XXI зууны “Эйнштейн” таалал төгсчээ

Дэлхий дахинаа нэрд гарсан эрдэмтэн одон орон судлаач Стивен Уильям Хокинг 76 насандаа таалал төгсчээ.

Их Британийн онолын физикч Стивен Хокингийг өнөө цагийн буюу  XXI зууны “Эйнштейн”  хэмээн нэрлэдэг байсан бөгөөд түүний шинжлэх ухааны бүтээлүүд нь  Википедиад дурдснаар бол Рожер Пенрөүзтэй хамт хийсэн харьцангуйн ерөнхий онолын тогтолцоо доторх татах хүчний сингуляр байдлын талаарх теоремүүд, мөн өнөө үед Хокингийн цацраглал (эсвэл Бекенстайн-Хокинкийн цацраглал) хэмээн нэрлэгдэх болсон хар нүх цацраг ялгаруулдаг гэж таамагласан онол юм.

Энэ их эрдэмтэн 1942 оны 1 сарын 8-нд төрж, хожим Оксфорд болон Кембрижийн их сургуулийг төгсч хэрэглээний математик болон онолын физикийн салбарт амжилттай ажиллаж байв.

Тэрбээр  1979 оноос 2009 оны 10 сарын 1 хүртэл гучин жилийн турш Кембрижийн их сургуулийн Лукасын нэрэмжит математикийн профессороор ажиллажээ.

 Хокинг нь космологи ба квант татах хүчний чиглэлүүдэд, ялангуяа хар нүхний талаар судалгаа ололтоороо олны дунд танигдсан. Өөрийн боловсруулсан онолууд болоод космологийг ерөнхийд нь хэлэлцсэн нийтийн шинжлэх ухааны бүтээлүүдээрээ мөн амжилт олсон. Үүнд, Британийн Сандэй Таймс-н бестселлерийн жагсаалтад рекорд эвдэн 237 долоо хоногийн турш байсан Цаг хугацааны товч түүх (A Brief History of Time) номоороо ихэд алдаршсан хэмээн  лавлахад өгүүлжээ

Тэрбээр  эрчим хүчний хэт их үйлдвэрлэл, хэрэглээний улмаас 100 жилийн дараа дэлхийд сүйрлийн аюул нүүрлэж болзошгүйг  хүн төрөлхтөнд сануулж байсан билээ.

Стивен Хокинг 1965 онд Жейн Уайльд  гэх эмэгтэйтэй нэгэн үдэшлэгийн үеэр танилцаж улмаар гэрлэжээ. Жейн Уайльд   их эрдэмтэнд хүү охин хоёр төрүүлж өгсөн ч 1991 онд гэр бүл салжээ. Харин хүүхдүүд нь эцгээ бүхий л амьдралынх нь туршид бүхий талаар дэмжиж тусалж ирсэн байна.

Хокинг нь мэдрэл-булчингийн дистрофи өвчний улмаас олон жил шаналж байв.

 Бэлтгэсэн: М.Нэргүй