ФОТО: Түргэвчилсэн соёл ба “шалаа угаасан” хот

Аливаа юманд заавал сайн тал байдаг шиг коронавирус гэгч өвчин бидэнд түргэвчилсэн соёлын хувьсгал өгч байна. Гарын, хувийн ариун цэврээ сайтар сахиж сурлаа. Түүнээс  гадна,   гудамж талбайн ариун цэврээ бид үнэхээр сайн сахиж байна.

УИХ-ын гишүүн асан Ц.Оюунгэрэл манай сайтад ярилцлага өгөхдөө “Манай иргэд үнэхээр гоё байна. Би өдөр бүр гэрээсээ алхдаг. Өдөрт 10 км алхаж байна. Өмнө нь алхаж байхад зам дээр бөөлжсөн, шүлс, нусаа хаячихсан, тэр байтугай өтгөнөөр бие зассан байх нь ч тааралддаг байсан. Гэтэл сүүлийн үед шүлс, нус байтугай тамхины иш ч харагдахгүй  байна. Шалаа угаачихсан юм шиг гудамжаар явах ямар сайхан юм бэ. Сайхан мэдрэмж авч байгаа. Хүмүүс  хүртэл хоорондоо зөрөхдөө зайгаа бариад зөрдөг болчихож. Хаана ч очсон гар угаах саван, гар ариутгагч спирт байдаг болж. Энэ бол үнэхээр соёл, дэвшил юм” гэсэн билээ.

Өмнө нь манай хотын гудамж талбай ямар байсныг надаар хэлүүлэлтгүй мэдэж байгаа байх. Гоё ганган хувцасласан залуус гудамжинд шүлсээ хаяад зогсож байх нь энүүхэнд. Энд тэнд гудамжны буланд нус, шүлс, цэр, тамхины ишний бөөгнөрөл үүссэн байдаг нь хэвийн л үзэгдэл. Гудамжинд ханайж, найтаах, хахаж цацан шүлсээ хаях, нусаа нийх нь байх л үзэгдэл мэт. Энэ бохир муухай бүхэн агаарт дэгдэж, иргэдийн эрүүл мэндэд ч хортой нөлөө үзүүлэхээс гадна хөрсний бохирдол үүсгэдэг байлаа.

Нийслэлийн Засаг даргын шийдвэрээр томуу, томуу төст өвчний тархалт, COVID-19 вирусээс сэргийлэх чиглэлээр, хотын соёлыг төлөвшүүлэх, иргэдийн үүрэг хариуцлага ухамсрыг нэмэгдүүлэх зорилгоор Зөрчлийн хуулиар хариуцлага тооцох арга хэмжээ ёстой л үр дүнгээ өглөө. Нийтийн эзэмшлийн гудамж талбайн хяналт шалгалтаар 281 мянган иргэнд зөвлөмж тарааж, нус, шүлсээ хаях, ил задгай бие засах, хог хаяж орчныг бохирдуулсан 29 мянга 129 иргэнд анхааруулга, зөвлөмж өгч,  4662 иргэнд 47 сая төгрөгийн торгууль оногдуулсан.

Одоо бид энэ түргэвчилсэн соёлд суралцсанаа алдахгүйгээр, коронавирусийг даван гарсныхаа дараа ч хэвшил болговол юутай гоё вэ. Сайхан хотдоо бүгдээрээ сайхан амьдарцгаая. “Шалаа угаасан” хотынхоо зургийн цомгийг та бүхэндээ хүргэж байна.