Б.Ууганбаяр: Тусгай машинаар дарга цэргийн хүүхдийг зөөсөн асуудал байхгүй

     УОК-ын Шуурхай штабаас мэдээлэл хийлээ. УОК-ын Шуурхай штабын дарга, ОБЕГ-ын дэд дарга хурандаа Б.Ууганбаяр "Энэ сарын 3-нд Токио-Улаанбаатар чиглэлийн онгоцоор ирсэн иргэдээс 68-г нь ХӨСҮТ-д, Цэргийн төв эмнэлэгт 15, Жаргалант сувилалд 2, Тоёото Инн зочид буудалд 188 хүнийг тусгаарлаад байна. Өнөөдөр 455 хүн тусгаарлах байрнаас гарна. Тусгаарлах байрнаас гарч байгаа иргэдийн нэр, гэрийн хаяг байршлийг орон нутгийн удирдлагуудад албан ёсоор хүргүүлнэ" гэв. 

ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан "Урин дулаан цаг болж байна. Иргэдийн хөдөлгөөн асар их болж байна. Гэтэл амны хаалтгүй явах, хүүхдүүд гудамж талбайд тоглож, дугуй унаад явж байгаа тохиолдол их гарах боллоо. Коронавирусийн халдвар 9,10 дугаар сард дахин дэгдэж магадгүй гэж ДЭМБ, эрдэмтэд судлаачид анхааруулж байна. Тиймээс бид болгоомжтой, сэрэмжтэй байх ёстой. Онцын шаардлагагүй бол гадуур дотуур явах хөдөлгөөнөө хязгаарлах хэрэгтэй байна. Одоо урин дулаан цагт хөрсний бохирдол маш их гарна. Тэгэхээр ариутгал халдваргүйжүүлэлтэй маш сайн хийх хэрэгтэй. Хоёр, гурван сарын турш хичээсэн зүтгэлээ хэн нэгний хариуцлагаас болж алдаж болохгүй. Тиймээс иргэн бүр хичээж, анхаарч, болгоомжтой, няхуур байх хэрэгтэй" гэв. 

Ингээд сэтгүүлчдийн сонирхсон асуултад хариуллаа. 

-Тусгаарлалтаас гарч байгаа иргэд журмаа зөрчөөд гадуур дотуур явах тохиолдол гараад байна. Үүнд хэрхэн хяналт тавих вэ? 

Ж.Амгалан: Тусгаарлах байрнаас иргэдээс гарч байгаа хаягаар нь хянаж байна. Үүнд, цагдаагийн байгууллага, дүүрэг, хороо, баг хянаж байна. Сүүлийн үед тусгаарлах байрнаас гараад янз бүрийн асуудал гаргах зөрчил харьцангуй буурч байна. Иргэдийн ухарсар дээшилж байна. 

-Дөрөвдүгээр сарын 8-нд Сөүлээс ирэх иргэдийн тусгаарлах байр бэлэн үү. Хотын төвдөө байрлуулаад байна гэх шүүмжлэл маш их байна? 

Б.Ууганбаяр: Сөүлээс ирэх иргэдийн тусгаарлах байрыг бэлдчихсэн. Маш олон хүн тусгаарлах байрнаас гарч байгаа. Тэгэхээр боломж бий. Хотын төвдөө байрлуулаад байна гээд шүүмжилж байна. Хотын гаднах байруудыг сонгох гэхээр дэглэмийн шаардлага хангахгүй байна. Нэг хүн нэг өрөөнд орно. Дотроо ариун цэврийн өрөөтэй байна гэх зэрэг маш олон шаардлагыг хангахгүй байгаа учир хотын төвын буудлуудыг сонгож байна. Тусгаарлах байранд байгаа хүмүүс өвчтэй хүмүүс биш. Ажиглаж байгаа тул айж, бэргэх хэрэггүй. 

-Тусгаарлах байранд байгаа иргэд төлбөрөө төлж дууссан уу? 

Б.Ууганбаяр: Баянхангай амралтын газрын эзнээс бидэнд албан бичиг ирсэн. Тусгаарлагдсан хүмүүс төлбөрөө төлөхгүй байна гэж. Тиймээс бид хоол ундаар үйлчилж чадахгүй болчихлоо гэж байна. Таны тушааж байгаа мөнгө бол таны байрлаж байгаа байр, идэж байгаа хоолны мөнгө. Төр эндээс илүү дутуу мөнгө аваагүй. Тиймээс дараагийн ирэх иргэдийг хүлээж авахад хүндрэл гарч байна. Хоолныхоо мөнгийг төлөхгүй гээд цааргалж байгаа хүмүүсийн мөнгийг төрөөс даахгүй шүү. Татвар төлөгчдийн мөнгийг өгөхгүй. Идсэн бол, байрласан бол мөнгөө өөрөө төлнө үү. Олон ААН бидний үйл ажиллагааг дэмжээд ажиллаж байна. Тиймээс иргэд өөрсдөө үүргээ биелүүлэх хэрэгтэй.

-Тайланд, Филиппин зэрэг Зүүн Азийн орнуудад дамжин өнгөрч явсан иргэд гацсан тохиолдол маш их байна. Эдгээр иргэдээ татан авах боломж бий юу? 

ГХЯ: Дэлхийн 45 улсаас 6313 иргэн эх орондоо ирэх хүсэлтээ өгсөн. Тэгэхээр тэрийг, энийг түрүүлж авч ирье гэж хэлэх боломжгүй. Зүүн Өмнөд Азийн орнуудад байгаа иргэдийн асуудлыг маш сайн ойлгож байна. Гэхдээ өнөөдрийн бололцоо ямар байгааг бүгд мэдэж байгаа. ГХЯ гадаадад байгаа иргэдийн гаргаж байгаа хүсэлт бүрийг УОК, Шуурхай штабад мэдээлсээр ирж байна. Тэр улсын иргэдийг тэргүүн эгнээнд авч ирье гэх байдлаар хандах боломжгүй байна. 

-Токио-Улаанбаатар чиглэлийн онгоцоор дарга нарын хүүхдүүд ирсэн, тусгай хар машинууд явж байсан гэх мэдээллүүд гараад байгаа. Үүнд тайлбар өгөх үү? 

Б.Ууганбаяр: Тусгай машинаар дарга цэргийн хүүхдийг зөөсөн асуудал байхгүй ээ. Шуурхай штаб дэлгэцээр нисэх  буудал дээр болж байгаа бүх процессыг хянаад ажилласан. Тэнд хоёр хар тэрэг байсан. Тэр бол цагдаагийн байгууллага болон мэргэжлийн хяналтын байгууллагын газар дээр нь удирдаж байсан албан хаагчдын хар тэрэг байсан. 

Б.Аз