Тойм: Цагаан сар тэмдэглэхгүй байх шийдвэр гарч, улсын хилийг бүрэн хаалаа

Өнгөрсөн долоо хоногт улс оронд өрнөсөн онцлох үйл явдлуудыг тоймлон хүргэж байна. 

Ерөнхийлөгч Х.Баттулга Цагаан сар тэмдэглэхгүй байх зарлиг гаргаж, Засгийн газар дэмжив 

Монгол Улсын Ерөнхийлөгч Х.Баттулга энэ долоо хоногт Цагаан сарын баярыг тэмдэглэхгүй байх, болзошгүй аюулаас урьдчилан сэргийлэх зорилгоор Монгол Улсын Ерөнхийлөгч Х.Баттулга Засгийн газарт чиглэл өгөх тухай зарлиг гаргасан.  Тэр дундаа Цагаан сарын баярт зориулсан олон нийтийг хамруулсан үзэсгэлэн худалдаа, мэдээллийн хэрэгслээр явуулах реклам, сурталчилгааг даруй зогсоох, хэвлэл мэдээллийн хэрэгслээр шинэ коронавирусийн халдвараас урьдчилан сэргийлэх иргэдийн үүрэг, хариуцлага, уг халдварын хор хөнөөлийг ухуулан ойлгуулах ажлыг хэвлэл, мэдээллийн байгууллагуудтай хамтран зохион байгуулахыг үүрэг болгосон. 

Засгийн газар ч энэ дагуу хуралдаж, дэмжсэн. Тиймээс цагаан сартай холбоотой бүхий л үзэсгэлэн худалдаа, зар сурталчилгааг зогсоосон.  Иргэдийг ч цагаан сараар аль болохоор айл хэсэж, хөд хөдөлгөөн үүсгэхгүй байх. Гэр гэртээ сар шинээ тэмдэглэхийг уриалж байгаа билээ.  

Өндөржүүлсэн бэлэн байдалд шилжлээ 

Шадар сайд Ө.Энхтүвшин энэ долоо хоногийн дундуур Гамшгаас хамгаалах өндөржүүлэн бэлэн байдлын зэрэгт хэсэгчилсэн байдлаар шилжиж байгааг зарласан юм. Тэрбээр "Ерөнхийлөгчийн зүгээс Дэлхий дахинд хүнээс хүнд, мал, амьтнаас хүнд халдварлах халдварт өвчин ихээр тархах болсонтой холбогдуулан Гамшгаас хамгаалах тухай, Эрүүл мэндийн тухай болон бусад хууль тогтоомжийн төслийг боловсруулж, Улсын Их Хурлын хаврын чуулган, шаардлагатай бол ээлжит бус чуулганаар яаралтай горимоор хэлэлцүүлэх чиглэлийг Засгийн газарт өгсөн. Энэ дагуу Шинэ коронавирусийн халдвараас урьдчилан сэргийлэх, эрсдэлийг бууруулах зорилгоор Засаг, захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг 2020 оны хоёрдугаар сарын 13-ны өдрөөс Гамшгаас хамгаалах өндөржүүлэн бэлэн байдлын зэрэгт /"ХЭСЭГЧИЛСЭН" байдлаар/ шилжүүлж байна" хэмээсэн. 

Өндөржүүлсэн байдлын үед Гамшгийн зарлан мэдээллийн дохиог хүн амд хүргэх, гамшгаас хамгаалах төлөвлөгөөнд тодотголыг хэрэгжүүлэх ажлыг нэн даруй хийж хэрэгжүүлэх. Засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг ажлын тусгай горимд шилжүүлэх.  Гамшгийн зарлан мэдээллийг хүн амд шуурхай хүртээмжтэй хүргэх.  Шаардлагатай үед хорио цээрийн дэглэм тогтоох, хүч хэрэгсэл, гамшгийн болон орон нутгийн нөөцийг дайчлах. Гамшгийн нөөцийг улсын хэмжээнд ЗГ-ын шийдвэрээр, орон нутагт бол тухайн Засаг даргын шийдвэрээр нэмэгдүүлэх зэрэг ажлыг хийж, хэрэгжүүлэх юм байна. 

ЕТГ-ын дарга З.Энхболд ажлаа өглөө 

Ерөнхийлөгчийн Тамгын газрын дарга З.Энхболд ажлаа өгч, сонгуульдаа бэлтгэхээр болсноо мэдээлсэн нь өнгөрч буй долоо хоногийн нэг сонирхолтой үйл явдал байлаа. Тэрбээр Төрийн ордонд хэвлэлийн бага хурал зарлаж, ажлаа өгч буйгаа зарласан юм. Түүний оронд ажлыг нь Хөлбөмбөгийн холбооны нарийн бичгийн дарга Ө.Шижир авч байгаа ажээ. Тэрбээр ажлаа өгөхөө мэдэгдэх хурлын үеэр "Би хэнтэй ч ам мурийж, муудалцаагүй ээ.  Би чинь амиа бодмоор байна шүү дээ. Сонгууль болоход гуравхан сар үлдчихээд байдаг. Түрүүчийн сонгуулиар би онгоцоор улс тойрсоор байгаад өөрөө унасан.  Одоо гурван сар аль нэг тойргийг сонгож очоод, тэндээ бэлтгэл хийх гээд байна. Түрүүчийн алдаагаа давтахгүйн тулд" хэмээн ярьсан юм.  

Ч.Сайханбилэг иргэншлээ солих хүсэлтээ өгсөн, өгөөгүй 

Өнгөрч буй долоо хоногийн бас нэг дуулиантай сэдэв нь Ч.Сайханбилэгийн иргэншлээ солих хүсэлтээ өгсөн, өгөөгүй гэх асуудал байлаа.  ЕТГ-ын дарга асан З.Энхболд хэвлэлийн хурлынхаа үеэр түүнийг гадны орноос иргэншил хүсэж, манай улсад байгаа Элчин сайдын яаманд хүртэл хандсан хэмээсэн. Мөн АН-ын дарга С.Эрдэнэ ч гэсэн тийм албан бус мэдээлэл ирсэн гэж ярьсан. Харин Ерөнхий сайд асан Ч.Сайханбилэг өөрийнхөө фэйсбүүк хуудсаар дамжуулж "Иргэншлээ сольж, эх орноо худалдахгүй" хэмээн мэдэгдсэн. Тэгвэл УИХ-ын гишүүн О.Баасанхүү Ерөнхий сайд асан Ч.Сайханбилэгийг иргэншлээ солих хүсэлт өгсөн гэх мэдээллийг МАН-д үйлчилдэг хууль, хяналтын байгууллагынхан гаргаж ирсэн хэмээн цахим хуудсандаа бичсэн байсан юм.  Харин Ч.Сайханбилэгийг АТГ-аас хэрэгт хамаарал бүхий этгээдүүдтэй уулзахыг хориглосон байх үед хуулийнханд мэдэгдэлгүй Солонгос руу ниссэн, интерполоор хайхад АНУ-д очсон гэсэн мэдээлэл ирсэн хэмээн тус газраас мэдэгдсэн. 

Монгол Улс БНХАУ-тай хиллэх хилээ бүрэн хаалаа 

Засгийн газар пүрэв гарагт ээлжит бусаар хуралдаж, Монгол Улс БНХАУ-тай хилээ бүрэн хаах шийдвэр гаргасан юм. Энэ талаар 

Засгийн газрын хэвлэл мэдээллийн албаны дарга Ц.Ганзориг "2020 оны хоёрдугаар сарын 14-өөс БНХАУ Монгол Улсын хооронд үйлддэг нислэг, төмөр замын зорчигч тээвэр бүрэн зогсож байна. Өөрөөр хэлбэл,  маргаашаас эхлэн хил 100 хувь хаагдсан гэж хэлж болно. Монгол Улсын иргэд хүндэтгэх шалтгаантай бол тусгай чартер нислэгээр татан авна. Энэ ажлыг Гадаад харилцааны яам хариуцан ажиллана" хэмээсэн юм.