ЖИНХЭНЭ ЖДҮ: Шингэн алт гэгддэг шар тосыг нэг удаагийнхаар савлаж байна

ЖДҮ-ийн хөгжил ямар байхаас шалтгаалж ажлын байр нэмэгдэж, эдийн засаг өснө. Тиймээс бид жинхэнэ ЖДҮ яагаад чухал вэ. Өнөөдөр тэд ямар байдалтай байна вэ. Бизнесийн хөрөнгөө яаж "босгодог” вэ гэх мэт олон асуултад хариулт авахаар "ЖИНХЭНЭ ЖДҮ" буланг ажиллуулж, жижиг дунд үйлдвэрлэл эрхлэгчдээ оролцуулан, тэдний дуу хоолойг олон нийтэд хүргэж байгаа.

Өмнөх дугааруудаараа бид  "Цагаан солонго" эсгий урлалын үйлдвэр,  “Debra Mongolia” дотуур хувцасны үйлдвэр, "Үр минь" бренд, хэмнэлттэй цахилгаан халаагуур хийдэг "Hybrid house" компани гэх мэт маш олон ЖДҮ-чидтэй ярилцсан. 

Харин энэ удаагийнхаа дугаарт ЖДҮ эрхлэх хүсэлдээ хөтлөгдөн, жижиглэн савлагааны үйлдвэр байгуулж, өөрийн гэсэн хэрэглэгч, үйлчлүүлэгчидтэй болсон, цаашлаад хогийг ангилан ялгах, дахин боловсруулах үйлдвэртэй болох том мөрөөдөлтэй Б.Жавхаа гэх бүсгүйг урьж,  оролцууллаа. 

Тэрбээр өөрийн гэсэн хувийн бизнесээ эхлүүлээд гуравхан жилийн нүүрийг үзэж байгаа ч хөдөлмөр зүтгэлийнхээ хүчинд долоон хүнийг байнгын ажлын байраар хангаж, Tom N Toms, Shangri-La, Blue sky гэх мэт том компаниудад бүтээгдэхүүнээ нийлүүлэн,  амжилттай ажиллаж яваа чадварлаг ЖДҮ-чин юм. 

Түүний хамгийн сүүлд худалдаанд гаргасан нэг удаагийнхаар савласан шар тос нь олон хүний таалалд нийцэж, эрэлттэй бүтээгдэхүүнээр нэрлэгдээд байгаа юм.