"Мөнхийн хөршдөө сэтгэлийн дэмжлэг" хүмүүнлэгийн аян зарлалаа

Монгол Улсын Засгийн газар ээлжит хуралдаанаараа БНХАУ-д туслах аяныг санаачлах шийдвэр гаргаж, ажлын хэсгийн ахлагчаар БОАЖ-ын сайд Н.Цэрэнбатыг томилсон байна. Энэ хүрээнд БОАЖЯ, Гадаад харилцааны яам, Сангийн яамнаас хамтран хандивын данс нээлгэж, БНХАУ-д туслах "Мөнхийн хөршдөө сэтгэлийн дэмжлэг" нэртэй хүмүүнлэгийн аяныг эхлүүлж байгаа аж. Энэ талаар өнөөдөр БОАЖ-ын сайд Н.Цэрэнбат, ГХ-ны сайд Д.Цогтбаатар, Сангийн дэд сайд Х.Булгантуяа нар мэдээлэл хийлээ. 

Мэдээллийн эхэнд БОАЖ-ын сайд Н.Цэрэнбат "Нэгдүгээр сарын 7-оос хойш манай хөрш БНХАУ-д шинэ төрлийн коронавирус гарч, эдийн засаг бөгөөд нийгмийн хувьд хүндрэл үүсээд байна. Тиймээс мөнхийн хөрш БНХАУ-д Монгол Улсын Засгийн газар, Монголын ард түмнээс тусламжийн гараа сунгах зорилгоор хүмүүнлэгийн аяныг зохион байгуулах шийдвэр гаргасан. Энэ хүндрэлийг даван туулахад хөршдөө сэтгэлийн дэм өгөх зорилгоор өнөөдрөөс эхлэн хүмүүнлэгийн аяныг албан ёсоор нээж байна.  БНХАУ-аас Монгол Улсад суугаа Элчин сайдын яаманд манай улсын иргэд, ТББ, аж ахуйн нэгжээс хандив, дэмжлэг өгч байгаа.  Түүнээс гадна, олон ТББ, аж ахуйн нэгж ч нэгдэж, хандив өгөхийг хүсч байгаа учраас бид нэгдсэн хандивын аяныг зарлаж байгаа юм. 

Сүүлийн жилүүдэд БНХАУ-д манай улсаас давхардсан тоогоор 1.6 сая иргэн зорчиж байгаа. Мөн Монголын эдийн засаг, боловсрол гээд бүхий л салбарт БНХАУ-тай хамтын ажиллагаа өргөжиж байна. Зовох цагт нөхрийн чанар танигдана гэж бид ярьдаг. Тиймээс бага ч гэсэн сэтгэлийн дэмжлэгийг иргэн, ТББ. төрийн байгууллагууд нэгдэж үзүүлэхийг уриалж байна" хэмээлээ.  

Харин ГХ-ны сайд Д.Цогтбаатар "Сүүлийн үед коронавирусийн дэлгэрэлттэй холбоотой Монголын олон иргэн, аж ахуйн нэгжүүд сэтгэлийн тус дэм, хандив өгье гэдэг санаачилгыг гаргасан. Гэхдээ зохион байгуулалт муутай, олон сувгаар яваад байгаа учраас илүү үр ашигтай, байгаа оносон байлгах үүднээс нэгтгэх нь зөв гэдэг чиглэл гарсан. Тиймээс энэ хандивын аяныг зохион байгуулж, Төрийн банкинд данс нээж байгаа юм. Сэтгэлийн хандиваа өгөх хүмүүс нь тус тусдаа олон байгууллагаар яваад байх биш энэ нэгдсэн дансандаа хийгээд явах нь илүү зохион байгуулалттай. 

Засгийн газраас байгаа боломжоор БНХАУ-д тусламж үзүүлсэн. Мөн НЗДТГ, Худалдаа аж үйлдвэрийн танхим, Хятадад сургууль төгсөгчдийн холбоо гээд олон байгууллагууд тус тусдаа хандив өгсөн. АН ч гэсэн өөрсдөө санаачлаад, хандив өгсөн байгаа.  Энэ бүхнийг л илүү зохион байгуулалттай, нэг шугамаар, нэг улс, үндэстэн гэдэг байдлаар л тусламж үзүүлэхээр зорьж байна. Саяхан Мюнхэны аюулгүй байдлын бага хуралд оролцох үеэрээ ДЭМБ-ын удирдлагатай уулзаж, ярилцсан байгаа. Энэ үеэр нөхцөл байдал, дэгдэлтийн төлөв хандлагын талаар нэлээд ярьсан. Тэдний гол ярьж буй зүйл нь улс орнууд өөрсдөө илүү зохион байгуулалттай байж, урьдчилан сэргийлэх арга хэмжээгээ сайтар авч чадвал даван туулах боломж байна.

Үүнд нэлээд анхаарах ёстой.  Ялангуяа хөгжиж буй орнууд зохион байгуулалтаа сайжруулж, урьдчилан сэргийлэх ажилдаа илүүтэй анхаарах хэрэгтэй байна гэж ярьсан.  Тэр утгаараа манай улс дотооддоо урьдчилан сэргийлэх арга хэмжээ авч, цагаан сарыг тэмдэглэхгүй байхаар шийдсэн. Энэ нь ДЭМБ-ын зөвлөмжийг дагаж байгаагийн нэг илэрхийлэл юм. Хүн төрөлхтний өмнө тулгарч байгаа энэ аюулыг бүгд нэгдсэн мэдээлэлтэй, нэгдмэл байдлаар л давж чадна" хэмээлээ.  

Сангийн дэд сайд Х.Булгантуяа "БНХАУ бол Монгол Улсын хамгийн том худалдааны түнш. Монгол Улсад хамгийн хүнд цаг үед тусалдаг. Бүс нутгийн худалдааг хөгжүүлэх, боомтуудын үйл ажиллагааг сайжруулах чиглэлээр бидэнтэй хамтран ажиллаж ирсэн. 2010 оноо хойш гэхэд л Монгол Улстай 1.5 тэрбум ам.долларын гэрээг байгуулаад, боловсрол, дэд бүтэц гэх мэт нэн шаардлагатай томоохон бүтээн байгуулалтуудыг хийж байгааг та бүхэн харж байгаа байх. Шинэ цэвэрлэх байгууламж, Налайхын зам гэх мэт томоохон төслүүдийг дурьдаж болно.  

Сүүлийн жилүүдэд тэрбум юанийн буцалтгүй тусламжийг Монгол Улсын Засгийн газарт олгосон.  Энэ хүрээнд боловсролын салбарт багагүй хөрөнгө оруулалтыг хийсэн. Онцгой байдлын ерөнхий газрын техник, тоног төхөөрөмжүүдийн хангамжийг сайжруулах, хөгжлийн бэрхшээлтэй иргэдийн спорт цогцолбор байгуулах гэх мэт Монгол Улсад нэн шаардлагатай хөрөнгө оруулалт, зээл, буцалтгүй тусламжуудыг олгож ирсэн улс. Тиймээс ард иргэд, аж ахуйн нэгжүүдээ энэ хүнд цаг үеэд хамтран ажиллаж, мөнхийн хөршдөө дэмжлэг үзүүлэхийг уриалж байна" хэмээлээ. 

Хэрвээ та хандивын аянд нэгдэхийг хүсвэл  төрийн банкны 3413 0343 2597 данс руу шилжүүлэхэд болох юм байна.