Монгол түмэн минь дэнж хотойтол сайхан наадаарай

Хол байсан “хойтон жил”-ийн наадам маань ирлээ.  Монгол түмэн энэ жил Тулгар төр байгуулагдсаны 2228, Их Монгол Улсын 813 жил, Ардын хувьсгалын 98 жилийн ойн  баяраа  тэмдэглэнэ.  

Дэлхийд ганцхан монгол наадмаараа дэнж хотойтол нааддаг ард түмэн гэвэл бид. Хүчит бахчүүд зүлэг ногоон дэвжээндээ дэвж шавж, хурдан хүлгүүд  нь Хүй долоон худгийнхаа номин хөндийд хурдаа сорьж, эрхий мэргэн харваачид цэцээ шалгадаг эрийн гурван наадам эхэлж байна.

Наадмын угтал болгож “Төрийн далбаа”-ны өдрийг тэмдэглэдэг уламжлалтай. Тэр ёслол өнөөдөр болж байна. Энэ үеэр цэргийн парад жагсаж, 14.00 цагаас дээлтэй монгол наадам  эхэлж 18.00 цаг хүртэл үргэлжилнэ.

Энэ жил 13 дахь жилдээ зохиогдож байгаа “Дээлтэй Монгол наадам”-ыг  Сүхбаатарын талбайд зохион байгуулна.  Өнөө жилийн хувьд ОХУ-ын Буриад улсаас, БНХАУ-ын ӨМӨЗО-оос төлөөллүүд "Дээлтэй Монгол" наадамд ирж оролцож байна.  Наадмын үеэр шилдэг үндэсний хувцастай дүүрэг, байгууллага, гэр бүл, хүүхэд мөн шилдэг үндэсний хувцастай эрэгтэй, эмэгтэй, гадаад жуулчныг тус тус шалгаруулах юм.

Үндэсний их баяр наадмын хүрээнд нийслэлийн хэмжээнд дөрвөн арга хэмжээг зохион байгуулахаар төлөвлөөд буй.  Дээрхи “Дээлтэй Монгол” наадам” үүний нэг нь юм.

Мөн  7 сарын 11,12-нд “Улаанбаатарын үдэш эх орноо  магтан дуулъя” үдшийн шоу тоглолт 21:00 цагаас Сүхбаатарын талбайд болно. Тоглолтын дараа  чиглэл бүрд нийтийн тээврээр үйлчлэх учраас Та шөнө орой, унаа унаш гэж санаа зовор хэрэггүй.

Нийслэлчүүдийг хүлээж байгаа бас нэг гайхалтай сюрприз бол энэ сарын 13-нд АСА циркийн өмнөх  задгай талбайд “Сөүл хотын захиргааны нэрэмжит өдөрлөг” юм.  Энэ жил  Сөүл, Улаанбаатар хотын ах дүүгийн харилцаа тогтоосны 25 жилийн ой тохионо.  Дэрэхи өдөрлөг бол энэ ойг угтан зохиогдож байгаа юм. Энэ үеэр Сөүл хотын захиргаанаас  Пёнчанийн өвлийн олимпд үзүүлсэн лазер шоуг үзүүлэх юм байна. Пёнчанийн олимпын биер болон цэнхэр дэлгэцээр үзсэн хэн боловч энэхүү лазер шоуны гайхамшигийг анзаарсан байх. Тэгвэл энэ шоу наадмын өдрүүдэд Нийслэл хотноо дахин амилах гэж байна.

Ингээд Та бүхэндээ өнөөдөр болох  үйл явдал, үзвэр үйлчилгээний хөтөлбөрийг хүргэж байна.

ӨНӨӨДӨР ТАНЫ ҮЗЭХ ҮЗВЭР

7 дугаар сарын 10. Лхагва гараг

08.00-11.00 Хязаалан насны морьдын уралдаан Хүй долоон худагт

08.00-22.00 Шагайн харвааны хэсгийн тоглолт Шагайн асарт

08.30-14.30 Үндэсний сурын хана харвааны эхэн өрөг Сурын талбайд

10.00-11.00 Төрийн далбааны өдөрт зориулсан Хүндэтгэлийн ажиллагаа, цэргийн ёслолын жагсаал ЖанжинД.Сүхбаатарын талбайд

10.00-18.00 Монголын сайхан орон шилдэг бүтээлийн үзэсгэлэн Монголын урчуудын эвлэлийн хорооныүзэсгэлэнгийн байр

13.00-13.30 Жанжин Д.Сүхбаатарын хөшөөнд цэцэг өргөх, Их эзэн Чингис хааны хөшөөнд хүндэтгэл үзүүлэх ёслол Жанжин Д.Сүхбаатарын талбайд

14.00 -18.00 Дээлтэй Монгол наадам Жанжин Д.Сүхбаатарын талбайд

14.00-16.30 Шүдлэн насны морьдын уралдаан Хүй долоон худагт

14.30-20.30 Үндэсний сурын хана харвааны дунд өрөг Сурын талбайд

15.00 ; 18.00 Төрийн хүндэтгэлийн концерт Нийслэлийн Соёлын төв өргөө

20.00 Монгол Улсын Төрийн тугийг цэнгүүлэх ёслол Жанжин Д.Сүхбаатарын талбайд

Г.Тулга