ЭМЯ-наас ээлжит мэдээллээ хийлээ. ЭМЯ-ны Тандалт судалгааны албаны дарга Д.Нарангэрэл хэлэхдээ
“Илүү цагаар голомтод ажиллаж байгаа манай эмч нар илүү цагийн хөлсөө аваад явж байгаа. 24 цагаар өвчтөнийг сахин ажиллаж байгаа клиникийн эмч нар, халдвар судлалын судалгаа хийж байгаа эмч нарынхаа багийн онцгой анхаарч, халуун хоол унд, хувцас хэрэглэл, шаардлагатай бүх л зүйл, карманд нь ядаж витамин С хийгээд явуулахыг ЭМ-ийн сайд захиж байсан. ЭМЯ бүх хүчээрээ та бүхнийхээ ард хамгаалж, итгэл зүтгэлээр ажиллаж байгаа шүү.
Коронавирусийн халдвар дэлхийн 201 оронд бүртгэгдсэн. Өвчлөл Итали,Испани, АНУ-д эрчтэй тархаж байна. Ялангуяа АНУ-д 14 минут тутамд нэг хүн халдвар авч, 20 минут тутамд нэг хүн нас барж байна. Манай орны хувьд 12 тохиолдол бүртгэгдээд байна.
ДЭМБ-ын ажилтан О.Ариунтуяа:
2020.03.28-ний мэдээгээр “Ковид-19”-ээр 575449 тохиолдол, 26654 нас баралт бүртгэгдсэн байна. Тохиолдлын тоогоор Итали, АНУ, БНХАУ-ыг давсан бол Италид нас баралтын тоо БНХАУ-аас 1-3 дахин өндөр үзүүлэлттэй байна. Манай улс харьяалагддаг ДЭМБ-ын Номхон далайн баруун бүс 100 мянган тохиолдолтой байна. Халдвар гараагүй байсан Номхон далайн арлын улсууд анхны тохиолдлоо бүртгэж байхад БНХАУ, БНСУ-д импортлогдон орж ирсэн тохиолдолтой холбоотой хоёр дахь давлагаа эхэлж байна.
Харин Австрали, Филиппин, Сингапур, Вьетнамд халдвар огцом нэмэгдэж эхэлж байна. Лаос, Камбожид мянга мянгаараа Тайландаас буцаж ирж байгаатай холбоотой эдгээр гэрээт ажилчдын эрүүл мэндийн үзлэгийг эрчимжүүлэх ажил зохион байгуулж байна.
БНХАУ олон улсын нислэгийн тоогоо багасгаж, тусгаарлах байрны тоогоо нэмэгдүүлэхэд анхаарч байна. БНСУ-д дунджаар өдөрт 100 тохиолдол бүртгэгдэж, импортлогдож орж ирсэн тоо мөн нэмэгдэж байна.
Эмнэлгийн тусламжийн газрын дарга Я.Буянжаргал:
Тусгаарлан ажиглах байранд 3883 хүн ажиглалтад орсон. Өнөөдрийн байдлаар 2434 иргэн байна. Нийт 320 эмч, эмнэлгийн мэргэжилтэн хамт тусгаарлагдан тусламж үзүүлж байна. Мөн бусад эмч, эмнэлгийн мэргэжилтэн, тогооч, үйлчлэгч, жолооч гэх мэт хүмүүс 24 цагаар ажиллаж байна. Галт тэргэнд бас хоногт 11-19 эмч, эмнэлгийн мэргэжилтнүүд иргэдэд тусламж үйлчилгээ үзүүлж байна. Урьд шөнө 2369 зорчигч гал тэргээр зорчсон. Эдгээр хүмүүст тусламж үзүүллээ.
Бид бусад орнуудын туршлагад үндэслэн зөвлөмж, заавар удирдамжуудыг бүгдийг нь гаргаад мөрдөж ажиллаж байгаа. Нийгмийн сүлжээгээр эмчилдэг оношилдог асуудал огт биш. Хэн нэгэн судлаачид, сонирхогчид, нийгмийн сүлжээгээр бусдад танигдах гэсэн хүмүүс энэ өвчнийг зайнаас, цахимаар эмчилнэ гэж байнга дарамтлах байдал үүсээд байна. Үүнийгээ зогсоогооч. Дэлхийн улс орнуудад хэрэглэж байгаа, нотолгоонд тулгуурласан арга барилаар өвчтөнөө эмчилж байгаа. Иран улсад метанол сайн гэсэн цуу яриа гарсны улмаас 300 хүн хордож нас барсан. 1000 хүн бие нь маш хүнд эрчимт эмчилгээ авч байна. Тиймээс ард иргэд элдэв цуу ярианд итгэхгүй байхыг хүсье.
ХӨСҮТ-ийн дарга Д.Нямхүү:
2020.03.27-нд Сэлэнгэ аймагт тусгаарлагдсан таван сэжигтэй тохиолдлын шинжилгээнд коронавирус илрээгүй. Мөн тусгаарлалтад байгаа ХӨСҮТ-д тав, Увс аймагт 2, Дархан-Уул аймагт 19, Сэлэнгэ аймагт 4 нийт 32 хүний шинжилгээнд коронавирус илрээгүй. 2020 оны 3 дугаар сарын 28-нд ХӨСҮТ болон орон нутагт сэжигтэй тохиолдол бүртгэгдээгүй. Өнөөдрийн байдлаар ХӨСҮТ-д 220 хүн тусгаарлалт, ажиглалт, сэжигтэй байдлаар хянагдаж эмчлэгдэж байна.
Дархан-Уул аймагт ХӨСҮТ-д хийх дайны коронавирус илрүүлэх эмчилгээ хийх бүрэн боломжтой боллоо. Оношлуур хуваарилагдсан. Хүмүүсээ сургасан. Тиймээс Хөвсгөл, Дархан-Уул, Сэлэнгэ чиглэлийн шинжилгээг хийх боломжтой болсон. Дорнод, Ховдод мөн шинжилгээ хийх бэлтгэлээ хийсэн. Дэс дараатайгаар ХӨСҮТ шиг хүчин чадалтай лаборатори ажилд оруулж байна. Ачааллыг хуваарилсан чухал ажил боллоо.
Сэтгэгдэл бичих