр шаарддаг ажил байх. Шантрах үе байв уу?

-Байлгүй яахав. Анх сурч байх үед гар хагараад, цус гараад, ноосноосоо харшлаад үнэхээр хэцүү байсан. Тухайн үедээ шантраад за болъё. Яагаад заавал би ингэж зовох ёстой гэж бодогдох үе зөндөө байсан. Гэхдээ маргааш өглөө нь босоод л ЯАГААД болино гэж, би чадна, чадах ёстой гэж бодоод л дахиад эхэлдэг байсан. Тэгж хичээснийхээ хүчинд өөрийн гэсэн брендтэй, үйлдвэртэй болсон байна.

-Үндэсний үйлдвэрлэлийг хөгжүүлэх үйлсэд үнэтэй хувь нэмэр оруулж байгаа танд болон танай хамт олонд баярлалаа. Хамгийн сүүлийн асуултыг танд үлдээе?

-Манайхыг сонгон үйлчлүүлдэг үйлчлүүлэгчиддээ маш их баярлалаа гэж хэлмээр байна. Манай хамт олон хэзээ ч урмыг тань хугалахгүйгээр хичээнгүйлэн хичээн ажиллах болно. Мөн олон олон дэгжин загварууд гаргаж байх тул нүүр хуудасны манай Дэгжин Гоо Брэнд гэсэн пэйж хуудастай үргэлж хамт байгаарай. Бүгдэд нь эрүүл энх сайн сайхан бүхнийг хүсэн ерөөе. 

"ДЭГЖИН ГОО" брендийн талаар илүү дэлгэрэнгүй мэдээлэл авахыг хүсвэл ЭНД дарна уу.