Р.Оюунчимэг: Пүүзэн бялууг хараад олон хүн магтсан, гайхсан мессеж явуулсан

Саяхан сошиал орчинд  nike пүүз урдаа тавьсан нэгэн бүсгүйн зураг нэлээд тарсныг та бүхэн харсан уу.  Харин nike пүүз нь гутал биш бялуу гэвэл итгэх үү. Маш нарийн хийцтэй, яг л пүүз шиг тэр тэр амттаныг хэн ч бялуу гэж харж, зүсэж идэхэд хайран санагдаж байв. Бид уг пүүзэн бялууг урласан Р.Оюунчимэг бүсгүйтэй цөөн хором ярилцлаа. Тэрбээр нөхөр, дөрвөн хүүхдийн хамт амьдардаг жирийн л гэрийн эзэгтэй. Олон улсын бизнесийн дээд сургуулийн аялал жуулчлалын менежерийн ангид суралцаж байсан бүсгүй одоо бялуу урлаач болж, эргэлт буцалтгүйгээр “дурлажээ”. Түүнтэй фэйсбүүк хуудсаар нь холбогдох боломжтой. https://www.facebook.com/profile.php?id=100006759407683

-Таны хийсэн пүүз хэлбэртэй бялуу олон хүний сонирхол татсан. Энэ бялуугаа хэр удаан хугацаанд хийсэн бэ?

-Харин маш олон хүн гайхаж, уулга алдаж, урмын үг хэлж байсан нь сайхан санагдсан. Пүүзэн бялуугаа долоон цаг орчим хийсэн байх аа. Санасаныг бодоход гайгүй байсан. Гараас их хурдан гарсан. Заримдаа харахад их амархан мөртлөө хийхээр дуусч өгдөггүй тортнууд их байдаг.

-Захиалгаар хийсэн үү. Захиалгын эзэн нь хараад ямар үг хэлсэн бэ?

-Миний ээлжит захиалга байсан л даа. Урьд нь иймэрхүү хэлбэртэй бялуу хийе гэж боддог  ч чадах болов уу гээд зүрх хүрдэггүй байсан юм. Тэгсэн пүүзний хэлбэртэй бялууны захиалга орж ирэхээр нь өөрийгөө сорьж үзье гэж бодоод хийсэн. Захиалагч нь эмэгтэй хүн байсан. Эрэгтэй дүүдээ бэлэглэх гээд захиалсан юм билээ. Хүн нь ирж авахын өмнө фэйсбүүк сторидоо хийcэн байсан л даа. Гэтэл авах эзэн нь сториг хараад “OMG ямар гоё юм бэ. Гайхалтай” гэсэн мессеж явуулсан байсан. Мессежийг нь уншаад ашгүй таалагдах нь дээ гээд шууд сэтгэл тайвширсан шүү.

-Пүүзэн бялуу нь олон хүнд хүрсэнээс хойш захиалга ихтэй байна уу?

-Ер нь л захиалга ихтэй байдаг. Байнгын үйлчлүүлэгч ихтэй. Саяхан төрсөн жаахан хүүхэдтэй болохоор хэсэг завсарлаж байгаад захиалга аваад удаагүй байгаа юм. Пүүзэн бялуу хийснээр арай олон хүнд танигдсан болов уу гэж бодож байна. Олон хүн магтсан, гайхсан мессеж явуулсан.

-Та бялуу урлаад хэр удаж байгаа вэ. Мэдээж маш олон бялуу урлаж, олон хүн баярлуулсан байх даа?

-Бялуу урлаад долоон жил болж байна. Одоо миний хийж чадах, хийхийг хүсдэг ажил бялуу хийх. Тиймээс би бялуу урлаач мөн. Захиалгын тоогоо алдсан. Машин, цүнх, төгөлдөр хуур, одон медаль гээд л янз бүрийн хэлбэртэй бялуу хийсэн. Ер нь захиалагчдынхаа хийлгэхийг хүссэн хэлбэрээр л чадан ядан урлахыг боддог доо.

-Гэртээ хүүхдээ хараад сууж байгаа ээжүүд өөрийн чадвараа ашиглаж, ажилтай, орлоготой болдог болсон. Таны хувьд гэрээрээ бялуу урлаж санхүүгээ зохицуулдаг уу?

-Тиймээ санхүүгээ зохицуулахаас гадна миний хобби давхар явж байгаа л даа.

-Одоо ямар хэлбэртэй бялуу хийхээр төлөвлөж байгаа вэ?

-Хүний эд эрхтнээс эхлээд гутал пүүз машин гэх мэт маш олон төрлийн бялуу хийж байсан юм байна. Гэхдээ би цэцэг, хүн хоёрыг л бүр  төгс хийж сурахыг хүсдэг. Сэтгэлдээ хүртэл ерөөсөө хийж байгаагүй. Цаашид төгс хийхийн тулд л хичээнэ дээ. 

-Ямар учраас бялуу хийж эхэлсэн бэ?

-Ер нь л бялуу хийж сурах бяцхан мөрөөдөлтэй байсан юм. Тэгээд анх 2013 онд Sweetkitchen групп дээр фондант тортны зурагтай пост олж хараад,  "пөөх бялууг бас ингэж хийж болдог юм байх даа" гэж бодоод алмайраад, биширсэн дээ. Тэгээд өөрийн гараар хийж сурмаар санагдаад,  эргэлзэлгүй хийж сурна гэж шийдсэн. Яагаад ч юм миний дотор чадах юм шиг санагдаад өөртөө их итгэлтэй байсан.  Гэхдээ хийж эхлээд шантрах үе маш олон гарч байлаа. Фондант бялуу үнэндээ их хэцүү.

-Одоо ямар бялуу хийж байгаа вэ. Фондант бялуу хийхэд  тусгай орц байдаг байх тийм үү?

-Фондант бялуу доторх нь зөөлөн байж болдоггүй л дээ. Тиймээс энгийн ванилла, кекс, какао кекс, сүүн кремтэй, эсвэл шоколадны ганачета, хавчуурганд нь жимсний чанамал ч юм уу өөр амттан оруулж хийх боломжтой байдаг. Тэгэхгүй бол хэлбэрээ алдаад, хүссэн хэлбэр дүрсээ гаргах боломжгүй болдог. Фондант тортондоо л их анхаардаг. Хийх дуртай болоод ч тэр үү бусад төрлийн тортны захиалга бол ер нь авдаггүй. Харин гэртээ өөрсдөдөө зориулж энгийн торт хийж иддэг. Фондант тортны хажуугаар олон төрлийн захиалга авах бас их хэцүү. Яагаад гэвэл фондант маш их цаг зарцуулагддаг.