Д.Нямхүү: 681 хүний шинжилгээний хариу бүгд сөрөг гарлаа

ЭМЯ-наас өдөр бүрийн 11:00 цагийн ээлжит мэдээллээ хүргэлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  12 сая 600 мянган  хүн өвчилж, 561 мянган хүн нас баржээ. 7.3 сая хүн эдгэрч, эмнэлгээс гарч, 4.7 сая хүн эмчлүүлж байна.  Сүүлийн 24 цагийн дотор дэлхий дахинд 231 мянган хүн шинээр коронавирусийн халдвар авлаа. Энэ нь нэгдүгээр сараас хойш хамгийн олон хүн халдвар авсан тохиолдол боллоо. Өвчлөл өмнөх өдрийнхөөс 19 мянгаар нэмэгдэж, нас баралт ижил түвшинд байна.

24 цагийн дотор  АНУ-д 59 мянга, Бразил улсад 42, Энэтхэгт 25 мянган хүн коронавирусийн халдвар авсан нь өвчлөл хамгийн өндөр байгаа  эхний гурван улс болсон байна. Тиймээс ДЭМБ-аас “Дэлхийн олон орон коронавирусийн халдвараас хурдан салах боломжгүй байна. Халдварын тохиолдлыг бууруулж чадсан улсуудад халдвар дахин голомтлон гарч эхэллээ. Олон хүн цугларан халдвар тархсан тохиолдолд халдварын голомтыг цомхтгох маш хэцүү болоод байна. Тиймээс халдвар цаашдаа голомтлон тархах эрсдэл өндөр байгааг анхааруулж байна” хэмээн мэдээлсэн.  Мөн Колумбиагийн Их сургуулийн эрдэмтэд коронавирус нь уушгийг гэмтээхээс гадна зүрх судас, бөөр гэх мэт олон эрхтнүүдийг гэмтээж байгааг судалгаагаар нотолжээ. Тиймээс эрүүл мэндийн байгууллагын ажилтнуудыг зөвхөн уушгины өвчлөл гэдэг ойлголтоос салахыг зөвлөжээ.

  ОХУ-д 24 цагийн дотор  6635  хүн шинээр коронавирусийн халдвар авч, 174  хүн нас баржээ. Манай олон аймагтай хил залгадаг Буриад, Тува, Читид 39-45 хүн халдвар авсан байна. Өвчлөл буурах хандлага ажиглагдаж байна. Манай орны хувьд  ажиглалтад шинээр  124 хүн орж, 22 хүн гарч, гэрийн тусгаарлалтад шилжсэн. Одоогоор 3154 хүн ажиглалтад байгаа.  Үүнд 1-5 насны 200 хүүхэд, 107 жирэмсэн эмэгтэй, 307 архаг хууч өвчтэй хүн байгаа. Цэргийн төв эмнэлэгт одоогоор 60 хүн хэвтэн эмчлүүлж байна" хэмээлээ.

ХӨСҮТ-ийн захирал Д.Нямхүү "2020 оны долдугаар сарын 10-ний өдөр ХӨСҮТ-ийн вирус судлалын хоёр, Дархан-Уул аймгийн салбар лаборатори, ЗӨСҮТ-ын явуулын хоёр лабораторид  нийтдээ 681 хүний сорьцоос шинжилгээ авахад, бүгдэд нь коронавирус илрээгүй. ХӨСҮТ-д тусгаарлагдсан 13, тусгаарлах байранд тусгаарлагдсан 262  хүний сорьцод шинжилгээ хийхэд вирус илрээгүй.  Тусгаарлах байранд байгаа 18 хүнээс давтан шинжилгээ хийсэн. Алтанбулагийн боомтоор орж ирсэн  169 иргэн, Багабаянд тусгаарлагдсан 100 хүний давтан шинжилгээ сөрөг гарсан. Мөн Алтанбулаг боомтоор орж ирсэн ачаа тээврийн 14 жолооч, Дорноговь аймгийн боомтоор орж ирсэн 99 жолоочийн сорьцод  коронавирус илрээгүй.

Өнөөдөр ХӨСҮТ-өөс гурван хүн эдгэрч, дараагийн шатны сувилал руу шилжсэн. Монголд батлагдсан тохиолдол 227, эдгэрсэн хүн 200, одоо 27 хүн эмчлүүлж байна” хэмээлээ.