Италид ЕБС, их, дээд сургуулийг хоёр долоо хоногийн турш хаахаар боллоо

Италийн Засгийн газар шинэ төрлийн коронавирусийн халдвар нэмэгдэж байгаатай холбоотойгоор ЕБС, их, дээд сургуулийг хоёр долоо хоногийн хугацаанд хаахаар болжээ.  Харин "Ройтерс" агентлаг тус улсын Боловсролын сайд эцсийн шийдийг гаргаагүй байгаа талаар мэдээлсэн байна. 

Төрийн өмчит "RAI radio" болон  "ANSA",  "LaPresse" мэдээллийн агентлагууд Италийн Ерөнхий сайд Жузеппе Конте Засгийн газар хаалттай хуралдах үеэр энэ шийдвэрийг гаргасан талаар мэдээлэв.  Харин  Боловсролын сайд Люсиа Аззолина  ойрын хэдэн цагийн дотор энэ шийдвэрийг эцэслэн баталж гаргана хэмээн сэтгүүлчдэд мэдээлэл өгсөн аж. 

Сургуулиудын үйл ажиллагааг өнөөдрөөс эхлэн хаах бөгөөд гуравдугаар сарын дунд хүртэл хөл хорио тогтоох юм байна. Тэр болтол коронвирусийн халдварыг тархалтыг сааруулж чадна гэж төлөвлөж буй ажээ.  Өчигдрийн байдлаар Итали халдвар авсан болон нас барсан хүний тоогоороо Ираныг гүйцэж, Азиас гадна коронавирус хамгийн их тархсан улс болж байна.

Даваа гарагт Италид нас барсан хүний тоо 52 байсан бол мягмар гарагт 79 болж огцом нэмэгджээ. Харин лхагва гарагт коронавирусийн улмаас нас барсан хүний тоо 92 болсон байна. Харин нийт халдвар авсан хүний тоо 2922 хүрчээ. Италид коронвирус улс орон даяар тархсан бөгөөд 20 мужаас нь ганцхан Valle D’Aosta-д л бүртгэгдээгүй байгаа аж.