Д.Нямхүү: 426 хүний шинжилгээний хариу сөрөг гарч, нэг хүн эдгэрсэн

ЭМЯ-наас өдөр бүрийн 11:00 цагийн ээлжит мэдээллээ хүргэлээ.Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  15 сая 101 мянган  хүн өвчилж, 622 мянган хүн нас баржээ. 9.2 сая хүн эдгэрч, эмнэлгээс гарч, 5.3 сая хүн эмчлүүлж байна.  Сүүлийн 24 цагийн дотор дэлхий дахинд 202 мянган хүн шинээр коронавирусийн халдвар авч, 4000 гаруй хүн нас барсан байна. ДЭМБ-аас халдвар бага насны болон сургуулийн насны хүүхдүүдийн дунд тархах магадлал өндөр болоод байгаа энэ үед сургууль цэцэрлэгийн үйл ажиллагааг нээхдээ халдвар хамгааллын онцгой дэглэмийг сайтар сахих ёстой гэдгийг сануулсан байна.

ОХУ-д 24 цагийн дотор  5862 хүн шинээр коронавирусийн халдвар авч, өвчлөл 789 мянгад хүрлээ.  Манай олон аймагтай хил залгадаг Буриад, Тува, Читид халдвар 19-38 хүнээр нэмэгдлээ. Тувад 35 тохиолдол шинээр бүртгэгдэж, батлагдсан тохиолдол 5832 боллоо.

Манай орны хувьд  ажиглалтад шинээр  23 хүн орж, 52 хүн гарч, гэрийн тусгаарлалтад шилжсэн. Одоогоор 2958 хүн ажиглалтад байгаа.  Үүнд 1-5 насны 227 хүүхэд, 123 жирэмсэн эмэгтэй, 333 архаг хууч өвчтэй хүн байгаа. Үүргийн онгоцоор ирсэн 68 хүн Цэргийн төв эмнэлэгт хэвтэн эмчлүүлж байна. Үүнээс 4 хүний биеийн байдал хүндэвтэр, эрчимт эмчилгээний тасагт байна" хэмээлээ.

ХӨСҮТ-ийн захирал Д.Нямхүү "2020 оны долдугаар сарын 22-ний өдөр ХӨСҮТ-ийн вирус судлалын хоёр, Дархан-Уул аймгийн салбар лабораторид нийтдээ 426 хүний сорьцоос шинжилгээ авахад, бүгдэд нь коронавирус илрээгүй сөрөг гарлаа. Тодруулбал,

-2020 оны долдугаар сарын 21-нд Токио-Улаанбаатар чиглэлийн онгоцоор ирсэн 260 хүний шинжилгээ,

-2020 оны долдугаар сарын 21-нд Австралиас ирсэн 48 хүний шинжилгээ,

-Идэвхтэй тандалтын зорилгоор хийсэн 14 сорьц,

-Алтанбулагийн боомтоор орж ирсэн ачаа тээврийн 34 жолоочийн шинжилгээ,

-ХӨСҮТ-д тусгаарлагдсан 8 хүний давтан шинжилгээ,

-Ажиглах байранд тусгаарлагдсан 60 хүний давтан шинжилгээ,

-Дархан-уул аймагт тусгаарлагдсан хоёр хүнд шинжилгээ хийхэд бүгд сөрөг гарлаа.

Өнөөдөр нэг хүн эдгэрч, дараагийн шатны тусгаарлалтад шилжиж байна. Энэ нь 34 настай эмэгтэй бөгөөд 15 хоног эмчлэгдээд гарч байна. Монголд батлагдсан тохиолдол 287, эдгэрсэн хүн 214, одоо 73 хүн эмчлүүлж байна. ХӨСҮТ-д 107 хүн эмчилгээ, тандалтад байгаа" хэмээлээ.