Б.Лхагвацэрэн: Музейн удирдлагууд манай багийн төслийг маш сайшаалтай хүлээж авсан нь бидэнд урам өгсөн

 "Зориг сан", "Швейцарын Хөгжлийн Агентлаг"-аас хамтран хэрэгжүүлдэг “Оюутны тэтгэлэгт хөтөлбөр”-өөс бүрдсэн “Активистс” багийн залуус “Гэрээсээ Музейд" төслийг анх удаа санаачлан “Улаанбаатар хотын  музейд” нээлтээ хийлээ.  Энэ төслийн талаар “Активитс” багийн гишүүн МУИС-ийн СЗОНХТ-ийн хоёрдугаар түвшний оюутан Б.Лхагвацэрэнгээс тодрууллаа.

-“Гэрээсээ музейд”  төслийн талаар тайлбарлаж өгөөч?

-Бид  “Зориг сан” болон “Швейцарын Хөгжлийн агентлаг”-аас жил бүр хэрэгжүүлдэг оюутны тэтгэлэг хөтөлбөрт хамрагдсан сурагчид байгаа. Оюутнууд тэтгэлэгт хамрагдсаныхаа хариуд нийгэмд чиглэсэн төслийг жил бүр хэрэгжүүлдэг. Тэтгэлэгт хамрагдсан оюутнууд 10 багт хуваагдаж, төсөл санаачлан хийдэг. Бидний  хувьд хөл хорио тогтоосон энэ үед  дэлхийн музейн өдрийг тохиолдуулан “Гэрээсээ музейд” төслийг хэрэгжүүлэх болсон.

-Энэхүү төслийг хэрэгжүүлэх болсон гол зорилго нь  юу вэ?

-Энэхүү төслийн зорилго нь хүүхэд, залуучуудад Монголчуудын уламжлалт өв соёлыг  өдөр тутам гэрээсээ гар утас, лабтоп гэх мэт  хэрэгслүүдээр дамжуулан Улаанбаатар хотод үйл ажиллагаа явуулдаг музейнуудын үзмэрийг   сонирхолтой хэлбэрээр үзүүлэх зорилготой.  

-“Гэрээсээ музейд” төслөөр дамжуулан  ямар музейнуудыг  үзэх боломжтой вэ?

-Төслийн эхний шатанд “Улаанбаатар хотын музей”, “Монголын театрын музей”, “Занабазарын дүрслэх урлагийн  музей”, “Сансар од эрхсийн ордон” музейнүүдийн 4 онцлох танхимийг сонгосон байгаа. Эдгээр танхимийн үзмэрүүдийг  360 виртуаль  аялал болгож, онцлох 10 үзмэр,  баримтийг үзүүлнэ. Мөн музейн эрдэм шинжилгээний ажилтнуудтай  хийсэн подкастууд” Ublife” сайт болон манай пэйж хуудсаар дамжуулан гарна.

-Виртуал гэдэг нь яг дэргэдээс нь үзэж байгаа мэт мэдрэмж авахыг хэлдэг. Энэ технологийн шинэчлэлийг хэрхэн шийдсэн нь сонин санагдаж байна?

-Бид “UB comedy”  клубийн видео инженерүүдтэй хамтарч ажилласан. Төслийн ажлын хувьд  360 камераар зураг авалт болон видео хэлбэрээр музейн ажилтан тайлбар хийж явсан байгаа. Бидний хийсэн бичлэг “Youtube” сувагт байршина. Гэрээсээ музейгээр аялахыг хүссэн хүн бүр ямар нэгэн тусдаа  апплейкшин ашиглахгүйгээр өдөр тутам ашигладаг платформоор дамжуулан үзэх боломжтой.

-Энэхүү төслийн багт хэчнээн хүн ажилласан бэ. Төслийг хэрэгжүүлэхийн тулд хэр их хугацаа зарцуулав?

-Бидний тэтгэлэг 12 сараас эхэлсэн. Тэр үед “Гэрээсээ музейд” төслөөс өөр төсөл хэрэгжүүлэхээр төлөвлөсөн байсан. Гэвч “Covid-19” гарсан учраас өмнөх төслийг хэрэгжүүлэхэд хүндрэл учирсан. Тиймээс цар тахлын үед хүнд хэрэгтэй болон хэрэгжүүлэхэд боломжтойг тооцоолон төслөө санаачилсан. Төслийн багт сэтгүүлзүйн ангийн гурав,  эрхзүйн чиглэлээр сурдаг гурван оюутан багтдаг. 

-“Гэрээсээ музейд”  төсөл та нарын тэтгэлгийн хугацаанд хэрэгжээд  дуусах уу. Эсвэл цааш үргэлжилж зөвхөн музейн үзвэрүүдээс  гадна өөр үзвэр үйлчилгээний газруудыг гэрээсээ үзэх боломжийг олгох болов уу?

 -Бид эхлээд тэтгэлгийн  хүрээнд хийх ажил гэж төлөвлөсөн байсан. Харин төслийг хэрэгжүүлэх явцад бидэнтэй хамтрах байгууллагууд гарч ирсэн. Мөн музейнууд манай төслийг маш сайшаалтай хүлээж авсан нь бидэнд  урам өгсөн. Тиймээс энэ төслөө өөрсдийн боломжоор цааш үргэлжлүүлэн хийх болно. Улаанбаатар хотод маш олон музей үйл ажиллагаагаа явуулдаг шүү дээ. Тэдгээр нь зөвхөн нэг танхимаар хязгаарлагдахгүй. Маш олон танхимтай. Харин бид өөрсдийн бололцоонд тааруулж дөрвөн музейн, дөрөвхөн танхимыг сонгож танилцуулж байна. Цаашид бидэнтэй хамтран дэмжиж ажиллах  хүмүүс гарч ирвэл төслөө илүү сонирхолтой байдлаар үргэлжлүүлнэ.