Метро хот: Жолооч нар аа, унадаг дугуйтай зорчигчдоос 1.5 метрийн зайтай зөрж сурцгаая

Нийслэлчүүдийн толгойны өвчин болсон түгжрэлийг бууруулахын тулд хүн бүр өөрсдийнхөөрөө элдэв санаа дэвшүүлж,  олон арга сүвэгчилж байна. Хотын удирдлагууд түгжрэлийг бүрэн арилгах амар биш, асуудлыг шийдвэрлэхэд олон жилийн хугацаа шаардлагатай болохыг мэдэгдсэн.

Иргэдээс түгжрэлийг бууруулах хамгийн зөв арга зам юу байж болохыг асууж тодруулахад. Зарим нь хурдны галт тэрэг, автомашины тоог нэмэгдүүлэхгүй барих эсвэл хүн бүр машин унахын оронд унадаг дугуй унадаг байх хэрэгтэй. Энэ л хамгийн зөв шийдэл байх хэмээн ам уралдана. Унадаг дугуй унах нь хүний эрүүл мэндэд ч сайн талтай гэх юм. Үүнийг үгүйсгэх аргагүй.

Улаанбаатар хотод унадаг дугуйтай тээврийн хөдөлгөөнд оролцдог багагүй хүмүүс байгаа харагддаг. Гэвч тэдгээр хүмүүст зориулсан дугуйн зам хотод хараахан алга. Зарим нь автозамын хөдөлгөөнд автомашинтай уралдах шахам давхилдана. Мөн зам дагуу түгжрэх машины хажуугаар зөрөхдөө хэн нэгний машиныг зурах шахам шахцалдан зөрж харагдана. Нөгөө хэсэг нь замын уулзвар, гарцан дээр машинд мөргүүлэх шахам тулж зогсоно. Томчууд ч яахав,  ямар нэгэн аргаар хөдөлгөөнд аюулгүй оролцдог байх. Харин бага насны хүүхдүүд хотын төв, гэр, хороолол гээд хаана ч хамаагүй байшин, барилгын булан тохой тойроод хаанаас ч юм гарч ирээд машинтай наалдах шахдаг. Энэ болгоныг хэний буруу болохыг тунгаах хэцүү юм.

Учир нь нийслэл хотод унадаг дугуй зорчих зориулалтын зам хараахан хангалттай байхгүй байна. Хаа сайгүй хагарч, цууран эвдэрсэн машин замуудыг одоо болтол янзлаагүй байхад дугуйн замтай болно  гэдэг мөрөөдөл шиг хол сонсогдож байгаа байх. Гэвч дугуйн зам байхгүй байлаа гээд дугуй унаж болохгүй гэсэн үг биш юм. 20-30 минут зарцуулах газарт очихын тулд 2-3 цаг түгжрэхийн оронд унадаг дугуйгаар яваад хүрэх нь амар байх. Гэвч Улаанбаатар хотод унадаг дугуйгаар аюулгүй зорчих боломж хомс юм. Зарим жолоочид унадаг дугуйгаар зорчигчдыг замын хөдөлгөөнд анхаарал болгоомжгүй оролцдог хэмээн шүүмжилдэг. Тэгвэл  дэлхий дээр жилд 1.3 сая хүн авто замын ослоор нас барж байна. ДЭМБ-аас гаргасан судалгаагаар ослоор нас барсан хүмүүсийн  53 хувь нь явган, дугуй, мотоциклтой хөдөлгөөнд оролцож байжээ. Энэ судалгаанаас харахад автомашинтай хүмүүс эдгээр ослуудын дараа хамгаалалтын бүс зүүж хөдөлгөөнд оролцсон  бол амиа алах эрсдэл бага. Харин алхаж байгаа болон дугуйтай хүмүүсийг автомашинаар шүргээд өнгөрөхөд л амь насаа алдах өндөр  эрсдэлтэй. Доорх зурган дээрх дугуйчин /2020.10.06/ны өдөр  ачааны машинд мөргүүлж харамсалтайгаар амь насаа алджээ.

Тиймээс жолооч нараа гэнэтийн осол, эрсдэлээс сэргийлж автомашины уулзвар, булан тохойгоор эргэхдээ дугуйтай хүнээс дор хаяж 1.5 метрийн зай барьж зөрж байгаарай. Түгжрэл, цаашлаад унадаг дугуйн замыг шийдээгүй байхад жолоочид бид яах билээ, өөрсдийнхөөрөө замаар л явна гэж бодохын оронд унадаг дугуйгаар зорчиж байгаа цөөхөн хэдхэн зорчигчдыг хүндэтгэн замын хөдөлгөөнд оролцож байгаарай.