Экс Ерөнхийлөгчөө гутлаа тослож, зангиагаа засах хэрэггүй, бушуухан эх орондоо хүрээд ир

Монгол Улсын Ерөнхийлөгч асан Ц.Элбэгдоржийг уран цэцэн үгээс цаашгүй гээд л тухайн үед улсыг тэргүүлж байхад нь олонх их л муулдаг байхад би бараг хүүхэд байлаа.

Одоо харин энэ хүний байгаа байдлыг шүүмжилж бичээд сууж байх цаг дор. Эрх мэдэл, албан тушаал мөнх байдаггүй хойно. Манай экс Ерөнхийлөгч албан тушаалаараа аархаж явахдаа баахан хэрэг тарьчихаад гадаадад гараад бүгчихсэн. Дуудуулж, даллуулсаар бүтэн жил болов оо. Түүнийг Тавантолгойн уурхайг "МСS" болон Хятадын "Шинхуа"*д өгөх гэсэн, “Эрдэнэт”-ийн 49 хувийг Худалдаа хөгжлийн банк авсан болон уран зургийн хэрэг, Монголбанкны Эрдэнэсийн сангийн асуудал, АСЕМ зохион байгуулсантай холбоотой гэх хэд хэдэн хэрэгт холбогдуулж АТГ-аас дуудсаар өдийг хүрэв. Сүүлдээ ч интерполоор хайлгаж байгаа сураг дуулдсан.

Манай хүн тэгэх тоолонд нь твиттер хуудсаараа ““Гутлаа тослоод, зангиагаа зүүгээд хуулийн өмнө очно” мэдэгддэг байв. Гэтэл хамгийн сүүлд цагаан сарын үеэр гадаад орноос “Парламент” телевизийн нэвтрүүлэгт оролцох үеэрээ   “Би эх орондоо очно гэж бодож байсан. Очно гэж хэлээд л байгаа. Гэхдээ яг Х.Баттулгын урилгаар очих нь зөв үү. Тэр хүн хуулийн байгууллагынхныг өдөр ч ажлыг нь хийлгэхгүй шөнө ч унтуулахгүй байгаа. Тэгэхээр би хуулийнхны дуудлагаар очих уу. Х.Баттулгын зохиох жүжгийн дүр болж, бойны ямаа шиг хашаа руу орох уу гэдгээс сонгох хэрэгтэй болчихоод байна” гэж ярьсан. Товчхондоо бол Х.Баттулгыг Ерөнхийлөгч байсан цагт Монголдоо очихгүй гэж шуудхан мэдэгдсэн.

Гэтэл түүнээс хойш сар гаруйхан л болж байна даа. Манай Ерөнхийлөгч асан дэлхий дахинд гарсан коронавирусээс айж мэгдсэн нь илт. Ядахад манайх агаарын хилээ ээлж дарааллан хаасаар байгаа нь түүнийг ихэд түгшээсэн бололтой.

Тэрбээр өөрийн цахим хуудсаараа дамжуулан "Нэн шаардлагатай иргэдээ авч ирнэ гэж УОК-оос мэдэгджээ. Нэн шаардлагатай иргэд гэдэгт миний бие багтана гэж итгэе. Зарим хурал уулзалт цуцлагдаж, хойшилж бас ажил цэгцэрч байна. Вирусийн тархалт ихтэй газраас холдоод, өөрийгөө карантилж хугацаа тоолоод, нутаг руугаа ойртож явна" хэмээн бичсэн байх нь ёстой онигоотой. Бас өрөвдөлтэй.

Ямар ч албан тушаалтай, хөрөнгө мөнгөтэй хэнбугай ч эцсийн эцэст эрүүл мэндийнхээ төлөө өвчин зовлонгийн өмнө хүчин мөхөсддөгийн тод жишээ энэ. Тиймээс ч манай экс Ерөнхийлөгч эрүүл саруул л байвал бусад нь ч дүүрчээ гэж бодож хэлсэн амнаасаа ийн буцсан байх юм. Тэр эх орон руугаа тэмүүлж явна гэнэ. Х.Баттулгын шүүхээр шүүлгэхгүй гэж маяглаад байснаа гэнэт эх орон руугаа очиж явна гэж уяран хайлахын учир юу вэ. Олон одтой зочид буудлынхаа үнийг хүчрэхээ болив уу гэж даапаалах хүмүүс ч байна.

Уг нь ам алдвал барьж болдоггүй, агт алдвал барьж болдог гэж өвөг дээдсийнхээ сайхан сургааль бийсэн дээ. Хэлснээсээ нэгэнт буцсан хойно одоо гутлаа ч тослох хэрэггүй. Зангиагаа ч засах хэрэггүй дээ. Бушуухан л эх орондоо хүрээд ирээрэй. Эх орон тань эрхэм шүү экс минь.