"Дарханы замын 2 болон 4 дүгээр багц хэсгийн замын ажлыг ирэх хавар эхлүүлэхээр төлөвлөж байна"

Дарханы зам шинэчлэлийн ажил эхэлсэнээс хойш жил гаруй хугацаа өнгөрсөн ч одоо хүртэл явц нь тааруу байгаа. Мөн тус замыг барих хятадууд Дарханы замыг тавихаас татгалзсан гэх мэдээлэл гараад буй. Тиймээс үүсээд буй асуудал, нөхцөл байдлын талаар Улаанбаатар-Дархан чиглэлийн авто замын ажлын зөвлөх С.Очирбатаас тодрууллаа.  

-Дарханы зам шинэчлэлийн ажил нэлээн удаашралтай байгаад иргэд ихээхэн шүүмжлэлтэй хандаж байгаа. Яг ямар учраас ингэж удаад байгаа юм бэ? 

-Дарханы замыг таван багц болгон хуваасан. Одоогоор нэг болон 3, 5 дугаар багц хэсэг дэх замын ажил хэвийн үргэлжилж байна. Харин хоёр болон дөрөвдүгээр багцын гүйцэтгэгч Шинжааны хоёр компанийн гэрээг цуцлахаар болсон. 

-Яг ямар учраас цуцалж байгаа юм бэ? 

-Хар модот давааны араас Урьхан хүртэлх 45.5 км авто замыг хийх БНХАУ-ын “Чайна Стэйт Шинжиан Констракшн Инженеринг” компани, Сүмбэрийн уулзвараас Цайдамын хөндий хүртэлх 45.06 км авто замыг хийх БНХАУ-ын “Чайна Стэйт Шинжиан Констракшн Инженеринг” компаниудын гүйцэтгэл 8-9 хувьтай байна. Учир нь цар тахалын улмаас эдгээр компаниудын ажилчид ирж чадахгүй болсноо мэдэгдэж, гэрээгээ цуцлах санал тавьсан. Нөхцөл байдалд нэгэнт боломжгүй байгаа учраас гэрээг нь цуцлахаар болсон. Ингээд ЗТХЯ-наас ажлын хэсэг байгуулагдаад ажлын гүйцэтгэл, орон нутгийн гүйцэтгэгч байгууллагын өр, авлага зэргийг тогтоохоор ажиллаж байна. Өөрөөр хэлбэл, гэрээ цуцлах үйл ажиллагаа явагдаж байгаа. 

-Хоёр компанийн гэрээг цуцалж байгаа учраас 2 болон 4 дүгээр багц хэсгийн замыг барих компаниудад дахин тендер зарлах уу? 

-Тэгнэ. Тендерийг арванхоёрдугаар сард дахин зарлаж, ирэх жилийн хавар гэхэд замын ажлыг эхлүүлэх төлөвлөгөөтэй байна. Хятад компаниудтай гэрээгээ дүгнэхэд хоёр талаас маргаан гарахгүй бол тендерийг хурдан зарлах боломжтой. Хэрвээ маргаан үүсвэл тендерийг зарлах боломжгүй. Учир нь маргаан дуустал ажил эхлүүлэх, үргэлжлүүлэх боломжгүй гэсэн үг. 

-Гүйцэтгэл нь хэвийн явагдаж байгаа замуудын ажил ямар шатандаа байна вэ. Хэдийгээр Дарханы замыг нээх боломжтой вэ? 

-Нэгдүгээр багц 70, гуравдугаар багц 49, тавдугаар багц 48 хувьтай байна. Хучилтын ажлууд хийгдэж байгаа. Гүүр хоолой, далан, суурийн ажил дууссан. Эхний багц хэсгийн замын асфальтын ажил аравдугаар сарын 15-20-ны үеэр дуусах байх. Цайдамын хөндийгөөс Дарханы тойрог уулзвар хүртэлх 30.53 км, Баруунхараагаас Баянчандмань хүртэлх 45.74 км авто замуудын асфальт хараахан хийгдэж эхлээгүй байна. Уг замуудад цементээр бэхжүүлсэн суурийн ажлаа хийж байна. Хэрвээ асфальтын ажил хугацаандаа амжихгүй тохиолдолд хөдөлгөөнийг нээхээс өөр аргагүй. Замын ажил дууссан дуусаагүйгээс үл шалтгаалан арваннэгдүгээр сарын 01-нээс үндсэн замаар хөдөлгөөн нээх юм. 

-Тэгвэл зам шинэчлэлийн ажил нь бүрэн хийгдээгүй хоёр болон дөрөвдүгээр хэсгийн зам нээгдэх үү? 

-Эдгээр замуудын 20 гаруй километр замын хучилтыг хуулчихсан. Хучилтыг нь хуулчихсан учраас тэр хэсгийн замын хөдөлгөөнийг хэрхэн, яаж нээх вэ гэдэг дээр зохицуулалт хийх шаардлага үүсээд байгаа. Ингээд тодорхой хэмжээнд засварын ажил хийж, машин явахад тоос, шороо босохооргүй янзалж хийхээр болсон. 

-Дарханы замд нийт хэчнээн хүн ажиллаж байгаа вэ. Хятадаас ажилчид бий юу? 

-Гурван багцын хүрээнд 500 гаруй ажилчид ажиллаж байна. Долдугаар сарын 7-нд Хятадаас тоног төхөөрөмжийн операторууд орж ирсэн. Түүнээс хойш хэд хэдээрээ цувж орж ирсэн. Хятад ажилчид мэргэжлийн байгууллагын дор 21 хоног тусгаарлагдаж, 14 хоног талбай дээрээ өөрсдийгөө ажигласны дараагаар ажлаа эхэлж байна. Хамгийн сүүлд наймдугаар сарын 27-нд есөн хятад ажилчин талбай дээр ирсэн. Хятад ажилчдыг оруулж ирэхэд хугацаа алдсан гэж харж байгаа. Хэрвээ зургадугаар сард орж ирсэн бол замын ажил дуусчих боломжтой байсан. Нийт 48 хятад ажилчин Дарханы зам дээр ажиллаж байна.

Мөн хүн хүч хүрэлцэхгүй асуудлууд гарч байгаа. Сүүлд л гэхэд 45 орчим орон нутгийн ажилчин гэр рүүгээ явсан. Хятад компаниуд нь хүн хүчээ хайж байна л гэсэн. Бүр болохгүй бол цэрэг оруулах талаар ч яригдаж болох юм. Дарханы чиглэлд сүүлийн өдрүүдэд бороо их орсноор замын ажилд хүндрэл үүсч байна. Байгалийн болон урьдчилан тооцоогүй асуудлууд их гардаг.

--Хугацаандаа багтаж замын ажлаа дуусгаагүй бол тухайн зам дээр үүссэн эвдрэлийг тухайн компани өөрсдийн хөрөнгөөр янзлах уу?

-Тухайн хариуцсан хэсгийн авто зам дээр эвдрэл үүсвэл гүйцэтгэгч өөрийн зардлаар засвар хийнэ.