Манай сэтгүүлч ОХУ-ын Москва хотоос мэдээлж байна.
Монгол Улсын Ерөнхий сайд У.Хүрэлсүх ОХУ-д албан ёсны айлчлал хийж буй. Энэхүү айлчлалын хүрээнд Монгол Улсын ХХААХҮЯ болон Оросын Холбооны Улсын Аж үйлдвэр, худалдааны яам хоорондын санамж бичиг”-т - Монголын талаас ХХААХҮ-ийн Ч.Улаан - Оросын талаас Аж үйлдвэр, худалдааны орлогч сайд А.Н.Морозов нар гарын үсэг зурсан юм.
Энэ үеэр ХХААХҮ-ийн сайд Ч.Улаанаас тодруулга авлаа.
-Айлчлалын хүрээнд хөдөө аж ахуйн салбарт ямар тодорхой ажлууд хийгдэж байгаа вэ?
-ОХУ-ын Үйлдвэр худалдааны яамтай Монгол Улсад Хөдөө аж ахуйн техник нийлүүлэх, алслагдсан бүс нутагт элеватор барих зэрэг асуудлыг ярьж тохирсон байгаа. Мөн Монгол улсаас экспортод зориулж, мах махан бүтээгдэхүүн, хөдөө аж ахуйн гаралтай бүтээгдэхүүний экспортыг нэмэгдүүлэх асуудлуудыг ярилцаж баталгаажууллаа. Цаашлаад монголын мал сүргийг эрүүлжүүлэх хөтөлбөрийг хэрэгжүүлж дуусгана. Ирэх жилийн тариалалтад зориулж, үрийн будаа авах асуудлаар тохиролцоонд хүрсэн. Мөн үйлдвэрлэлийн зориулалттай будаа худалдаж авах асуудлаар гэрээ хэлцэл хийгдэж байна.
-Мал эрүүлжүүлэх хөтөлбөрийн тухайд?
-Энэхүү хөтөлбөрийн хүрээнд Монгол улсын мал сүргийг хил дамнасан халдварт өвчнөөс сэргийлэх ажлыг хамтарч хийнэ. Тодруулбал, мялзан, шүлхий өвчнийг анагаахад ОХУ-тай хамтарна. ОХУ-аас баталгаатай вакцин хэрэглэх, вакцины үйлчлэлд хяналт тавих, цаашлаад вакцин үйлдвэрлэхэд хамтран ажиллах асуудлыг ярьж тохирсон. Ингэснээр Монгол улсын баруун бүс нутаг вакцингүй, эрүүл бүс байлгах, эрүүл бүсээс мах махан бүтээгдэхүүнийг экспортод гаргах асуудлыг Цагаан нуурын хилийн боомт дээр хамтарсан хорио цээртэй бүс байгуулж, мал болон малын гаралтай бүтээгдэхүүн экспортлох асуудлыг шийдэхээр тохирлоо. Монгол улсын зүүн бүс нутгийг вакцин тарьдаг, графикийн дагуу вакцин тарьж эрүүлжүүлэх бүс болгоно. Энэ хүрээнд ОХУ-аас вакцинаа үргэлжлүүлэн авна. Цаашдаа хөнгөлөлттэй үнээр вакцин нийлүүлэх, хэрвээ онцгой тохиолдол гарвал хүмүүнлэгийн тусламжаар вакцин өгч авалцах тухай асуудлыг ч ярьж тохирсон байгаа.
-ОХУ руу мах экспортлох хэмжээ маш бага байгаа. Үүнийг нэмэгдүүлэх үү?
-Үүнийг нэмэгдүүлэхийн тулд эхний ээлжинд мал сүргээ эрүүлжүүлэх ёстой. Тиймээс дээрх хөтөлбөрийг гурван үе шаттай хэрэгжүүлж байна. Эхний хоёр үе шат амжилттай хийгдсэн. Гурав дахь үе шатыг хэрэгжүүлж дууссанаар мах махан бүтээгдэхүүний экспортыг нэмэгдүүлэх бололцоо нөхцөл бүрдэнэ.
-ОХУ-аас ноос, ноолуурын салбарт хөрөнгө оруулалт хийх асуудал хөндөгдөж байгаа гэх мэдээлэл байна?
-ОХУ руу монголын хөрөнгө оруулагч, бизнесменүүд хөрөнгө оруулж, хамтарсан үйлдвэр байгуулъя гэсэн асуудлыг тавьж байгаа. Өөрөөр хэлбэл, монголд байгаа түүхий эдийг анхан шатны боловсруулалтыг монголд хийгээд эцсийн бүтээгдэхүүний үйлдвэрлэлийг ОХУ-д зохион байгуулах асуудал яригдаж, хоёр тал нэлээд сонирхож яриа хэлэлцээ хийж байна. Тодруулбал, ноолууран утсыг монголдоо үйлдвэрлээд улмаар бүтээгдэхүүнээ ОХУ-д үйлдвэрлэж, дотоодын хэрэгцээг нь хангах боломж байна гэж үзэж байгаа. Жилдээ 10 сая хүртэл бэлэн бүтээгдэхүүн үйлдвэрлэх боломжтой гэж тооцож байгаа.
-Газар тариалангийн салбарын тухайд?
-Газар тариалангийн салбарын хүрээнд эхний ээлжинд Монгол улсад нэн шаардлагатай байгаа хөдөө аж ахуйн техник, дагалдах хэрэгслүүдийг гадаад худалдааны банкаар дамжуулж, хөнгөлөлттэй үнээр худалдаж авах асуудал яригдаж байна. Энэ жилийн хувьд 3 сая гаруй долларын тоног төхөөрөмж худалдаж авсан. Цаашдаа хөдөө аж ахуйн техникийг ОХУ-ын орчин үеийн, чанартай техникээр солих ажил хийгдэнэ. Мөн Монгол улсын баруун болон зүүн алслагдсан бүсэд элеватор барих асуудлыг тохирсон. Ингэснээр тээврийн зардлыг хэмнэх, үр тарианыхаа үйлдвэрлэлийг нэмэх, тэндээсээ экспортод гаргах боломж нөхцөл бүрдэнэ гэж бид үзэж байна.
Айлчлалтай холбоотой мэдээллүүдийг энд дарж 1 2 3 4 5 6 7 уншина уу
2 сэтгэгдэлСэтгэгдэл бичих
ОХУ манай 2 улс эрт дээр үеэс хүний нийгэм үүсч хөгжсөн, худалдаа наймаа хийж эхэлсэн үеэсээ л хоорондоо харьцаж ирсэн байхдаа. Гэтэл хөдөө аж ахуйн орон гэчихээд хөрш залгаа стратегийн хамгийн гол түнштэйгээ одоо хүртэл энэ асуудлыг бүрэн шийдвэрлэж чадахгүй байх гэж. Энэ асуудал дээр ойрын хугацаанд харилцан ашигтай тогтвортой хамтын ажиллагааг хөгжүүлэх хэрэгтэй. Төрийн түшээд хувийн сонирхлоо биш улс орныхоо эрх ашгийг эхэндээ тавих хэрэгтэй байна.Зурагдсан пянз шиг зуун дамжин яриад л байх юм хийсэн хэрэгжсэн юм байхгүй.
Ulaan bol hogiin gar shuu