"Тавантолгой түлш"-ийнхэн зарласан тендерээ гацааж, Хятадын компанид тал засав уу

Наадмын дараа намар гэдэг. Ирэх өвлийн бэлтгэл хангах ажил эхнээсээ өрнөж байна. Гэвч Улаанбаатар хотын утааг багасгах зорилготой шахмал түлшний гол орц болох барьцалдуулагчийн тендер зарлагдаад таг гацжээ. Санаж байвал, өнгөрсөн өвөл шахмал түлшний угаарт маш олон хүн хордсон. Иймээс ч Хятадаас чанаргүй барьцалдуулагч оруулж ирэхийн оронд үндэсний үйлдвэрүүдийнхээ дунд тендер зарлаж нийлүүлэгчээ сонгон шалгаруулахаар төлөвлөөд байсан аж. Угаасаа Тендерийн хуулиараа дотооддоо үйлдвэрлэх боломжтой бараа, бүтээгдэхүүнийг гаднаас илүү өндөр үнээр худалдаж авахыг хуулиараа тас хориглодог. Харамсалтай нь, барьцалдуулагч нийлүүлэх компанийг сонгон шалгаруулах энэхүү тендерийг “Тавантолгой түлш” компанийнхан ямар ч үндэслэлтэй шалтгаан хэлэлгүйгээр зүгээр л “царцааж” орхив. Эндээс л зарим хардлага төрж байгаа юм. Эх сурвалжуудын хардаж буйгаар, энэ бол хэсэг бүлэг нөхдийн бизнестэй шууд холбогдож байгаа юм байна. Тэр тусмаа Хятадын компаниудын лобби асар хүчтэй өрнөж, “Тавантолгой түлш”-ийн тендерийг таг гацаагаад буй бололтой.

Өнгөрсөн өвөл Хятадаас авчирсан барьцалдуулагч нь иргэдийн эрүүл мэндэд ноцтой хохирол учруулсан учраас энэ жил тендер зарлаад байсан юм. Гэвч гэнэт л зарласан тендерээ шалтгаангүйгээр таг гацаасан нь Хятадын компани нэмж оруулж ирэх гэсэн сонирхлын зөрчилтэй нь холбоотой ажээ. Нэг хэсэг хүний хэтэвчийг зузаатгах гэж нийгмээрээ хятад барьцалдуулагчаас хордож болзошгүй энэхүү нөхцөл байдалд мэргэжлийн байгууллагууд, хууль хяналтынхан анхаарал хандуулахгүй бол горьгүй нь. Учир нь хятад барьцалдуулагчаас хүний биед хортой хар тугалга мэтийн химийн маш олон элементүүд илэрч байсан. Энэ нь ч өнгөрсөн жил мэргэжлийн хяналтын байгууллагуудын удаа дараагийн дүгнэлтээр тогтоогдсон. Утаанаас үүдэлтэй толгой эргэх, дотор муухайрах зэрэг шинж тэмдэгүүд, үүнээс ч илүү мэдэгдэхгүйгээр үүсэж буй ноцтой үр дагаврууд нь ерөөсөө барьцалдуулагчтай холбоотой. Гэвч мэргэжлийн хяналтын байгууллагуудын шалтгалтын хэл ам таталсан дүгнэлтийг хэн нэгэн маш сайн дарж чадсан байдаг.

Товчхондоо дотоодын үйлдвэрүүд бүрэн хангах боломжтой барьцалдуулагчийг “Тавантолгой түлш”-ийнхэн Хятадаас өндөр өртөгтэйгөөр авах сонирхолтой байгаа нь цаанаа эрх мэдэл, албан тушаалтнуудын шахааны бизнесээс үүдэлтэй. Тиймээс авлига үнэртсэн энэ асуудлыг АТГ зэрэг шалгах ёстой байгууллагууд нь шалгамаар байна. Үндэсний үйлдвэрүүд нь чанартай бүтээгдэхүүн нийлүүлэх боломжтой байхад Хятадаас өндөр үнэтэй барьцалдуулагч авахаар тендерээ гацааж байгаагийн цаана өөр ямар шалтгаан байх билээ. Нэг хэсэг хүнийг мөнгөжүүлэхийн тулд нийтээрээ эрүүл мэндээрээ хохирч болохгүй!!!