МЕТРО хот: Явган хүний замыг зогсоол гэж андуурах хэрэггүй, жолооч нар аа

Арван нас ч хүрээгүй дүү бид хоёрын хооронд ийм нэгэн яриа өрнөв.

Дүү: Та “Явган хүний замаараа алхаж байгаарай, машины замаар алхаж болохгүй шүү” гэж захидаг тийм ээ?

Б: Тэгэлгүй яахав. Машины замаар явах чинь аюултай шүү дээ.

Дүү: Гэхдээ явган хүний замаар машин явж болдог юм байна лээ.  Өглөө сургуульдаа ирэх үед явган хүний зам дээр “томоо” жийп зогсчихсон байсан.

Б: Машинаа явган хүмүүс алхдаг зам дээр тавьж болдоггүй юм аа миний дүү. Хэрвээ тэгж байрлуулбал цагдаа ирээд загнадаг байхгүй юу?

Дүү ч ойлголоо хэмээн хариулав. Сургууль, цэцэрлэг хичээллэж эхлэхтэй зэрэгцэн хүүхэд багачуудад ямар нэгэн эрсдэл үүсэх нь элбэг. Магадгүй машинаа явган хүний зам дээр байрлуулсан жолооч ч хүүхдэдээ явган хүний замаар аюулгүй зорчоорой гэж захидаг байх. Гэхдээ та хандлагаа өөрчлөөгүй байхад таны хүүхэдтэй ийм тохиолдолтой таарах нь энүүхэнд.

Алганд минь багтахаар жаахан гарыг нь атгасаар дүү бид хоёр цааш алхав. Хорь ч хүрэхгүй алхмын цаана дүүгийн яриандаа өгүүлсэн шиг бандгар жийп явган хүний зам дээр ташуулдан зогсож байлаа. Хэн ингэж тавьсныг мэдэхгүй ч, ганц хүний увайгүй үйлдэл дүүдээ хэлсэн миний үгийг худал болгохын зэрэгцээ цэвэрхэн хувцасласан, өнгөлөг унаатай залууд бусдыг хүндлэх сэтгэл л дутчихлаа даа гэсэн бодол төрөв.

Явган хүний замыг зогсоол гэж хардгаа хэзээ болих вэ жолооч нар аа. Дахин дахин сануулья. Тэр замаар зөвхөн энгийн хүмүүс алхдаггүй гэдгийг ойлгох хэрэгтэй байна. Найман настай балчираас наян настай буурлууд, хэдхэн сартай нярайгаа салхилуулж буй тэрэг түрсэн ээж, таягаа тулан яваа доголон эр, хөгжлийн бэрхшээл хэмээх зүйлээр хөлөө тушуулсан залуус гээд хүн болгон явганаараа зорих эрхтэй зам шүү дээ. Түүнээс биш хэн нэгний зогсоол олдоогүйн төлөө ашиглах талбар огтхон ч биш. Хэдийгээр нийслэл хотод машины зогсоолын хүрэлцээ хомс хэдий ч өөрийн амин асуудлаа шийдвэрлэхийн тулд өрөөлд хүндрэл үүсгэх нь хэр зөв бэ? Жолооч нар аа.

Ийм л энгийн жишээнээс харахад манай нийслэлд машинтай мөртлөө дураараа нөхөд олон. Бүр дүрэм журмыг зөрчих гэж гаргадаг гээд дүрмээ мөрдөхөөсөө илүү зөрчихөө урьтал болгодог жолоочдыг соёлжуулах хэрэгтэй байна. Бусдад төвөг учруулахгүйгээр асуудлаа шийднэ гэдэг ч өөрөө соёл. Бусдын эрх, миний эрхээр хязгаарлагдах учиргүй гэдгийг бодолцож буруу газар байрлуулсан машинаараа явган хүний эрхийг “ХАШИХ”-аа зогсоогоорой.

Ц.Янжиндулам