Сурвалжилга: Хүнд цүнх хүүхдүүдийн ирээдүйд заналхийлж байна

Дөнгөж сургуульд орсон зургаан настнуудын үүрч яваа цvнх өөрт нь ахдаад буйг хэн бүхэн анзаарч, олон жилийн турш ярьсаар ирсэн. Гэхдээ үүнд анхаарал хандуулж, тэдний ачааг хөнгөлөх тал дээр шийдтэй юм ярьж , хийж байгаа албан тушаалтан нэг ч байхгүй.

Тиймээс бид хүүхдүүд хэдэн кг ачааг нуруундаа үүрч, юу бодож явдгийг нь сонирхсон юм. 14 дүгээр сургуулийн нэгдүгээр ангийн сурагчдын хичээл өдөр 13.30 цагт эхэлдэг аж.  Биднийг 13.30 цагийн үед тус сургуульд очиход,  ногоон, ягаан, цэнхэр өнгөтэй цүнх үүрсэн хүүхдүүд хаа сайгүй "холхилдож" байсан юм. Зарим нэг нь ээж аавдаа бариулсан, зарим нь өөрсдөө үүрсэн харагдана.

Бага ангийн хүүхдүүд өдөрт дунджаар 4-5 цагийн хичээлд суухдаа 3-4 өөр төрлийн хичээлийн ном, дэвтэр, хажуугаар нь үзэг, балны сав, ном тогтоогч, аяга таваг, бэлтгэлийн хувцас зэргийг цүнхэндээ багтаан, түүнийгээ сургууль руугаа явах, ирэхдээ нуруундаа үүрсээр явдаг. Энэ бүгд нийлээд ойролцоогоор 4-5 кг жин татдаг бөгөөд хүүхдийн биеийн жин, өндөр нам ямар байхаас үл хамааран тэд энэ их ачаатай цүнхээ хичээлийн жилийн турш үүрдэг гэсэн судалгаа байдаг юм байна.

Зарим улс оронд хүүхдийн цүнхний хүндийн жин нь тухайн хүүхдийн биеийн жингийн 10-15 хувиас хэтрэхгүй байх нь зохимжтой гэж үздэг байна. Тэгвэл манай улсын зургаан настай эрэгтэй хүүхдийн биеийн жин дунджаар 19.2 кг, эмэгтэйнх нь 18.8 кг байдаг. Тэгэхээр зургаан настнууд буюу нэгдүгээр ангийн сурагчийн цүнх дээд тал нь 2 кг-аас хэтрэхгүй жинтэй байх нь зохистой аж. Гэтэл бидний ирээдүй болсон бяцхан үрс өнөөдөр хоёроос гурав дахин хүнд цүнх үүрч байна.

Хэтэрхий хүнд цүнх байнга үүрч явдаг хүүхдийн нуруу маш их ачааллын улмаас бага багаар сууж, нурууны гэмтэл үүсэх гол эх үүсвэр нь болдог байна. Ид өсч яваа биеийг өдөр бүр хүнд жингээр дарж, дээрээс нь нуруунд суулт өгч эхлэх нь хүүхдийн өсөлтийг багаас нь бууруулж байдаг аж. Гэтэл одоо гадуур худалдаалагдаж буй сурагчийн цүнхнүүд голдуу овор ихтэй, хүнд жинтэй. Цүнх нь өөрөө хүнд, дээрээс нь олон ном, дэвтэр хийчхээр томчууд бид ч өдөржин үүрч явахаас халширам хүнд болчихдог.

Тиймээс сурагчдын цүнх болон номын жин хэмжээ стандарт анхаарлаа хандуулах цаг хэдийнэ болжээ. Дээрх асуудалд салбар яамны сайд, багш сурган хүмүүжүүлэгч, эцэг эхчүүд аль аль нь анхаарлаа хандуулахгүй бол ирээдүй болсон бяцхан хүү охин тань эрдэм ном сурах гэсэн биш, эрэмдэг болох вий. Тэд маань өнөө маргаашдаа элдэв бэрхшээл өвчин хэлэхгүй ч ирээдүйд учирч болох бусад болзошгүй өвчлөлд өртвөл хэн хариуцах вэ.
Эцэст нь та бүхэндээ бусад улс орнууд хүүхдийн цүнхний асуудалд хэрхэн анхаарал хандуулж, ямар стандарт тогтоосныг сонирхуулъя.

Австрали

Австралийн Нуруу нугасны мэргэжлийн багаас гаргадаг сэтгүүлд сургуулийн насны хүүхдийн үүрч яваа цүнхний дундаж нь тэдний нас, биеийн онцлогт тохироогүй болохыг тогтоосон байна. Иймд тэд сургуулийн бага насны хүүхдийн үүрч явах ачааны хүндийн дундаж хэмжээг тогтоож стандарт гаргасан байна.
Сургуулийн сурагчдын 79.1 хувь нь тэдний цүнхний ачаа хүнд байдаг, 65.7 хувь нь цүнх хүнд байгаагаас болж ядардаг, 50.0 хувь нь хүнд цүнх үүрсний улмаас нуруу нь өвддөг болохыг тогтоосон байна.

Оросын хүүхдийн цүнхний стандарт

Анги болон цүнхний ачааны дундаж хэмжээ

1-2-р анги 1,5 кг-аас илүүгүй

3-4-р анги 2,0 кг-аас илүүгүй

5-6-р анги 2,5 кг-аас илүүгүй

7-8-р анги 3,5 кг-аас илүүгүй

9-11-р анги 4,0 кг-аас илүүгүй.

БНХАУ

2014 онд хийсэн судалгаагаар сургуулийн сурагчдын 30.8 хувь нь өөрийн биеийн жингийн 10%-иас хэтэрсэн хүнд жинтэй цүнхийг барьж байгааг тогтоожээ. Тэдний 88.2% нь хүзүү, мөр, нуруу нь өвддөг гэж хариулсан байна. Сурагчдын 35.4 хувьд хүнд цүнх барьж явдгаас шалтгаалсан булчин өвдөлт байдгийг илрүүлсэн байна. Нуруу бага зэрэг өвддөг сурагчдад удаан алхах, сургууль дээрээ удаан суудаг, Хүнд цүнх барьж явах зэрэгтэй хамааралтай болохыг тогтоосон байна. Сургуулийн сурагчдын 19 хувь нь л сургууль дээрээ ном, дэвтрээ хадгалах хайрцагтай байдаг аж.