"Шавь" цогцолбор сургуулийн захирал: Би өрөөгөө голоогүй

Өнгөрсөн өдрүүдэд цахим орчинд өрөөгөө голоод сурагчдын хичээлийн танхимыг суллаж, өөрийнхөө өрөө болгосон ЕБС-ийн захирлын тухай мэдээлэл цацагдаж,  олон хүнийг бухимдуулсан.

Тодруулбал, энэ сарын 10-ны өдөр Д.Мөнхбаатар гэх хүн "Баянзүрх дүүргийн "Шавь" цогцолбор сургууль 5000 гаруй сурагч, 250 гаруй багш, ажилтантай гэхээр улсдаа эхний гуравт орохоор том сургууль. н.Тунгалаг гэж тулхтай, чадвартай захирал байж байгаад энэ жил тэтгэвэртээ гарч, түүний оронд тус сургуулийн сургалтын менежер Г.Бүрэнмэндийг үүрэг гүйцэтгэгчээр томилсон. Шавь цогцолбор сургууль Тунгалаг захирлын үед хичээлийн 4 дэх байраа бариулсан нь саяхан олон дарга нар сүр дуулиантай очиж нээлт хийсэн. Гэтэл мөнөөх түр захирал маань хуучин захирлынхаа олон жил суусан өрөөг голж, тавилгуудыг нь гаргаж хаяад зогсохгүй шинэ байрандаа бүхэл бүтэн нэг ангийг суллан тухалжээ. Ийм ёс зүйгүй, ийм увайгүй, ийм тансаглах дуртай хүнээр захирал тавьж болох уу. Тэр захирлын тухалсан ангид 2 ээлжээр 70 хүүхэд л лав суралцах боломж байсан. Ийм тооны хүүхдийн сурч боловсрох эрхийг зөрчөөд тансаглахаар улайрч байгаа хүн захирал бүү хэл багш хийх ч эрх байхгүй" гэх мэдээллийг нийтэлсэн юм.

Тиймээс бид тус сургуулийг зорьж, Г.Бүрэнмэнд захирал болон багш нарын төлөөлөлтэй уулзаж,  учир шалтгаан, нөхцөл байдлыг тодрууллаа. 

Г.БҮРЭНМЭНД: Надад дургүй, хүлээн зөвшөөрөхгүй байгаа хүмүүсийн хийж байгаа ажил болов уу гэж харж байна

/"Шавь" цогцолбор сургуулийн захирлын үүргийг түр орлон гүйцэтгэгч/

-Цахим орчинд цацагдсан шиг өрөөгөө голсон, тавилгуудыг нь гаргаж хаясан зүйл байхгүй.  Хуучин захирлын хэрэглэж байсан сандал, ширээг би энэ өрөөндөө аваад ирчихсэн хэрэглэж байгаа. Манай сургууль дээр "Дэлхийн зөн"-гийн сэтгэлзүйч ажилладаг. Хүүхдүүдтэй уулзаж ярилцах шаардлага гардаг учраас өрөө гаргаж өгнө үү гэсэн албан бичиг "Дэлхийн зөн"-гөөс ирсэн. Уг нь өнгөрсөн жил нэг жижиг өрөөнд суудаг байсан ч тэр  нь хэтэрхий хүйтэн, тухгүй учраас хүүхдүүдтэй ярилцаж, зөвлөгөө өгөхөд хүндрэлтэй байдаг. Тийм учраас өөр өрөө гаргаж өгөхийг хүссэн юм. Тэгэхээр нь би өрөөгөө суллаж өгөхөөс өөр аргагүй нөхцөл байдал үүссэн. Бас манай "Шавь" цогцолбор сургууль хичээлийн дөрвөн байртай. Санхүүгийнхэн нэг байрандаа суудаг. Тэр нь энэ байрнаасаа жаахан зайтай учраас ядаж нэг санхүүгийн хүн байх шаардлагатай гэж үзээд энэдээ  нэг санхүүч авч ирсэн. Өөрөөр хэлбэл, тэр хүнд бас нэг өрөө хэрэг болсон. Тиймээс би өмнө нь н.Тунгалаг захирлын төлөвлөснөөр энэ байр руу ороод,  хуучин өрөөндөө сэтгэлзүйчийг оруулаад,  нарийн бичиг суудаг байсан үүдний өрөөнд нь нийгмийн ажилтнаа оруулсан. Харин нийгмийн ажилтны суудаг байсан өрөөнд нь Санхүүгийн хүнийг оруулсан.

Би энэ өрөөнд суугаад хоёр долоо хонож байна. Өмнө нь н.Тунгалаг захирал байхдаа энэ шинэ сургуулийн нэг өрөөг захирлын өрөө болгохоор төлөвлөсөн байсан. Тэр нь маш том анги байсан . Тиймээс  би тэрийг нь анги болгосон. Оронд нь сургуулийн хамгийн жижиг ангийг нь өөрийнхөө өрөө болгосон. Энэ тэгж хүнд адлуулан барин дурлаад байхаар өрөө ч биш.  Дээрээ спорт заалтай учраас маш их чимээтэй өрөө. Гэтэл яагаад ийм асуудал үүсээд байгааг ойлгохгүй байна. Би бодохдоо надаас өө хайсан,  дургүй, хүлээн зөвшөөрөхгүй байгаа хүмүүсийн хийж байгаа ажил болов уу гэж харж байна" гэсэн юм.

БАГШ НАРЫН ТӨЛӨӨЛӨЛ: Г.Бүрэнмэнд түр захирлыг албан тушаалаас нь огцруулах нь зүйтэй

Харин тус сургуулийн зарим багш нар нь "Өөрийнхөө эрх ашгийн төлөө хүүхдүүд хичээллэх зориулалттай анги танхимыг өөрийнхөө өрөө болгосон хүнтэй цаашид хамтарч ажиллах боломжгүй. Тиймээс Г.Бүрэнмэнд түр захирлыг албан тушаалаас нь огцруулах нь зүйтэй. Түүний оронд хэн ч ирсэн хамаагүй хүлээн зөвшөөрнө" гэсэн юм. 

Т.ГЭРЭЛ