АН-ын зөвлөлөөс ээлжит хэвлэлийн хурлаа хийлээ.
Тус зөвлөлийн дарга Д.Эрдэнэбат хэлэхдээ “Өнгөрсөн хугацаанд Засгийн газарт үүсч болох эдийн засгийн эрсдлийн асуудлаар тодорхой саналууд хүргүүлсэн. Харамсалтай нь өнөөдрийг хүртэл энэ асуудалд тодорхой хариу шийдэл өгсөнгүй.
Энэ нөхцөл байдлыг АН дүгнээд өнөөдөр тулгамдаад байгаа гол асуудлыг анхааралдаа авч, дахин санал шаардлага хүргүүлэх нь зүйтэй гэж үзсэн. Монгол банкны бодлогын хүүг нэг хувиар бууруулсан, хэрэглээний зээлийг тодорхой хугацаагаар хойшлуулсан гэж байгаа боловч хэрэгжилт, үр дүн нь хангалтгүй байгааг хэлэх хэрэгтэй. Мэдээж ахицтай зүйлүүд байгаа гэдэгтэй санал нэгдэж байгаа. Дэмжих юмаа дэмжиж, болохгүй байгаа эрсдлийг хэлж ярих нь зүйтэй.
Тиймээс өнөөдөр гурав дахь саналаа хүргүүлж байна. Зөвхөн Засгийн газрын хэмжээнд биш УИХ-д хүргүүлэх нь зүйтэй гэж үзлээ. Цар тахал нэрээр УИХ-ын гишүүд нь танхимдаа ч цуглахаа байлаа. Ажлаа хийхээ байлаа. Айл өрхүүд цалин мөнгөгүй амьдарч байна. Аж ахуй нэгжүүд цалингүй чөлөө олгож байна. Тиймээс АН дуугаа хүргэх ёстой гэж үзсэн. Өнөөдөр бид айл өрх, иргэдийн орлогыг хамгаалах тухай санал, шаардлагыг УИХ, засгийн газарт хүргүүлж байна. Манайхаас бусад улс оронд төсвийн тодотгол хийгээд ажил нь хэрэгжиж байна. Манайд ямар ч чимээ алга. Мэдээж иргэдээ хамгаалах нь энэ тэргүүний үүрэг гэдгийг ойлгож, энэ ажлыг нь дэмжиж байгаа. Гэхдээ эндээс үүдэн гарах өрхийн орлого үнэхээр дундарч байна.
УИХ яаралтай хуралдах хэрэгтэй. Цуглах уу, цахимаар хуралдах уу гэдгээ УИХ-ын дарга өнөө маргаашгүй шийдэх ёстой.
Яаралтай Төсвийн тодотгол хийх, эрсдлийн сан байгуулах, хувийн хэвшилд ажиллаж байгаа хүмүүсийн цалингийн хэмжээг бууруулахгүй байх тал дээр анхаарч ажиллах, ЖДБ эрхлэгчдийг бага хүүтэй зээлээр хангах, өргөн хэрэглээний импортын барааны татварыг чөлөөлөх, экспортыг шуурхай дэмжих шаардлагатай боллоо. Бөөнөөрөө цугларахгүй гэж байгаа бол цахимаар ч болтугай хуралдаж яаралтай асуудлуудаа шийдэх хэрэгтэй байна” гэлээ.
Сэтгэгдэл бичих