Нааш цааш холхих олны хөл гэрлэн дохион дээр ирэх мөч. Бие биенээ зэрвэсхэн ажиглан зогсох хүмүүс. Харин нэг залуу тэнд бүр тэнгэрт дүүлж байна аа. Хөгжмөө тултал нь чангалж, дуу хөгжмийн хэмнэлд эргэж буцалтгүй автжээ. Түүний сонсох дуу нь чихэвчийг нь давж сонсогдох нь чих өвтгөх шиг болно. Гэвч түүнд хөгжмөө багасгаад, зам хөндлөн гараарай гээд хэлчих эрхтэй хүн ойр тойронд байдаггүй. Учир нь чихэвчээр хөгжим хэрхэн сонсох нь залуугийн өөрийнх нь сонголт учраас шүү дээ.
“Чихэвч зүүн гудамж талбайд яваа залуус талд бэлчиж буй мал адил санагддаг юм” гэсэн нь өнөөдрийн дүр төрхийг бодитоор илтгэх мэт. Тэд автозамаар гарахдаа жолооч дуут дохио өгч байгааг сонсдоггүй, хэн нэгэн хойно урдаас нь дуудахыг ч анзаардаггүй нь замын хөдөлгөөнд оролцох үедээ ч чихэвчний хөгжмөө орчлонгоос тасрах оргил цэгтээ тавьж, алхам бүрээ эрсдэлд оруулж байгаагийн тод жишээ. Үнэндээ энэ байдал өөрийн, өрөөлийн гээд хэн бүхэнд төвөг учруулдаг нь нууц биш. Магадгүй зарим нь ойлгохыг ч хүсдэггүй бололтой. Автобусанд нойрмоглон зорчихоос дуу сонсоод сэргэг явах. Эсвэл өөрийн орон зайг хэт дэлгэн хэрүүл хийдэг эгч нарыг сонсохгүй, бусдад саад болохгүйгээр ажлын цагаар сонсчихно гээд давуу тал их бий л дээ. Харин хэрэггүй үедээ ашиглах хэрэггүй гэдгийг л залууст хэлмээр.
Хэрвээ оюутан хоёр охин чихэвч зүүгээгүй байсан бол, залуу хүү барилгын ажил явагдаж буй газрын дэргэдүүр өнгөрөх хэдхэн хормын зуурт чихэвчний хөгжмөө багасгасан бол тэд өнөөдөр ч бидний дунд алхаж байх байсныг санадаг уу. Одоо ч тэдний адилаар залуус өөрсдийгөө цаг ямагт эрсдэлд оруулан алхсаар л байдаг. Мэддэг ч мэдээгүй юм шиг, сонссон ч сонсоогүй мэтээр. Гэвч хувь хүний эрх чөлөө ярьж зогсох та ч, би ч бусдын төлөө санаа тавихад болохгүй зүйл үгүй. Басхүү тавьсан шаардлагыг хүлээгээд авчихдаг залуус их байгаасай. Соёлтой залуу та замын хөдөлгөөний дүрмийг биелүүлж, өөрийн болоод өрөөлийн эрхийг хамгаалаарай. Эхлээд чихэвчээ ав, дараа нь зам хөндлөн гараарай.
Ц.Янжиндулам
2 сэтгэгдэлСэтгэгдэл бичих
ГАРЦГҮЙ ГАЗРААР ГАРЧ БГАА ХҮМҮҮСИЙГ ХЭЗЭЭ ТОРГОДОГ БОЛОХ ВЭ, ЦАГДАА НАРАА. СОЁЛГҮЙ БҮДҮҮЛГҮҮДЭЭС БОЛЖ МӨРӨӨРӨӨ ЯВАА ХӨӨРХИЙ ЖОЛООЧ Л ХЭРЭГТ ХОЛБОГДОЖ СЭТГЭЛИЙН ДАРАМТАД ОРЖ БН ШҮҮ ДЭЭ
алхаад явж байхад чихэвч зүүсэн залуус нэлээд их байдаг ш дээ.уг нь аюулгүй байдлаа бодвол зүүхгүй байсан нь дээр л дээ,бас дүлий болгодог гэсэн ш тээ чихэвч удаан зүүхээр