Ялсан нь ямбаа ихдүүлэлгүй, "ял"-аа сайн үүрээрэй

Орон нутгийн сонгууль болж, нийслэлд МАН үнэмлэхүй ялалт байгууллаа. 45 суудлын 34-т нь МАН-ын төлөөлөгчид сууна. 2016 оны сонгуулиар Ардын нам УИХ, нийслэл, 20 аймагт ялалт байгуулж, Засгийн бүх эрхийг шат шатандаа авсан. Энэ удаад ч тэглээ. Ардчилсан нам 8 аймаг, 1 дүүрэгт ялсныг эс тооцвол. Ард түмэн дахиад л МАН-д итгэл хүлээлгэв. У.Хүрэлсүхийн Засгийн газарт итгэж, тэдэнтэй хүчээ нэгтгэж дахиад дөрвөн жил ажиллаг гэж нийслэлд МАН-ыг сонгосон байх. С.Амарсайхан Засаг даргаар ажиллахдаа Су.Батболдоос арай дөнгүүр байсан нь ч нөлөөлөө биз. Ямар ч байсан ирэх дөрвөн жилд МАН-ыг улс орныг, нийслэлийг өөд нь татаж, өнгө оруулж, асуудлыг шийд гэж шат шатанд л сонголоо. Одоо "Хүчээ нэгтгэе" гэдэг уриагаа л ажил хэрэг болгох үлдэв. 

Ялсан нам гээд ямбаа хэт эдлээд, "ял"-аа үүрэхээ мартав аа. Муухай хэлж байна гэж битгий бодоорой. Монголчууд Улаанбаатар хотынхоо утаанд хордоод, зам дээр нь түгжирч, тэг зогсолт хийгээд, тэвчээд дахиад 10, 20 жил болохгүй. Сая анхны цас хальтхан ороход түгжрэл дээд цэгтээ хүрч, иргэд яаж бухимдав. Дахиад нэг тэг зогсолт хийхэд л тэвчээр нь барагдана. За даа, энэ өвлийг давах болов уу, иргэдийн тэвчээр. Тиймээс алгуурлалгүй өнөөдрөөс бүх асуудлаа шийдээд, Засаг даргаа сонгоод, ажилдаа хурдхан ороорой. Харин хэнийг Засаг даргаар томилохоос чинь ажил хэрхэн урагшлах нь шийдэгдэх биз. Өмнөх дөрвөн жилд ажилласан хоёр Засаг даргаас л хүний ялгаа ямар вэ гэдэг нь тод томруунаар харагдсан. Засаг дарга болж магадгүй хэдэн хүний нэр гараад байна билээ. Дунд нь ямархуу муу ажиллахаа харуулсан хүмүүс ч тууж явна билээ.  Бодолцоно биз. 

Ажлаа түгжрэлээс эхлэх байх гэж найдаж байна. Өмнөх даргын үед хийж хэрэгжүүлэхээр төлөвлөж байсан ажлуудаас хэрэгтэйг нь аваад, хурдхан бодлогоо гаргана биз. Түгжрэлийг бууруулахын тулд автомашиныг тэгш, сондгойгоор нь явуулах шийдэл яриад байсан. Үнэхээр зөв гэж үзэж байвал нүдээ аниад ч хамаагүй хэрэгжүүл. Автобус, унааныхаа тоог нэмээрэй. Өнгөрсөн дөрвөн жилд нийслэлийг удирдахдаа нийтийн тээврийн парк шинэчлэлийг огт хийгээгүй. Ирэх дөрвөн жилд хийж үзээрэй. Одоо л иргэд өглөө, оройдоо ид ачааллын цагаар автобус, унаандаа багтахгүй "алалцаж" байгаа. Ээ дээ, иргэдээ л бодож үзээрэй.

Автобус авахдаа дундаас цавчаа хийдгээ болиорой. Сая сургуулийн автобус оруулж ирсэн.  Нэг автобус нь 266 сая төгрөгийн үнэтэй гээд л байгаа. Гэтэл зарим иргэд 40 мянган ам.долларын үнэтэй байгааг зураг хөрөгтэй нь гаргаж ирээд л тавиад байна. Энэ асуудлаа ч гэсэн шийдээрэй. Одоо худалдан авалт хийхдээ цавчихаа болихгүй бол хүн бүр интернэтээс үнийг нь хараад, гаргаад ирнэ. Тав алхалгүй баригдана.  

Сонгуулиар амласан амлалтуудаа, мөрийн хөтөлбөрөө биелүүлээрэй. Дарга нарт хаягдчихсан, баячуудад адлагдсан гэр хорооллоо хөгжүүлэхийн төлөө ажил хийгээрэй. Шинэ замууд тавиарай, сургууль, цэцэрлэгээ бариарай. Шуудхан хэлэхэд, өнгөрсөн дөрвөн жил шиг дүлий ажиллавал 2024 онд сонгогчид "өгзөг" рүү чинь амбаардах нь ойлгомжтой байна. Орон нутгийн сонгуулийн үр дүн олон зүйлийг хэллээ. Эх орон, ард түмнийхээ төлөө олигтойхон ажилла, татвар төлөгчдийн мөнгийг зөв зарцуул. Юу ч болсон далимдуулаад, дарга нараа янз бүрээр урамшуулаад, "идээд" байвал. Дураараа дургиад, орон нутгаа хөсөр хаявал шударга ёс, хууль цааз нь үйлчилдэггүй юм бол ард түмэн сонголтоороо өөрчилж болдгийг харуулав. 

Ардчилал ялснаас хойш 30 жилийн хугацаанд МАН ялагдаж үзээгүй олон аймагт АН яллаа. Ард түмэн өөрчлөлтийг, орон нутагт хөгжлийг хүсэж байна. Юу ч хийхгүй болохоор чинь солилоо. АН түүхэндээ ийм олон аймагт ялалт байгуулж байгаагүй гээд хэлчихэд буруудахгүй. Энэ бол иргэд ажил хийж чадахыг нь сонгоно гэдгээ илэрхийлсний дохио. Дахиад хэлэхэд, нийслэлд У.Хүрэлсүхийн багт итгэсэндээ МАН-ыг дахин олонх болголоо. Ядаж л Э.Бат-Үүлийн тогтоосон жишигт хүрээд ажиллаасай гэсэн итгэл шүү.  Ээ дээ, энэ их итгэлийг нь ажиллаж л хариулаарай даа.  Дөрвөн жилийн дараа нийслэлийн удирдлагууд нь Засгийн газрын хийсэн ажлыг булаацалдаад, түгжрэл нь дээд цэгтээ тулаад, утаагаараа амьсгалаад, гэр хороолол нь улам "сөнөөд" сууж байвал тэр цагт иргэдийн итгэлийг дахиж хүлээнэ гэж горьдолтгүй гэдгийг мартаж болохгүй. Энэ удаагийн сонгууль ийм сануулгыг хангалттай өглөө.