Д.Нямхүү: Шинээр 13 хүнээс коронавирус илэрч, батлагдсан тохиолдол 161 боллоо

ЭМЯ-наас мэдээлэл өглөө. Энэ үеэр ЭМЯ-ны хэлтсийн дарга Д.Нарангэрэл "Коронавирусийн халдвар дэлхийн 216 улс оронд бүртгэгдэж,  5.7 сая хүн өвчилж 356 мянган хүн нас барсан. 2.4 сая хүн эдгэрсэн. 2,9 сая хүн эмчлүүлж байна. 

Сүүлийн 24 цагийн хугацаанд 101 мянган тохиолдол, 5000 нас баралтаар нэмэгджээ. Энэ нь өмнөх өдрийнхөөс 209 мянгаар нэмэгдсэн. Өвчлөл, нас баралт нэмэгдсэн үзүүлэлт юм. ОХУ-д 24 цагийн дотор 8338 хүн халдвар авсан. Буриад, Эрхүү, Тува, Читид халдвар нэмэгдсэн байна. 

Манай улсад 382 хүн ажиглалтад шинээр орсон. Хоёр хүн ажиглалтаас гарсан. 1635 хүн ажиглалтад байна. Орон нутгийн 14 чиглэлийн галт тэргэнд 4343 хүнд тандалт судалгаа хийсэн. Сэжигтэй тохиолдол илрээгүй байна. 

119 тоот дугаарт 228 дуудлага ирж, мэдээлэл зөвлөгөө авсан. Шуурхай аппликейшнд гадаад улсаас Монгол  Улсын 15 иргэн зөвлөгөө авч, эмчилгээний талаар мэдээлэл авсан.  Иргэдийн хувьд зах худалдааны төвүүдийн худалдагч нар маск зүүхгүй байна гэсэн мэдээлэл өгч байна. Нэгдүгээрт, өөрийгөө, нөгөө талдаа бусдыг эрсдлээс сэргийлэх зорилгоор зайлшгүй маск зүүх шаардлагатай байна. Тиймээс мэргэжлийн хяналтын байгууллагаас амны хаалтны хэрэглээний талаар хяналт шалгалт хийнэ гэдгийг хэлье.

Коронавирус уушгинд өөрлөлт өгч гэмтээж байсан бол сүүлийн үед зүрх судас, эрхтэн тогтолцооны хүндрэл өгч өөрчлөгдөж байна. ДЭМБ анхааруулж хэлсэн. Бүх зүйл өдрөөс өдөрт өөрчлөгдөж байна. ИХ британийн эрдэмтэд 274 өвчтөнд хийсэн судалгаагаар 7.7 хувь нь венийн судасны бөглөрөл, 76.2 хувь нь уушигны судсанд өглөрөл үүсгэсэн шинж тэмдэг илэрсэн байна. Тиймээс венийн судасны бөглөрөлийг эрт илүүлэх нь өвчтөн нас барахаас урьдчлин сэргийлнэ гэж үзжээ" гэв. 

ХӨСҮТ-ийн дарга Д.Нямхүү "Өчигдөр ХӨСҮТ-ийн хоёр, Дархан-Уул аймгийн нэг, Зоонозын вирусологийн лабораторт нийт 517 хүний сорьцод шинжилгээ хийхэд, 504-т нь коронавирус  илрээгүй. ХӨСҮТ-д тусгаарлагдсан 40, ажиглах байранд тусгаарлагдсан 352 хүний шинжилгээнд коронавирус илрээгүй. Тандалтын зорилгоор 19 хүний сорьцыг санамсаргүй түүврийн аргаар хийлээ. Коронавирус илрээгүй. Ажиглах байранд тусгаарлагдсан долоон хүний давтан шинжилгээ, Дархан-Уул аймгийн вирусологийн лабораторт Алтанбулагийн боомтоор орж ирсэн 30 ачаа тээврийн жолооч, аймгийн ажиглалтын байранд тусгаарлагдсан байсан 69 хүний давтан шинжилгээнүүдэд коронавирус илрээгүй. 

2020 оны тавдугаар сарын 27-нд 13 хүнээс коронавирус илэрлээ. Тайлбарлаж хэлвэл, 2020 оны тавдугаар сарын 26-нд Москва Улаанбаатарын онгоцоор 170 хүн ирсэн. Давтан шинжилгээгээр нэг илэрлээ. Мөн 2020 оны тавдугаар сарын 27-нд буюу өчигдөр Алтанбулагийн боомтоор 340 хүн орж ирсэн. Эдгээр хүмүүсийн шинжилгээнээс 12 хүнээс илэрлээ. 

Энэ 12-оос арав нь оюутан байна. Ингэхээр оюутнууд маш их халдвар авсан нь харагдаж байна. Сэтгэл санаа нь бэхжээгүй 17-20 настай хүүхдүүд байна. Тэндээ сургуулиа зогсоогоод, дотуур байрнаас нь гаргаж байгаа гэх мэт олон түмэн бэрхшээлийг давж эх орондоо ирсэн. 

Өнөөдрийн байдлаар нийт батлагдсан тохиолдол 161, эдгэрсэн 43, эмчлэгдэж байгаа 118 хүн байна. Хөнгөн 107, хүндэвтэр 11 хүн байна" гэв.