Д.Баттөр: “МИАТ” ТӨХК-ийн орлого 50 тэрбумаар тасарч, маш хүнд байдалд байна

УОК-ын Шуурхай штабаас мэдээлэл хийлээ. Энэ үеэр “МИАТ “ТӨХК-ийн гүйцэтгэх захирал Д.Баттөр:

“Өнөөдрийн байдлаар манай компани зургаан удаагийн тусгай үүргийн нислэг үйлдэж Улаанбаатараас 1173, Улаанбаатар луу 983 зорчигч авч ирсэн байна. Бүх нислэгүүдэд холбогдох албаны хүмүүс хяналт тавьж ажилласан. Нислэгийг аюулгүй гүйцэтгэх зорилгоор нислэгийн үед зайнаас халуун хэмжих, суудлын тоогоор хоёр цаг тутам маскаар хангах, мөн бээлий байрлуулсан. Суудлын халаасанд “ковид 19”-өөс сэргийлэх зөвлөмж байрлуулсан. Хаалга, суудлын бариулыг ариутгаж байгаа. 02.01-ний өдрийн УОК-ийн шийдвэрийн дагуу 37 хэмээс дээш халуунтай, шинж тэмдэг бүхий зорчигчдийг тээвэрлэхээс татгалзаж байгаа. Мөн арын эгнээний бүх суудлуудыг тусгаарлах суудал байдлаар зохицуулж байгаа. Нийт 6 удаагийн тусгай үүргийн нислэг бүрийн дараа агаарын хөлгийг бүрэн ариутгал хийлгэж, агааржуулалтын систем, ариун цэврийн өрөөнд давхар ариутгал хийгдэж байгаа.

“Ковид-19”-аас үүдэлтэй хямралд нэрвэгдэж байгаа салбар бол  агаарын тээвэр юм байна. Дэлхийн томоохон компаниуд 4,5-р ард дийлэнх нь дампуурлаа зарлахад бэлэн болжээ. Бид ч мөн хүнд байдалд байна.

Нэгдүгээр улиралд бид 90 тэрбумын орлого төлөвлөсөн байсан. Үүнээс 40 орчим тэрбумыг хийж амжаад одоо зогсонги байдалд орж, 50 гаруй тэрбумаар орлогын төлөвлөгөө тасарсан. Мөн нэмэлт зардал буюу онгоцны агааржуулалтыг маш өндөр үнэтэй солих гэх мэт 52 тэрбумын зарлага гаргачихсан. Мөн 44 тэрбум төгрөгийн өр төлбөр үүсчихсэн маш хүнд байдалтай байна. Гадаад дотоодын бүх хамтардаг байгууллагадаа хүсэлт хүргүүлсэн. Тиймээс нэг сая төгрөгийн орлоготой байсан ч хамаагүй нислэг байвал явъя. Ажилчдынхаа цалинг тавъя гэдэг байдлаар тусгай үүргийн нислэг хийж байгаа. Ирэхдээ ачаа тээвэр авч ирж зарлагаа нөхөж байх зорилгоор нисч байна. Гадаадад ачаа тээврийн онгоцны  хүрэлцээ муу байгаа учраас гадаадад нислэг үйлдэх, тендерт оролцохоор хүсэлт тавих гэх мэт бүхий л хүчин чадлаараа ажиллаж байна. МИАТ компани өдийг хүртэл төрөөс татаас авч байгаагүй. Одоо л дэмжлэг хэрэгтэй цаг болчихоод байна” гэв.