А.Амбасэлмаа: Афганистан улсаас ирсэн хоёр цэргээс коронавирусийн халдвар илэрлээ

ХӨСҮТ-ийн Тандалт судалгааны албаны дарга А.Амбасэлмаа "2020 оны наймдугаар сарын 01-ны өдөр ХӨСҮТ-ийн вирус судлалын хоёр, Дархан-Уул аймгийн салбар лабораторид нийтдээ 455 хүний сорьцоос шинжилгээ авахад 453 хүнээс коронавирус илрээгүй. Хоёр хүний дөрөв дэх давтан шинжилгээгээр халдвар илэрлээ. Энэ нь Афганистан улсаас ирсэн хоёр цэрэг дайчид юм.

Бусад шинжилгээнд хамрагдсан хүмүүсийг дэлгэрэнгүй танилцуулъя.

-2020 оны наймдугаар сарын 01-нд Сөүл-Улаанбаатар чиглэлийн онгоцоор ирсэн 246 хүний шинжилгээ

-ХӨСҮТ тусгаарлагдсан 4 хүний шинжилгээ,

-Цэргийн төв эмнэлэгт тусгаарлагдсан 23 хүний давтан шинжилгээ,

-Эмчилгээний дараах сувилалд тусгаарлагдсан 9 хүний давтан шинжилгээ,

-Афганистан улсаас ирсэн 65 цэрэг дайчдын шинжилгээ,

-АНУ-ын Сиатл  руу нисэх нислэгийн багийн 16 хүний шинжилгээ,

-Дорноговь аймгийн Замын-Үүдэд түр тусгаарлагдсан 60 хүний шинижлгээ,

-Алтанбулагийн боомтоор орж ирсэн ачаа тээврийн 29 жолоочийн шинжилгээнээс туc тус коронавирус илрээгүй байна.

Монголд батлагдсан тохиолдол 293, эдгэрсэн хүн 230, одоо 63 хүн эмчлүүлж байна. Эдгээр хүмүүсийн биеийн байдлыг үнэлбэл 60 хүн хөнгөн, 3 хүн хүндэвтэр байна. ХӨСҮТ-д ажиглалт, тандалтын дор 88 хүн байна. Тандалт судалгаа үргэлжилж байна. Дараагийн үүргийн онгоцоор ирэх хүмүүсийг хүлээж авах бэлтгэл ажлыг бүрэн ханган ажиллаж байна” хэмээлээ.