Айл хэсэлгүй, гэр гэртээ сайхан шинэлээрэй

Өнөөдөр 17 дугаар жарны "Хотол төгс" хэмээх төмөр хулгана жилийн хаврын тэргүүн сарын шинийн 1.  Монголчууд бидний үе уламжлал тэмдэглэж ирсэн уламжлалт Цагаан сарын баярын шинийн 1-ий өдөр.  Өглөө эртлэн босож, эзэгтэй нар мөнх хөх тэнгэр, өнөд гийн мандах алтан нарандаа цайн, сүүнийхээ дээжийг өргөж, эрчүүд зүг мөрөө гаргаж, уламжлалаа дээдэлж байгаа байх. Монголын цагаан сар ёс төр, уламжлал, хүндэтгэл дүүрэн болдог, болсоор ч ирсэн, одоо ч тийм л болж байгаа.  

Гэхдээ энэ жил л монголчууд нийтээрээ хариуцлагатай шинэлэх хэрэгтэй байна. БНХАУ-аас эхтэй шинэ төрлийн коронавирусийн халдвар дэлхий дахиныг айдас хүйдэст автуулж буй. Тэр дундаа Ази тивийг.  Хятад улсад өвчилж байгаа хүний тоо 80 мянга руу дөхөж, нас барагсад 2000-ыг даваад удлаа. БНСУ-д энэ өвчний халдвар эрчимтэй тархаж,  өчигдөр оройны байдлаа 600 давчихлаа. Нас барсан хүний тоо 5 болж нэмэгдсэн. Өнөөдөр өглөө хэд хүрсэн юм бүү мэд. 

Японд ч гэсэн зүгээргүй байгаа. Өвчлөл юу юугүй тархахад бэлэн байна.  Азийн 10 гаруй оронд энэ өвчин бүртгэгдчихлээ.  Харин одоохондоо Монголд энэ өвчин бүртгэгдээгүй. Бид тэнгэр заяатай, бурхан ивээдэг болохоор, Эзэн Чингис хааны сүр сүлд харж явдагтаа энэ өвчин бүртгэгдээгүй юм биш ээ. Төр засгаас яаралтай урьдчилан сэргийлэх арга хэмжээ авч, олон хүн бөөгнөрөх бүхий л боломжийг хязгаарлаж, хилээ хүртэл хаасны буян. ЭМЯ, эмч мэргэжилтнүүд нойр, хоолгүй, амралтгүй ажиллаж байна. Хууль сахиулах, хяналтын байгууллагуудын ажилтнууд ч өөр өөрсдийн чиглэлээр сайн ажиллаж байгаа. Тэр бүхний буян. 

Энэ өвчнөөс сэргийлж, идэвхжилийг бууртал тусчихалгүй, тараачихалгүй байх үүрэг одоо иргэн бидэнд ирээд байна. Төр хийх бүх ажлаа хийсэн. Цагаан сарыг хүртэл өргөн дэлгэр тэмдэглэхгүй байх шийдвэрийг гаргаж, нийтийн тээврийг хүртэл зогсоолоо. Хөдөө орон нутаг руу явах бүх хөдөлгөөнийг зогсоолоо. Өөр яалтай билээ. Үлдсэн нь зөвхөн биднээс хамаарна. Өнөөдөр л , маргааш л бүгдээрээ тэвччихье.  Бужигналдахгүй, шавааралдахгүй байцгаая. Ганцхан жил ийш тийшээ жирийгээд байхгүй шинэлье. Аав, ээждээ очиж золгох нэг нь золгож л таарах байх. Бусдаар бол гэрээсээ гараад хэрэггүй шүү. Солонгост халдвар тарсан шалтгаан нь нэг эмэгтэйгээс үүдэлтэй гээд байгаа. Өөрөө том толгойлсон, эмнэлгийн байгууллага нь тоогоогүй гээд янз бүрийн л мэдээлэл гарч байна. Аль нь ч байсан гэсэн нэг хүнээс болоод олон хүн өвчин туссан нь тодорхой боллоо.

Тэгвэл манай улсад хэн нэгэн хэнэггүй нөхрөөс үүдэлтэйгээр өвчин тарахгүй л байх хэрэгтэй байна.  Хөдөө гадаа явах хөдөлгөөнийг хаачихаад байхад л бөөн бөөнөөрөө дайраад байгаа харагдсан. Өнөөдөр ч гэсэн бөөн бөөнөөр гарч давхиад, түгжрээд, шавааралдаад байв аа. Айл хэсэлгүй, гэр гэртээ сайхан шинэлээрэй. Ганцхан жил гэр гэртээ шинэлэллээ гээд Монголын уламжлал мохоо хутганы ир шиг болчихгүй дээ.