“ЖИНХЭНЭ ЖДҮ”: Ашиг харах биш ажилчдынхаа цалинг өгөхөөр зүтгэж буй "Талст урлан"

Манай сайт энэ удаагийн “Жинхэнэ ЖДҮ” буландаа эцэг, эхээс өвлөн авсан гар урлалын бизнесээ орчин үетэй хослуулан хөгжүүлж, компани болгож өргөжүүлсэн нэгэн залуугийн бизнесийг танилцуулж байна.

О.Мөнгөнцоож гэх энэ залуу “Талст урлан” компаниа амжилттай удирдаж, 30-аад ажилчин, тэдний ар гэр, амьдралыг залгуулж яваа жижиг, дунд үйлдвэрлэл эрхлэгч юм. Тус компани “Мөнгөн Талст” брэндийн гар хийц, технологи хослуулсан үнэт эдлэл, арьсан эдлэл, бэлэг дурсгалын бүтээгдэхүүнийг зах зээлд нийлүүлж,  захиалгаар урлаж байна.

Төслийн хүрээнд монголчуудын үеэс үед уламжлан ирсэн ахуйн бүтээгдэхүүнийг орчин цагийн технологитой хослуулан шинэ төрлийн бүтээгдэхүүнийг үйлдвэрлэж, борлуулалтаа 50 хувь нэмэгдүүлсэн байна. Тухайлбал,  “Язгууртан” брэндийн 3 төрлийн домбо, “Мөнгөн талст” брэндийн эрэгтэй, эмэгтэй мөнгөн бүс, арьсан хайрцаг, сав, баглаа боодол, орчин цагийн ажил хэрэгч залуусын алт, цагаан алтан гоёл, өдөр тутам хэрэглэх мөнгөн болон зэс дотортой сэнжтэй аяга ч үйлдвэрлэн борлуулж байна. Улмаар ажилчдынх нь ур чадвар ч нэмэгдэж, тоног төхөөрөмжийн хүчин чадал ч сайжирчээ.

О.Мөнгөнцоож ЖДҮХС-гаас хоёр ч удаа хөнгөлөлттэй зээл авах гээд бүтээгүй аж. Харин гурав дахь удаагийн оролдлогоороо зээл авч чаджээ. Мэдээж бага хүүтэй зээл авсан нь бизнест нь дарамт багатай байсан ч коронавирустэй холбоотойгоор борлуулалт нь зогсонги байдалд орсон гэдгээ тэрбээр учирлаж байв.

Тиймдээ ч одоо ашиг харахаасаа илүүтэй 30 ажилтнаа хэрхэн цалинжуулах, хэрхэн ажлын байраа хадгалж үлдэхэд нь туслах вэ хэмээн бодох болсноо ч хэлсэн юм. Ингээд түүнтэй ярилцсанаа хүргэж байна.