А.Энхжин: Ипотекийн зээлээ хойшлуулаагүй 34 мянган иргэнд өгөх 7 тэрбум төгрөгийг удахгүй олгоно

Монголбанкнаас өчигдөр цаг үеийн асуудлаар мэдээлэл хийсэн. Энэ үеэр Монголбанкны Нөөцийн удирдлага, санхүүгийн зах зээлийн газрын захирал А.Энхжингээс ипотекийн зээлээ хойшлуулаагүй иргэдийн 8 хувийг зээлийг 3 сарын хугацаанд 6 хувь болгож бууруулах шийдвэр хэзээ хэрэгжих талаар тодрууллаа.

-Коронавирусээс болж, санхүүгийн хямралд орсон иргэдээ дэмжих үүднээс Засгийн газар ипотекийн зээл төлөлтийг дөрөвдүгээр сараас аравдугаар сарын 1 хүртэл хойшлуулах шийдвэр гаргасан.  Харин зээл төлөлтөө хойшлуулаагүй иргэдийн зээлийг найман хувиас зургаан хувь болгон бууруулж, дэмжлэг үзүүлэхээр болсон. Гэвч хоёр хувийн зөрүүг одоо болтол шийдэж өгөөгүй байгаа гэсэн мэдээлэл гараад байгаа.  Энэ талаар мэдээлэл өгөөч?

-Цар тахалтай холбогдуулж гаргасан хуулийн дагуу Монголбанк, Сангийн яамнаас ипотекийн 8 хувийн зээлтэй иргэдэд зээлийнхээ эргэн төлөлтийг 6 сарын хугацаанд хойшлуулах боломж олгосон.  Энэ арга хэмжээг хэрэгжүүлж эхэлснээс хойш нийтдээ 38 мянган иргэний 2 их наяд төгрөгийн зээлийн хугацаа аравдугаар сарын 1 хүртэл хойшлогдсон байгаа. Үүний цаана байгаа 34 мянган иргэний хувьд УИХ-аас гаргасан тогтоол, хуулийн дагуу гурван сарын хугацаанд 2 хувийн хүүгийн татаас олгохоор байгаа. Үүнд 34 мянган иргэн хамрагдана. Одоогоор бид иргэдийнхээ тоон мэдээллийг нэгтэж, эцэслээд ажиллаж байна. Төсвийн тодотгол хийж байгаа энэ үед Сангийн яамныхны ажлын ачаалал нэлээд их байгаа. УИХ-ын ээлжит бус чуулган өндөрлөж, төсвийн тодотголыг хийж дууссаны дараа бид Сангийн яамтай хамтраад 7 орчим тэрбум төгрөгийн хүүгийн татаасыг 34 мянган иргэнд олгоно. Удахгүй энэ ажлыг хийнэ.

-Монголбанкны Мөнгөний бодлогын хорооноос эдийн засгийн хүндрэлтэй нөхцлийн улмаас эргэн төлөлт нь доголдсон хэрэглээний зээлд бүтцийн өөрчлөлт хийж, хугацааг сунгах арга хэмжээг 2020 оны арванхоёрдугаар сарын 31-ний өдрийг дуустал хэрэгжүүлэх шийдвэр гаргасан. Ипотекийн зээлийн эргэн төлөлтийн хугацааг хойшлуулах талаар яриагүй байсан. Яваандаа зээлийн төлөлтийг хойшлуулах хугацааг сунгах уу?

-8 хувийн ипотекийн зээлтэй иргэд аравдугаар сарын 1 хүртэл зээлийн эргэн төлөлтөө хойшлуулсан. Тэгэхээр хойшлуулсан хугацаа нь дуусаагүй байна. Нөхцөл байдал цаашид ямар байх нь вэ. Иргэдийн хувьд төлбөрийн ямар дарамт үүсэх нь үү гэдгийг бид судалж үзнэ. Тэгээд тухайн үед нь шийдвэр гаргаж болно. Иргэд зээлийн эргэн төлөлтийн хугацаагаа сунгах юм бол хоёр хувийн хүүгийн хөнгөлөлтийг эдлэхгүй. Ийм л зохицуулалттай байгаа.