Д.Нямхүү: Гурван монгол, хоёр орос иргэн эдгэрч,дараагийн сувилал руу шилжлээ

ЭМЯ-наас өдөр бүрийн 11:00 цагийн ээлжит мэдээллийг хүргэлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  17 сая 404 мянган  хүн өвчилж, 677 мянган хүн нас баржээ. 10 сая гаруй хүн эдгэрcэн байна.  Сүүлийн 24 цагийн дотор дэлхий дахинд 282 мянган хүн шинээр коронавирусийн халдвар авсан байна. Өмнө нь өдөрт 200 гаруй тохиолдол бүртгэгддэг байсан бол сүүлийн үед 300-аар нэмэгддэг боллоо. Энэ өвчлөл 24 цагийн дотор АНУ-д 68 мянга, Энэтхэгт 57 мянга, Бразил улсад 52 мянган хүн шинээр халдвар авсан нь өвчин эхээр бүртгэгдсэн эхний гурван орны тоонд багтаж байна.

ОХУ-д 24 цагийн дотор 5482 хүн шинээр коронавирусийн халдвар авч, 161 хүн эндсэн байна. БНХАУ-д 168 тохиолдол шинээр бүртгэгдсэний зургаан гадаадаас зөөвөрлөгдөн орж ирсэн өвчлөл байна. Мөн БНСУ-д 31 тохиолдлоор өвчлөл нэмэгдэж тэдгээрийн 23 нь гадаад улс орноос ирсэн зөөвөрлөгдөн орж иржээ.

Манай орны хувьд  ажиглалтад шинээр 32 хүн орж, 258 хүн гарч, гэрийн тусгаарлалтад шилжсэн. Одоогоор 2335 хүн ажиглалтад байна. Үүргийн онгоцоор ирсэн 58 хүн Цэргийн төв эмнэлэгт хэвтэн эмчлүүлж байна. Үүнээс 2 хүний биеийн байдал хүндэвтэр, эрчимт эмчилгээний тасагт байна.

24 цагийн хугацаанд 119 дугаарт 136 дуудлага ирж, шуурхай аппт гадаадын ОХУ, Чех, Белги зэрэг улсаас  манай 5 иргэн  холбогдож, зөвлөгөө авсан" хэмээлээ.

ХӨСҮТ-ийн захирал Д.Нямхүү "2020 оны долдугаар сарын 31-ны өдөр ХӨСҮТ-ийн вирус судлалын хоёр, Дархан-Уул аймгийн салбар лабораторид нийтдээ 306 хүний сорьцоос шинжилгээ авахад бүгдийнх нь сорьцод коронавирус илрээгүй. Бусад шинжилгээнд хамрагдсан хүмүүсийг дэлгэрэнгүй танилцуулъя.

-2020 оны долдугаар сарын 30-нд Сөүл-Улаанбаатар чиглэлийн онгоцоор ирсэн 265 хүний шинжилгээ

-ХӨСҮТ тусгаарлагдсан 4 хүн

-Ажиглах байранд тусгаарлагдсан 6 хүний давтан шинжилгээ,

-Идэвхтэй тандалт авсан 7 хүний сорьц

-Дархан-Уул аймагт тусгаарлагдсан 1 хүний шинжилгээ

-Дорноговь аймгийн Замын-Үүдэд тусгаарлагдсан 2 хүн

-Алтанбулагийн боомтоор орж ирсэн ачаа тээврийн 25 жолоочийн шинжилгээнээс коронавирус илрээгүй байна.

Өнөөдөр бидэнд сайн мэдээ байна. Таван хүн эдгэрч дараагийн ХӨСҮТ-өөс гарч дараагийн сувилал руу шилжиж байна. 63 настай хүн 39 хоног, 35 настай хүн 51 хоног, 23 настай эмэгтэй 18 хоног, 20 настай эмэгтэй 18 хоног эмчлэгдсэн. Ингээд хоёр Орос, гурван Монгол хүн эмчлэгдэж дараагийн шат руу шилжлээ. Монголд батлагдсан тохиолдол 291, эдгэрсэн хүн 230, одоо 61 хүн эмчлүүлж байна. Эдгээр хүмүүсийн биеийн байдлыг үнэлбэл 58 хүн хөнгөн, 3 хүн хүндэвтэр байна. ХӨСҮТ-д Ажиглалт, тандалтын дор 85 хүн байна. Тандалт судалгаа үргэлжилж байна. Дараагийн үүргийн онгоцоор ирэх хүмүүсийг хүлээж авах бэлтгэл ажлыг бүрэн ханган ажиллаж байна” хэмээлээ.