METRO хот: Улаанбаатар хотоо унасан машинтайгаа адил хайрла

Замын хөдөлгөөнд оролцоод, дүрмээ баримтлаад явж байхад чинь үнэтэй жийп унасан хэн нэгэн улаан гэрлээр дайрч, цагаан шугам давж, дүрэм зөрчиж  байсан уу. Эсвэл цонхоороо тамхины ишээ шидэж,  элдэв хог чулуудаж байсан байх. Ганган машиныхаа хаалгыг онгойлгож, шүлсээ хаяж, нусаа нийж байхтай таарсан л биз дээ.  

Нэг үеэ бодвол манай залуус соёлтой, боловсон болсон. Цонхоороо хог хаядаг хүн өдрөөс өдөрт цөөрч байна. Хог хаясан нэгэндээ шаардлага тавьж, шаарддаг болж. Дүрэм зөрчих нь багасаж, харин ч нэгэндээ зам тавьж өгөөд, талархаж сурч байгаа. Харин үнэтэй, том жийп унасан хүмүүс л хэнэг ч үгүй цонхоороо хогоо хаяж, нусаа нийгээд л. Би л нэг том машинтай гэсэн шиг бусад жолооч нарт төвөг удаж, шахаж, дайрч, дээрэлхдэг. Үнэтэй машинтай хүмүүс хамгийн их дуут дохио өгч, дүрэм зөрчиж, шаардлага тавьсан нэгнийг элдвээр хэлж, харааж зүхдэг нь их. Том, үнэтэй, ганган машин унахаар замын хөдөлгөөний бүх дүрмийг зөрчиж, хогоо хаа хамаагүй шидэж, бусдыг хараах эрхтэй гэж аль ч хуулинд заагаагүй.  

Уг нь юм үзэж, нүд тайлсан, гадаах нь гэртээ, гэр дэх нь гэдсэндээ орсон хүмүүс илүү соёлтой байх ёстой биз дээ. Тэгээд дүрэм зөрчиж, хог шидэж байгаа хүмүүст шаардлага тавиад, өөрсдөө цэмбийгээд, намбайгаад, дүрмээ баримтлаад явбал харин ч үлгэр дуурайлал болох ёстой. Та нар соёлтой, боловсон байж, хотын соёлыг түгээх байлтай. Тиймээс үнэтэй машин унасан жолооч нар аа, үнэ цэнтэй амьдар, соёлыг түгээ, соён гэгээрүүл бусдыг.  

Улаанбаатар хотоо унасан машин шигээ хайрла. Хэдэн зуун саяын жийп унаж болно оо. Тэр машинаас чинь хямд эх орон, хогоо шидэж болох хот гэж байхгүй.  Машиндаа хогийн сав байрлуул, хуурай, нойтон салфетка авч яв. Үнэтэй машин авч дийлж байгаа хүнд энэ мэт бол үдийн будаа биз дээ. Тэгээд хогоо хогийн саванд хий.  Үлгэр жишээч бай, дүрмээ баримтал, явган зорчигчид зам тавьж өг.  Хотын соёлыг үлгэрлэх түүчээ бол.  Бусдаас дээгүүр зиндааны хүн байна гэдэг үлгэрлэх, үнэ цэнэтэй амьдрахын нэр. Үнэ цэнтэй байцгаа. Үнэ цэн чинь дүрэм баримтлахаас, хотоо хайрлахаас эхэлнэ.