Энэ удаагийн “ЖИНХЭНЭ ЖДҮ” буландаа хаягдал түүхий эдийг ашиглан тэмээний чөмөгний тос үйлдвэрлэдэг Д.Наранхүүг урьж, ярилцлаа. Тэрбээр 2017-оноос хойш тэмээний чөмөгний тосыг үйлдвэрлэлийн түвшинд боловсруулан, савлан борлуулдаг болжээ. Өрхийн үйлдвэрлэлээ жижиг дунд үйлдвэрлэлийн түвшинд хүргэхийн тулд хичээж яваа бизнес эрхлэгчдийн нэг. Тэрбээр худалдаа үйлчилгээний сургуулийг төгссөн худалдагч мэргэжилтэй. Өрхийн бизнесээ эхлүүлж байх үедээ цөөн тоогоор үйлдвэрлэж, 10-аад ширхэг тос цүнхлээд томоохон зах, дэлгүүрүүдийн худалдагчдад борлуулдаг байжээ. Түүний бизнесийг өргөжүүлэхэд жил бүр зохиогддог үзэсгэлэн худалдаанууд маш их тус болдог. Тэмээний чөмөгний тосыг Монголчууд эрт дээр үеэс эмчилгээний журмаар хэрэглэж ирсэн уламжлалтай билээ.
-Та өрхийн үйлдвэрлэлээ хэдэн оноос эхлүүлсэн бэ?
Бүтээгдэхүүнээ худалдаанд гаргаад гурван жилийн хугацаа өнгөрлөө. Бид тэмээний чөмөгний тосыг бэлтгэн савлахдаа маш цэвэрхэн орчинд хийдэг. Тоснуудаа ихэвчлэн эмнэлэгт хүргэж өгдөг. Учир нь хэвтрийн эмчилгээнд байгаа хүний арьсыг цооруулахгүй байх, бэртэл гэмтэл, харшлын гаралтай өвчлөлд маш сайн байдаг. Настай хүмүүс үе мөчний өвчлөлд түрхэхээс гадна бүх насны хүмүүс хэрэглэж болдог. Сүүлийн үед үе мөчний өвчин маш их залуужиж байна. Үүний шалтгаан нь буруу хооллолт ажил мэргэжлийн олон шалтгаанаас хамаарч өөрөөр байдаг болов уу. Эдгээр өвчлөлд өртсөн бол заавал хүчтэй эм тариа хэрэглэхийн оронд Монгол малын гаралтай бүтээгдэхүүн хэрэглэсний буруу гэж байдаггүй. Тэмээний чөмөгний тос нь маш үр дүнтэй. Үр дүн нь хурдан хугацаанд мэдэгддэг учраас авсан хүмүүс маш ам сайтай байдаг.
-Үйлдвэрлэл эрхлэх санаагаа анх хэрхэн олсон бэ?
-Би өмнө нь дайвар бүтээгдэхүүний худалдаа эрхэлдэг байсан. Тэр үед Хүчит шонхор захаас бүтээгдэхүүнээ авдаг байхад өндөр настай хүмүүс тэмээний чөмгийг маш их захидаг байсан. Тэгэхдээ тэмээний чөмгийг боловсруулаагүй бүтнээр нь авчирч өгдөг байсан. Тэмээний чөмөгний тос маш сайн гэсэн амнаас ам дамжсан яриа их сонсож байсан. Тэгээд л тэмээний чөмөгний тосыг боловсруулж үйлдвэрлэгч гэдэг санаагаа хэрэгжүүлсэн. Үйлдвэрлэлийн анхны бүтээгдэхүүнүүдээ хүмүүст сурталчлахын тулд үнэгүй тараадаг байсан. Хэрэглэсэн хүмүүс ам сайтай байсан нь урам өгсөн.Тэмээний чөмөгний тосыг боловсруулан савлахад чанарын шинжилгээ өгч шаардлагын хангаад бизнес эрхлэх боломжтой юм байна гэж бодсон. Жижиг ч гэсэн энэ бизнес манай өрхийн орлогод тодорхой хэмжээгээр хувь нэмэр оруулах болсон. Манайд энэ бүтээгдэхүүнийг үйлдвэрлэхэд маш хатуу шаардлагууд олон байдаг. Би борлуулалтаа бүтээгдэхүүний савлагаан дээрээ утасны дугаараа тавьчихсан учраас захиалсан хүмүүст өөрөө хүргэж өгдөг.
Жижиг дунд үйлдвэрлэл эрхлэгч Д.Наранхүүгийн ажил, амьдралын тухай сонирхолтой ярилцлагыг хүргэж байна.
-Тэмээний чөмөгний тосыг хэрхэн боловсруулж, савладаг технологийг хуваалцвал?
Энэ хэдийгээр уламжлалт аргаар ашиглах тос боловч манайх тэмээний тосыг шаргайж биш маш зөөлөн температурт жигнүүрт жигнэж боловсруулдаг. Учир нь жигнэхгүй бол хүнд хэрэгтэй элементүүд нь устах магадлал өндөр. Монголчууд тэмээний чөмгийг уламжлалт аргаар хэрэглэхдээ ихэвчлэн түүхийгээр нь хэрэглэдэг байсан. Жигнэж боловсруулах нь амьтны гаралтай тосны үнэрийг дардаг. Хүмүүс тэмээний чөмөгний тосонд анхилуун үнэр оруулах боломжтой. Өнгө, үнэр оруулах талаар зөвлөдөг. Гэвч өнгө, үнэр оруулбал тосны өөрийн чанар өөрчлөгдөж, ашигтай бактери нь устах магадлалтай. Мөн өнгө, үнэр оруулснаар бүтээгдэхүүний үнэ өснө. Одоогоор 30 гр тосыг 6000, 60 гр нь 6000, 90 гр нь 9000 төгрөгөөр борлуулагддаг. Хүмүүс Солонгос, Чехэд хөдөлмөр эрхэлдэг хүүхдүүддээ мш их явуулдаг. Тэнд үнэтэй, сайхан үнэртэй тос олон байдаг ч тэр болгон монгол хүнд тохирдоггүй юм билээ.
-Тэмээний чөмөгний зөвхөн өвчлөлөөс гадна өөр ямар хүмүүс хэрэглэхэд зохимжтой вэ?
-Тэмээний чөмөгний тос нь харшлын гаралтай өвчлөлд маш сайн. Мөн арьсыг маш хурдан төлжүүлдэг. Заавал өвтэй хүн хэрэглэх албагүй залуучууд бэлтгэл сургуулилтын дараа бие булрах зовиур илэрдэг. Тэр үедээ тэмээний чөмөгний тосыг хэрэглэх нь маш үр дүнтэй. Бүх насныхан хэрэглэх боломжтой.
-Бараа бүтээгдэхүүнээ борлуулах маркетингийн ямар аргыг ашигладаг вэ?
-Миний маркетингийн арга гэвэл бүтээгдэхүүний савлагаан дээрээ өөрийнхөө утасны дугаарыг бичсэн байдаг. Утасны дугаараар холбогдсон захиалагчдад бүтээгдэхүүнээ үнэгүй хүргэж өгдөг. Мөн хамгийн чухал нь үзэсгэлэн худалдаанд оролцох байдаг. "Мишээл экспо"-гоос гадна, ЖДҮ-ийг дэмжих төв, Худалдаа аж үйлдвэрлэлийн танхим, аймгуудын төвд өөрсдийнх нь брэнд бүтээгдэхүүний үзэсгэлэн болдог.
Сэтгэгдэл бичих