Хүүхдийг Ивээх Сан хүмүүнлэгийн тусламжийн хөтөлбөрийг зудад өртсөн орон нутгийн малчдын хүүхдүүдийн боловсрол, эрүүл мэндийн эрсдэлийг бууруулах зорилгоор Швейцарын хөгжлийн агентлагийн санхүүжилтээр хэрэгжүүлж байгаа юм.
Дэлхийн цаг агаар, уур амьсгалын өөрчлөлт болон хүний хүчин зүйлээс шалтгаалан манай улсад зуд, үер, түймэр, шуурга зэрэг байгалийн гамшиг цөөнгүй тохиолддог. Эдгээр болзошгүй гамшгийн үед хүүхдэд сэтгэлзүйн анхны тусламж үзүүлэх чадвар чухал шаардлагатай байдаг. Тиймээс Хүүхдийг Ивээх Сан хүмүүнлэгийн тусламжийн хөтөлбөрийнхөө хүрээнд хүүхдэд тусламж үзүүлэх мэргэжилтнүүдийн ур чадвар, чадамжийг дээшлүүлэхэд чиглэсэн “Хүүхдэд үзүүлэх сэтгэлзүйн анхны тусламж” сургалтыг Ховд аймгийн Ховд хотод 2023 оны 5 дугаар сарын 4-5-нд зохион байгууллаа.
Сургалтад Ховд аймгийн Онцгой байдлын газрын аврагчид, мэргэжилтнүүд, Боловсролын газрын мэргэжилтнүүд, аймгийн төв болон бүх сумын ерөнхий боловсролын сургуулийн нийгмийн ажилтнууд, дотуур байрны багш нар зэрэг нийт 66 хүн оролцож, хүүхдэд сэтгэл зүйн анхны тусламж үзүүлэх арга зүйд суралцлаа. Мөн оролцогчид “Хүүхдэд үзүүлэх сэтгэл зүйн анхны тусламж” сургалтын гарын авлага хүлээн авав.
Ховд аймгийн Манхан сумын ЕБС-ийн дотуур байрын багш Б.Мягмаржав “Их сургуулиа төгсөөд хоёр жил болж байгаа болохоор сэтгэлзүйн анхан шатны тусламжийн мэдлэг багатай байсан. Сургалтаас нэлээд их шинэ мэдлэг олж авлаа. Хүн өөрөө сэтгэлийн амьтан байдаг. Тэгэхээр хүнд хэцүү нөхцөлд орсон, амьдралд нь цочирдом үйл явдал тохиолдсон байгаа хүүхдүүд, хүмүүст сэтгэл санааны анхны дэм дэмжлэгийг өгснөөр тэр хүүхдийн ирээдүйн амьдралын зам мөрийг засаж, эерэг байдал төрүүлэх, сайн сайхан зүйл рүү чиглүүлэхэд нь тусалж байгаа явдал гэж ойлгосон” хэмээн ярилаа. Мөн Ховд аймгийн ОБГ-ын гал түймэр унтраах 48-р ангийн аврагч гал сөнөөгч Б.Лхагвабаяр “Гамшигт нэрвэгдсэн, ар гэрийн хүчирхийлэлд өртсөн бага, өсвөр насны болон насанд хүрсэн хүмүүст сэтгэлзүйн анхан шатны тусламж хэрхэн хүргэх, дараа дараагийн байгууллагуудтай яаж холбож, аюулгүй газар аваачих талаар мэдээлэл өгсөн, аргачлал заасан сургалт боллоо. Маш их мэдлэг олж авлаа. Миний ажлын онцлогоор, иймэрхүү гамшиг, хямралын нөхцөлд орсон байдал амьдралд нэлээд их тохиолддог учраас маш хэрэгтэй сургалт боллоо” гэж сэтгэгдлээ хуваалцлаа.
Сэтгэгдэл бичих